Эзэкээл 42 - Библи

Санаартадай таһалганууд

¹ Тэрэ хүтэлэгшэ намайе дахуулан, гадаа хорёо руу абаашаба. Байшангай хойто талада байгааша таһалгануудта асараа бэлэй.

² Эдэ таһалганууд зуун тохой ута, табин тохой үргэн һэн.

³ Энэ байшан нэгэ талаһаа дотоодо хорёодо оршоһон хорин тохой үргэнтэй нээлтэтэй коридорой, нүгөө талаһаа гадаа хорёогой дэбисхэрэй хоорондо байгаа бэлэй. Тэрэ гурбан дабхартай һэн.

⁴ Тэрэ таһалгануудай үүдэнүүд хойто зүг руу нээгдэдэг, арабан тохой үргэн, зуун тохой ута оролгын таһалгатай байгаа.

⁵ Дээдэ дабхарай таһалганууд дунда дабхарта орходоо уйтахан байба, юундэб гэбэл, талбайнь хэсэгые галерейнүүд эзэлбэ. Байшан доороһоо дээшээ бодоходоо нарихан боложо байба.

⁶ Гурбан дабхар таһалганууд дотор хорёогой байшангуудтал адли баханануудгүй һэн.

^7-8 Хойто зүгтэнь табин тохой утатай хана байгаа.

^9-10 Дотор хорёоһоо эдэ таһалганууд руу ошоһон үүдэн зүүн зүгтэнь байгаа. Баруун байшангай урда зүгтэ мүн лэ таһалганууд бии һэн.

¹¹ Эдэ таһалганууд хойто талын таһалгануудта тон адли, тон лэ тиимэ хэмжүүртэй, орохын урда тээ тон лэ тиимэ таһалгануудтай бэлэй.

¹² Байшангай урда талынхидал адли үүдэнүүд зүүн таладань байгаа.

¹³ Тэрэ хүтэлэгшэ намда иигэжэ хэлэбэ: – Нангин үргөөгэй хойто болон урда талануудтань байгааша таһалганууд нангин гээшэ. Эзэнэй санаартан эгээл нангин үргэлнүүдые тэндэ үргэн байха. Талханай үргэл, нүгэл сагааруулгын үргэл, гарза харюулгын үргэл тэрэ нангин газарта үргэгдэхэ ёһотой.

¹⁴ Санаартан нангин үргөөһөө газаашаа гараха болоходоо эдэ таһалганууд соо нангин хубсаһаяа һэлгэжэ, юрын хубсаһаа үмдөөд, арад зон руу гараха ёһотой.

Нангин үргөөгэй гадаа талын хэмжүүр

¹⁵ Тэрэ хүтэлэгшэ Һүмын дотоодо хорёо хэмжэжэ дүүргээд, намайе зүүн бартаануудаар гадагшань гаргажа, ханануудые тойроод хэмжэбэ.

¹⁶ Хэмжүүрэй шугамаар зүүн тала хэмжэхэдэнь, табан зуун тохой ута байба.

^17-19 Хойто, урда, баруун талануудые хэмжэхэдэнь, тус тустаа тэдэ табан зуун тохой ута байгаа.

²⁰ Иигэжэ нангин үргөө дүрбэн талаһаа тэб тэбхэр, алишье хажууһаа табан зуун тохой байба. Хананууд иигэжэ нангин зүйлые нангин бэшэһээ илгадаг бэлэйл.