Эзэкээл 39 - Библи

Гоог диилдэхэ

¹ – Хүнэй үри Эзэкээл! Гоогые шүүмжэлжэ, иигэжэ тэрээндэ дуулга: Мээшэх болон Тубаалай ноёншье һэн гэлэйш, харин Би, Эзэн, шинии урдаһаа тулахаб!

² Ондоо зүг шэг руу шамайе хотируулжа, холын хойто зүгһөө Израилиин хада ууланууд руу хүтэлэн абаашахаб.

³ Зүүн гарһааш һурша номыеш, баруун гарһааш годлинуудыеш ходолон хаяхаб!

⁴ Ши сэрэгтэеэ, мүн шинии түлөө хүлһөөр дайлалдажа байгааша хариин сэрэгшэдтэеэ хамта тэрэ хада ууланууд дээрэ үхэлөө олохош. Иигэжэ ан арьяатанай, шубуу шонхорой хүнэһэн болохош.

⁵ Хээрэ талада алдалан унахат. Энэ хадаа Би, Эзэн Бурхан, айладхана мүн!

⁶ Магоог орон нютагые галдахаб, далайн эрьеэр хашалгүй ажаһуугша арад зон руу түймэр табихаб. Тиихэдэм тэдэ Намайе Эзэн гээд мэдэхэ.

⁷ Минии арад түмэн Израиль Намайе мэдэдэг болохо, тиигээд нангин нэрыем бэшэ бузарлахаа болихо. Дэлхэйн арадууд Намайе Израилиин нангин Эзэн Бурхан гээд ойлгохо.

⁸ Минии, Эзэн Бурханай, иимэ юумэн болохо гэжэ айладхаһан тэрэ үдэр дүтэлөө.

⁹ Тэрэ үдэрэй мандахада, Израилиин хотонуудаар улад зон үхэһэн дайсадайнгаа дайнай зэбсэг суглуулжа, түлеэн мэтээр шатааха. Бамбай ба хуяг, һурша ном ба годли, мунса ба жада долоон жэлэй туршада шатахаар олон байха.

¹⁰ Модо отолжо, түлеэ суглуулжа байхын орондо тэдэ энэ зэбсэгүүдые шатааха. Дээрмэдэгшэдээ дээрмэдэхэ, тоногшодоо тэдэ тонохо. Энэ болбол Би, Эзэн Бурхан, айладхана мүн!

Гоогые хүдөөлүүлхэ

¹¹ Эдэ бүгэдын тохёолдоһоной удаа Гоогые сэрэгтэйнь хамта Израильда, Дабһата далайһаа зүүлжээ, Аяншадай набтар нюруу газараар хүдөөлүүлхэб. Угаа үргэн газарые хүүрнүүдэй эзэлһэн ушар тэрээгүүр гарааша зондо һаад түбэг болохо, тэрэ газар «Гоогой сэрэгэй набтар нюруу» гээд нэршэхэ.

¹² Израилиин улад зон долоон һарын туршада үхэһэн зониие хүдөөлүүлжэ, газараа сэбэрлэжэ байха.

¹³ Дэлхэйн бүхы зон тэдэниие хүдөөлүүлхэдэ туһалха, Минии, Эзэн Бурханай, алдар солын мандаһан тэрэ илалтын үдэр тэдэ шагнал хайрада хүртэхэ.

¹⁴ Газар дээрэ хүдөөлүүлэгдөөгүй хэбтээшэ хүнэй һэе бэдэрхэ үүргэтэй зон долоон һарын һүүлээр томилогдохо. Газар сэбэрлэхын тула энэ хэгдэхэ.

¹⁵ Тэдэ зон хүнэй яһа олобол, хажуудань тэмдэг табидаг байха. Тиихэдэнь хүдөөлүүлэгшэд тэрэниие «Гоогой сэрэгэй набтар нюрууда» хүдөөлүүлхэ.

¹⁶ Тэрэ газар «Гоогой сэрэг» гээдшье мүн лэ нэршэхэ. Ииһээр газар дахин сэбэр болохо.

¹⁷ Хүнэй үри Эзэкээл, Минии таанадта гаргажа бэлдэһэн тахилда бүхы оршон тойронһоо ерэхыень ан арьяатаниие, шубуу шонхорые дууда. Энэ хадаа Израилиин хада ууланууд дээрэ аргагүй ехэ зоог болохо, тэндэ тэдэ мяха эдихэ, шуһа уухал.

¹⁸ Сэрэгшэдэй болон дэлхэйн удамаршадай мяха шуһаар зоог болохо. Хони хурьгаар, ямаагаар, тарган буруун бухануудаар үргэл хэдэгтэл, Би тэдэнээр үргэл хэхэб.

¹⁹ Шубуу шонхор, ан арьяатан садатараа Минии үргэһэн тахилай өөхэ эдихэ, һогтотороо шуһа ууха.

²⁰ Минии шэрээгэй саана тэдэ моридоор, тэдэниие унажа ябааша сэрэгшэдээр, бусадшье сэрэгшэдээр садатараа зооглохо. Энэ болбол Би, Эзэн Бурхан, айладхана мүн!

Израиль һэргээгдэхэ

²¹ Минии хэһээлтые дэлхэйн арадууд хаража, алдар солымни һаргама хурсые мэдэрхэ.

²² Тэрэ гэһэнһээ хойшо Израилиин арад түмэн өөһэдэйнь Эзэн Бурхан Минии байһые мэдэдэг болохо.

²³ Минии урда нүгэлтэй байһандаа израильшууд сүлэгдөө гэжэ хариин зон ойлгохо. Би тэдээнһээ буруу хаража, дайсадай добтолон орон хюдахыень зүбшөөгөө һэм.

²⁴ Муу муухай хэрэгүүдэйнь, хуули ёһонуудые хазагайруулһанайнь түлөө Би тэдээнһээ буруу хаража, эдэ бүгэдые ушаруулааб.

²⁵ Харин мүнөө Израилиин арад түмэндэ нигүүлэсхыгээр хандажа, таран сасагдаһан арадуудайнь дундаһаа бусаахаб. Яковай үри һадаһадые үреэжэ, нангин байһанаа гэршэлхэб.

²⁶ Тэдэ аюулгүй амгалан орон нютагтаа ажаһуужа эхилхэдээ муу муухай хэрэгүүдээ, Намда урбадаг байһанаа һанажа, эшэхэ.

²⁷ Бусад арадуудай дундаһаа, дайсадуудай орон нютагуудһаа тэдэниие суглуулан асаржа байһыем дэлхэйн арадууд хаража, Минии нангин байһые ойлгохо.

²⁸ Хариин арадуудай дундуур Өөрын арад зониие тараажа, удаань дахин суглуулаад, нэгыеньшье үлөөнгүй гэртэнь бусаахадам, Минии арад түмэн өөһэдынь Эзэн Бурхан байһыем мэдэрхэ.

²⁹ Израилиин улад зон руу Өөрын Һүлдэ шэнгээн оруулхаб, бэшэ буруу харахаяа болихоб. Энэ болбол Би, Эзэн Бурхан, айладхана мүн!