Эзэкээл 46 - Библи

Элдэб ёһо гуримууд

¹ Эзэн Бурхан иигэжэ айладхана: – Дотор хорёогой зүүн үүдэнүүд зургаан үдэрэй туршада хаалтатай байха ёһотой. Харин субботын үдэр болон һарын шэнэдэ тэдэ нээгдээтэй байха зэргэтэй.

² Израилиин зонхилогшо эдэ үүдэнүүдэй оролгын таһалга руу дотор хорёогоор үнгэрэн орожо, богоһын хажууда зогсон байха. Тэрэнэй түгэс шатаалта болон амгалан байдалай түлөө үргэлнүүдые санаартан абажа, үргэхэ. Тиихэдэнь зонхилогшо Намда доро дохин зальбараад, тэндэһээ ошохо. Тэрэнэй удаа үүдэнүүд хаагдахагүй, үдэшэ болотор нээлтэтэй зандаа үлэхэ.

³ Субботын үдэрнүүдтэ, мүн һарын шэнэдэ Израилиин арад түмэн эдэ зүүн үүдэнүүдтэ ерэжэ, Намда һүгэдэн мүргэдэг байха ёһотой.

⁴ Субботын үдэр зонхилогшо Намда зургаан хурьга, нэгэ хуса түгэс шатаалта үргэл болгон үргэхэ. Үргэлэй мал ямаршье эрэмдэггүй байха ёһотой.

⁵ Хусатай хамта тэрэ нэгэ эфаа гурил, хурьгадуудтай хамта өөрынгөө дураар гурил үргэхэ. Тиихэдэ нэгэ эфаа гурилтай хамта нэгэ гиинэ оливын тоһо тэрэ үргэхэ болоно.

⁶ Һарын шэнэдэ зонхилогшо нэгэ буруу, зургаан хурьга, нэгэ хуса Намда зорюулан үргэхэ. Үргэлэй мал ямаршье эрэмдэггүй байха зэргэтэй.

⁷ Буруун болон хусатай хамта тэрэ тус тустань нэгэ эфаа гурил, хурьгадтай хамта өөрын дураар гурил үргэхэ. Нэгэ эфаа гурилтай хамта тэрэ нэгэ гиинэ оливын тоһо үргэхэ ёһотой.

⁸ Зонхилогшо ерэхэдээ зүүн үүдэнүүдэй оролгын таһалгаар ерэжэ, тэрэл замаараа ошохо.

⁹ Минии арад түмэн һайндэрнүүдэй үедэ Намда мүргэхэеэ ерэхэдээ, ороһон үүдэнүүдээрээ гарахагүй, ондоо үүдээр гаран ошохо ёһотой. Жэшээнь, хэн нэгэн хойто үүдэнүүдээр ороо һаа, ошоходоо, урда үүдэнүүдээр гараха зэргэтэй.

¹⁰ Зонхилогшын ороходо улад зон орохо, зонхилогшын ошоходо, зон мүн лэ гаража ошохо.

¹¹ Бусад һайндэрнүүдэй үедэ буруун болон хусатай хамта мүн лэ нэгэ эфаа гурил үргэл болгон үргэгдэхэ, хурьгадтай хамта хэды шэнээн гурил үргэхэ гээшэ – хүн бүхэнэй өөрын дуран. Тиихэдэ нэгэ эфаа гурилтай хамта нэгэ гиинэ оливын тоһон үргэгдэхэ.

¹² Зонхилогшын өөрын дураар түгэс шатаалта үргэл гү, али амгалан байдалай түлөө үргэл Намда үргэхэеэ һанаа гээшэ һаань, дотор хорёогой зүүн зүгэй үүдэнүүдые тэрээндэ нээхэ хэрэгтэй. Субботын үдэр хэдэгтэл адляар тэрэ үргэл хэхэ. Ошоходонь, үүдэнүүд хаагдаха ёһотой.

¹³ Үглөө бүри нэгэ хурьга түгэс шатаалта үргэл болгон Намда үргэхэ хэрэгтэй. Тэрэ хурьган ямаршье эрэмдэггүй байха.

¹⁴ Тэрээнтэй хамта гурбанай нэгэ хуби гиинэ оливын тоһонтой хамта худхагдаһан эфаагай зургаанай нэгэ хуби гурил үргэгдэхэ ёһотой. Намда зорюулһан үргэл тушаа иимэ ёһо гурим хэтэ мүнхэдөө хубилгагдахагүй.

¹⁵ Түгэс шатаалта үргэл хурьгаар, мүн талхан, оливын тоһоор үргэл Намда үглөө бүри үргэгдэхэ ёһотой.

¹⁶ Эзэн Бурхан иигэжэ айладхана: – Зонхилогшо өөрын али нэгэн хүбүүндэ бэлэг болгон газар үгөө гээшэ һаань, тэрэ бэлэгынь тэрэ хүбүүнэйнь уг залгамжалгын эд зөөри болохо.

¹⁷ Харин зонхилогшын али нэгэ албатандаа газар бэлэглээ гээшэ һаань, тэрэ газар нэгэ жэлэй туршада албатанайнь зөөри гэжэ тоологдоод, жэлэй һүүлээр дахин зонхилогшын болохо. Гансал зонхилогшын хүбүүд бэлэглэһэн газарыень уг залгамжалан саашадаа эдлэхэ зэргэтэй.

¹⁸ Зонхилогшо арад зоной газар хүүгэдтээ бэлэглэжэ шадахагүй. Гансал өөрын газар уһые тэрэ үхи хүүгэдтээ бэлэг болгон бариха эрхэтэй.

Үргэлэй мяха шанадаг газар

¹⁹ Тэрэ хүтэлэгшэ намайе дотор хорёо руу асарба. Урда талаар ябажа, санаартадай таһалгануудай хажууда тогтобобди. Баруун талын газар намда заагаад,

²⁰ тэрэ иигэжэ хэлэбэ: – Энэ газарта санаартан гарза харюулгын үргэлэй болон нүгэл сагааруулгын үргэлэй мяха шанадаг. Мүн лэ эндэ үргэлэй хилээмэн болгогдодог. Иигэжэ эдэ нангин үргэлнүүд гадаа хорёо соо шанагдадаггүй, тэндэ шанаа гээшэ һаань, хэн нэгэн ойлгомторгүй дайража, бузарлажа болохол.

^21-22 Тэрэ хүтэлэгшэ намайе гадаа хорёо руу гаргажа, дүрбэн углуугаарнь үшөө багахан хорёонуудай байһые харуулба. Тэрэ хорёонууд дүшэн тохой ута, гушан тохой үргэн талмайтай.

²³ Эдэ хорёонууд тойроод ханатай, хана тойрон – зууханууд.

²⁴ Тэрэ хүтэлэгшэ иигэжэ хэлэбэ: – Эдэ зууханууд дээрэ нангин үргөөгэй ажалшад зоной үргэлэй мяха шанадаг юм.