Эзэкээл 44 - Библи

Зүүн үүдэнүүд хаалгатай байха ёһотой

¹ Тэрэ хүн намайе нангин үргөөгэй зүүн талын гадаа үүдэнүүд руу асарба. Үүдэнүүд хаагдаатай байгаа.

² Эзэн намда иигэжэ айладхаба: – Би, Израилиин Эзэн Бурхан, эдэ үүдэнүүдээр орооб, тиимэһээ тэдэ хододоо хаалгатай байха ёһотой. Бэшэ хэншье эдэ үүдэнүүдээр орохогүй!

³ Израилиин зонхилогшо үргэлэй эдеэ хоолһоо ама хүртэхэеэ иишээ ерэхэ. Гэбэшье тэрээндэ эдэ үүдэнүүдэй дэргэдэхи оролгын таһалгал ашаглахань зүбшөөгдэнэ.

Хэн нангин үргөө руу орохо ёһогүйб?

⁴ Удаань тэрэ хүтэлэгшэ намайе нангин үргөөгэй нюур тала руу хойто хаалгануудаар абаашаба. Нангин үргөө Эзэнэй алдар солоор толорон байһыень харамсаараа газар руу һүгэдэн унабаб.

⁵ Эзэн намда иигэжэ айладхаба: – Хүнэй үри Эзэкээл! Анхаралтайгаар шагнан, харан байгаарай. Нангин үргөө тушаа хуули ёһо айладхахам. Ямар үүдэнүүдээрнь зоной орохонь зүбшөөгдэнэб, ямар үүдэнүүдээр орохонь хорюултайб гэжэ анхаралтайгаар шагнан байгаарай.

⁶ Үгыем дууладаггүй Израилиин улад зондо иигэжэ дуулга: «Би, Эзэн Бурхан, жэгшүүритэй муухай хэрэгүүдые үйлэдхэхэеэ болигты гэжэ захирнаб!

⁷ Намда шүтэдэггүй, этигэдэггүй хариин зониие үргэлэй үедэ Минии нангин үргөө руу оруулдаг һэнта. Иимэ муу муухай хэрэгүүдээрээ таанад Намтай баталһан хэлсээгээ эбдээ болонот.

⁸ Нангин үргөө соо үнгэрдэг ёһололнуудые хинан байха ёһотой аад, таанад өөһэдынгөө орондо хариин зониие табижа, тэдэ ёһололнуудые хинан байгуулдаг һэнта.

⁹ Би, Эзэн Бурхан, иигэжэ захирнаб: „Намда шүтэдэггүй, этигэдэггүй нэгэшье хариин хүн, Израилиин арад түмэнэй дунда ажаһуудаг байгаашье һаа, Минии нангин үргөө руу орохо эрхэгүй!

Левидүүд хэһээгдэхэ

¹⁰ Левит зарим зон Намһаа буруу хаража, онгонуудта мүргэжэ байгааша Израилиин зарим зонтой хамтаран мүргэдэг байгаа. Тэдэ левидүүд хэһээгдэхэ!

¹¹ Үүдэнүүдые харууһалха, түгэс шатаалта үргэлэй мал үүсэлхэ, зоной жэжэ-божо хэрэгсэлнүүдые хангаха – гансал иимэ ажал хэхэнь тэдээндэ зүбшөөгдэхэ.

¹² Израилиин зоной онгонуудта мүргэхэ ёһололнуудые үнгэргэдэг, иигэжэ нүгэл шэбэл дэлгэрүүлһэнэйнь түлөө Би, Эзэн Бурхан, тэдэнэй урдаһаа гараа далайхаб, тиигэжэ тэдэниие хэһээхэб!

¹³ Тэдэ Минии нангин үргөө соо тахилай ёһолол үнгэргэхэ ёһогүй, Минии нангин газарнууд руу орохо эрхэгүй. Жэгшүүрилтэй муу муухай үйлэ хэрэгүүдые хэһэнэйнгээ түлөө гэм зэмые тэдэ иигэжэ амасаха.

¹⁴ Нангин үргөө соо ябуулагдадаг бүхы хара хүндэ ажал тэдэ хэдэг байха.

Санаартадай ёһо гуримууд

¹⁵ Израилиин зарим зоной Намһаа буруу хараад байһан үедэ гансал Намда үнэн сэхэ үлэгшэ Цадоок санаартанай үри һадаһад, Левиин обогой санаартан, Минии ёһололнуудые ябуулха, тоһо өөхэ, шуһа үргэл болгон үргэхэ эрхэтэй.

