Эзэкээл 41 - Библи

¹ Удаань хүтэлэгшэ намайе Һүмын дотоодо үргөө руу оруулба. Хаалгын хоёр таладахи гадаада хажуу ханануудай үргэниие хэмжэхэдэнь, зургаан тохой үргэнтэй гэжэ элирбэ.

² Дотоодо үргөөдэ орохо үүдэн арбан тохой үргэнтэй байба. Үүдэнэй хоёр хажуудахи хананууд тус тустаа табан тохой утатай байба. Тэрэ гол үргөө дүшэн тохой утатай, хорин табан тохой үргэнтэй гээд элирбэ.

^3-4 Тэрэ таһалгын гүн руу алхалан ошоод, «энэ хамагай нангин газар», – гэжэ хэлэбэ.

⁵ Тэрэ нангин үргөөгэй дотор хана хэмжэбэ: зургаан тохой зузаан гээд элирбэ. Ханын гадаа талаар тойруулан дүрбэн тохой үргэн таһалганууд байгаа.

⁶ Гурбан шугамда тус тустаа гушан таһалгатай, шугам бүхэн нангин үргөөгэй ханануудай хажуугаар хэгдэһэн табсан дээрэ бэлэй.

⁷ Нангин үргөөгэй хананууд доогуураа дээдэхидэ орходоо бүри зузаан байгаа. Дээдэ таһалгануудые доодотой сасуулбал, үргэн һэн. Доодо һууриһаа дээдэ шугам руу дунда шугамаар дамжан ошохоор һэн.

⁸ Нангин үргөө гэбэл, зургаан томо тохой үндэр һуури дээрэ баряатай һэн. Тэрэ һуури дээрэ үнөөхи таһалганууд мүн лэ оршогшо бэлэй.

⁹ Таһалгануудай гадаа хананууд табан тохой зузаан һэн. Нангин үргөө тойроод сүлөө газар бии бэлэй.

¹⁰ Тэрэ сүлөө газарһаа дүтын байшан хүрэтэр хорин тохой һэн.

¹¹ Зарим таһалганууд руу хойто зүгһөө, нүгөөдэ таһалганууд руу урда зүгһөө үүдэнүүд байгаа. Таһалгануудай хажуугаар байгааша сүлөө газар хүндэлэндөө табан тохой һэн.

Нангин үргөө

¹² Нангин үргөөһөө баруулжаа ондоо байшан байгаа. Тэрэ далан тохой үргэнтэй, ерэн тохой утатай, бүхы ханануудынь зузаанаараа табан тохой бэлэй.

¹³ Хүтэлэгшэ нангин үргөөгэй утые хэмжэбэ, зуун тохой утатай гэжэ элирбэ. Нангин үргөөгэй ханаһаа эхилээд, сүлөө газараар саашаа, хажуудань оршодог байшан хүрэтэр мүн лэ зуун тохой байба.

¹⁴ Зүүн тээһээ Һүмэ орохо хаалгын урда тээхи талбай үргэнөөрөө баһал зуун тохой байба.

¹⁵ Һүмын хойто талада оршоһон байшан тэрэнэй хэмжэхэдэ, мүн лэ зуун тохой бүридүүлбэ. Нангин үргөөгэй үүдэнэй таһалга, мүн үргөөгэй досоонь

¹⁶ шалаһаа сонхо хүрэтэр модоор бүглэгдэнхэй, сонхонуудынь хаагданхай байгаа.

¹⁷ Үүдэнэй тотогоһоо дээгүүр мүн лэ модон хабтаһан, харин үргэлжэ тойроод нангин үргөө соо, мүн газаа ханануудаарнь һиилэгдэһэн дүрсэнүүд бии һэн.

¹⁸ Ямар дүрсэнүүд бэ гэхэдэ, херүүбүүд болон пальма модон һиилэгдэнхэй бэлэй. Хоёр херүүбэй хоорондо пальма, херүүб бүхэн хоёр нюуртай.

¹⁹ Хүнэй нюурынь нэгэ пальма руу, арсалангай нюурынь нүгөө пальма руу харанхай бэлэй. Һүмын досоо тойроод тиигэжэ хээтэй һэн.

²⁰ Шалаһаа үүдэнэй тотого хүрэтэр һиилэгдэһэн иимэ дүрсэнүүд дүүрэн байгаа.

²¹ Һүмын үргөөгэй үүдэнэй тотогын түхэл дүрбэн үнсэгтэй байба. Минии харахада, хамагай нангин газарай үүдэнэй урда

Үргэлэй шэрээгэй хэмжүүр

²² үргэлэй модон шэрээ байгаа. Тэрэ хоёр тохой утатай ба үргэнтэй, гурбан тохой үндэр хэмжүүртэй, углуунуудынь, һууринь, хажуу талань модоор бүтээгдэнхэй бэлэй. «Энэ хадаа Эзэн Өөрынгөө нангин үргөө тушаа хододоо һанаагаа табина гэһэн һануулга гээшэ», – гэжэ хүтэлэгшэ хэлэбэ.

²³ Нангин үргөөгэй гол таһалга руу, мүн хамагай нангин газар руу тус тустаа хоёр үүдэн байдаг һэн.

²⁴ Үүдэн бүхэн хоёр хабтагайһаа бүридэдэг, тэдэ хабтагайнууд нээгдэжэ хаагдажа байдаг бэлэй.

²⁵ Гол таһалга руу ошоһон үүдэн дээрэ, хана тойроод байгаашадал адли, херүүбүүдэй болон пальмануудай дүрсэнүүд һиилэгдэнхэй һэн. Газаагуур, үүдэнэй урда модон дэбисхэр хэгдэнхэй байгаа.

²⁶ Үүдэнэй хоёр хажуугаар сонхонууд, тэдэ пальма модоной һиилэгдэнхэй түхэл янзаар гоёогдонхой бэлэй.