¹⁶ Гансал тэдэ Минии нангин үргөө руу орожо, үргэл үргэхэ ёһолол хэхэ, мүргэл ябуулха болоно.

¹⁷ Дотор хорёо руу ороходоо тэдэ улһан хубсаһа үмдэхэ ёһотой. Юрэдөө, дотор хорёо соо гү, али нангин үргөө соо ёһолол ябуулхадаа тэдэнэй хилгааһан хубсаһа үмдэхэнь хорюултай.

¹⁸ Тэдэ улһан толгойн боолтонуудые, улһан дотор хубсаһа үмдэхэ ёһотой. Санаартад тэдэниие хүлэрүүлхэ ямаршье бүһэ бүһэлхэ ёһогүй.

¹⁹ Гадаа хорёо руу зон руу гарахадаа тэдэ ёһолол үнгэргэһэн нангин хубсаһаяа тайлаад, нангин таһалга соо орхихо, тиигээд ондоо юрын хубсаһа үмдөөд, гараха ёһотой. Иигэжэ тэдэнэй нангин арюун хубсаһан бузарлагдахагүй болоно.

²⁰ Санаартад толгойгоо хундан болотороо хюһахагүй, мүн тиихэдэ үһөө дан ута болотор ургуулха ёһогүй.

²¹ Дотор хорёо руу орохын урда тээ санаартанда үзэмэй дараһан архи уухань хорюултай.

²² Үбгэнһөө һалаһан гү, али нүхэрөө гээгдэхүүлһэн эхэнэрые тэрэ һамга абаха ёһогүй. Гансал Израилиин басага гү, али нүгшэһэн ондоо санаартанай бэлбэһэн эхэнэрые тэрэ һамга абаха эрхэтэй.

²³ Нангин болон юрын, сээртэй болон арюун зүйлнүүдэй хоорондохи илгаае зондо тэрэ ойлгуулха ёһотой.

²⁴ Зарга хэрэгүүдэй гарабал, тэдэ Минии хуули ёһоор хэрэг шиидхэхэ. Тогтоол, һургаалнуудайм ёһоор тэдэ шажанай нангин һайндэрнүүдые үнгэргэхэ, амаралтын үдэр сахидаг байхые жэншэдгүй харгалзалан байха юм.

²⁵ Санаартан нүгшэһэн хүндэ гар хүрэхэ ёһогүй. Гансал өөрын эхэ, эсэгэ, үхи хүүгэдынь гү, али аха дүүнь, хадамда гараагүй эгэшэ, дүү басаганиинь лэ һаань, энэ зүбшөөгдэхэ.

²⁶ Иимэ ушарай гарабал, санаартан арюудхалгын ёһолол хэжэ, бэеэ сэбэрлэхэ, арюудхаха ёһотой. Удаань үшөө долоон хоног хүлеэгөөд,

²⁷ дотор хорёо руу ошожо, нүгэл сагааруулгын үргэл үргөөд, одоол энээнэй удаа санаартанай уялгануудые дахин дүүргэхэ эрхэтэй болохо. Энэ болбол Би, Эзэн Бурхан, айладхана мүн!

²⁸ Би хадаа тэдэнэй уг залгамжалгын хуби гээшэб. Тиимэһээ тэдээндэ Израиль соо ямаршье газар үгтэхэгүй. Би тэдэнэй хубиин газар гээшэб!“

²⁹ Талхан үргэлһөө, нүгэл сагааруулгын үргэлһөө, гарза харюулгын үргэлһөө тэдэ хүртэн байха. Мүн тиихэдэ Намда зорюулагдаһан бүхы юумэн Израиль соо тэдэнэй болохо.

³⁰ Ургаса хуряаха бүхэндөө зон эгээл түрүүшын ургасаһаа хуби санаартадта үгэхэ ёһотой. Зоной Намда үргэһэн бүхы бэлэгэй хубинь санаартадай болохо. Зон хилээмэ болгоходоо, түрүүшынгээ хүбриг санаартанда үгэдэг байха. Тиихэдэнь Би тэдэнэй гэр байрануудые үреэн үршөөн байхаб.

³¹ Өөрөө үхэһэн гү, али ан арьяатанда бажуулгаһан шубуу шонхор, амитадые санаартан эдихэ ёһогүй».