Эзэкээл 37 - Библи

Араг яһан дахин амидырха

¹ Эзэн намайе Өөрынгөө гараар хүрэжэ, араг яһаар дүүрэшэһэн нюруу газар руу Һүлдэнь намайе абаашаба.

² Эзэн намда тойроод бүхы юумэ харуулба. Угаа олон хатаһан яһа хаа-хаанагүй обёороо һэм.

³ Тэрэ намһаа: – Хүнэй үри Эзэкээл, эдэ яһанууд дахин амидыржа шадаха гү? – гэжэ асууба. – Эзэн Бурхан, гансал Та энээниие мэдэнэт, – гэжэ би харюусаа һэм.

⁴ Тиихэдэм Тэрэ иимэ юумэ тунхаглахыем захираа һэн: – Хатаһан араг яһанууд, Эзэнэй айладхал шагнагты.

⁵ Таанад руу ами оруулхадам, амидырхат.

⁶ Арһа шүрбэһөөр, шандааһаар таанадые бүглэхэб, таанадта ами оруулхаб, тиихэдэм Намайе Эзэн гээд мэдэхэт гэжэ Эзэн Бурхан айладхана.

⁷ Захирһанайнь ёһоор би лүндэн табижа эхилбэб. Лүндэн табижа байха үедэм хангирха абяан дуулдажа, яһанууд бэе бэетэеэ хамта боложо эхилбэ.

⁸ Хараһаар байтарни шүрбэһэн, шандааһан, удаань арһан тэдэ яһануудые хушаа бэлэй. Гэбэшье амин тэдэ яһануудта үгы һэн.

⁹ Эзэн намда иигэжэ айладхаба: – Хүнэй үри Эзэкээл, дүрбэн талаһаа һалхилжа, эдэ үхэһэн бэенүүд руу ами оруулхыень һалхинда Намайе захирна гээд дуулга. Тиихэдэ тэдэ амидырха.

¹⁰ Захирһанайнь ёһоор лүндэн табибаб. Һалхин тэдээн руу үлеэжэ, тэдэ амидыршаба! Тиигээд бодожо, агууехэ сэрэг гэхээр олон болоо һэн.

¹¹ Эзэн намда иигэжэ айладхаба: – Хүнэй үри Эзэкээл! Израилиин улад зон эдэ яһануудта адли. Хатаа үхөөбди, ямаршье ерээдүй, ямаршье найдалгүй ажаһуунабди гэлсэнэ.

¹² Би хүүрнүүдые нээжэ, таанадые тэндэһээ гаргажа, Израилиин орон нютаг руу абаашахаб гэжэ Намайе, Эзэн Бурханиие, айладхана гээд тэдээндэ дуулга.

¹³ Энээнэй бэелүүлэгдэжэ эхилхэдэ Намайе Эзэн гээд тэдэ ойлгохо.

¹⁴ Өөрын амисхал тэдээн руу оруулжа, амидыруулхаб, өөрынь орон нютагта бусаахаб, тиихэдэм Намайе Эзэн гээд тэдэ ойлгохо. Айладхаһанаа заабол бэелүүлдэгби. Энэ болбол Би, Эзэн, айладхана мүн!

Иуда болон Израиль дахин хамтарха

¹⁵ Эзэн намда иигэжэ айладхаба:

¹⁶ – Хүнэй үри Эзэкээл! Хабтагай модо абажа, «Иудын хан түрэ болон тэрээнтэй эбтэй Израилиин үри һадаһад» гэжэ дээрэнь бэшэ. Нүгөөдэ хабтагай модо абаад, «Иосифой хан түрэ болон тэрээнтэй эбтэй Израилиин үри һадаһад» гээд мүн лэ бэшэ.

¹⁷ Тиигээд тэдэ модоо нэгэ модон мэтэ байхын тула хамта болгон гартаа бари.

¹⁸ «Энэ ямар удхатайб?» гэжэ арад зонойнгоо асуухада,

¹⁹ Минии, Эзэнэй, Иосифой, мүн тэрээнтэй эбтэй Израилиин обогуудай хабтагай модо абажа (мүнөө тэрэ хабтагай Эпрааимай обогой гарта ороод байна), Иудын обогой хабтагай модонтой хамтадхан, нэгэ модон болгожо, гартаа баряад байха тухай хэлээрэй.

²⁰ Эдэ бэшээтэй хоёр модо хүн бүхэнэй харахаар баряад,

²¹ Минии иимэ үгэнүүдые тэдээндэ тунхагла: «Би, Эзэн Бурхан, Израилиин улад зониие тарагша хариин гүрэнүүдһээнь суглуулжа, өөрынь газар уһан руу бусаахаб.

²² Тэдэниие нэгэ яһатан болгон хамтадхаад, Израилиин хада ууланууд дээрэ ажаһуулгахаб. Ганса хаантай тэдэ байха, хоёр яһатан, хоёр хан түрэ боложо бэшэ таһархагүй.

²³ Тэдэ саашадаа онгонуудта мүргэхэеэ болихо. Нүгэлыень арюудхажа, бузарһаа тэдэниие аршалхаб. Тэдэ Минии арад түмэн, Би тэдэнэй Бурхан болохоб.

^24-25 Минии албатан Давидай үри һадаһан хододоо тэдэнэй хаан байха, хонид тушаа хонишоной һанаагаа зободогтол Тэрэ зоноо харууһалан байха. Израилиин арад түмэн Минии хуули ёһонуудые сахин дүүргэхэ. Яков албатандаа Минии үгэгшэ орон нютагта элинсэг хулинсагтал адляар тэдэ ажаһууха. Үри һадаһадыньшье хэтэ мүнхэдөө тэндэ амидырха.

²⁶ Амгалан тайбан байдалаар Израилиин улад зониие хэтэ мүнхэдөө үршөөн үреэн байхаб гэжэ найдуулан, хэлсээ баталнаб. Тэдэниие аршалжа, угаа олон зонтой яһатан болгохоб. Минии Һүмэ орон нютагтань хэтын хэтэдэ оршохо.

²⁷ Иигэжэ Би арад түмэнэйнгөө дунда оршохоб, Бурханиинь болохоб, харин тэдэ Минии арад болохо мүн.

²⁸ Һүмымни Израильда оршодогые, Өөрын арад түмэн болгон Израилиин улад зониие шэлэн абаһыем дэлхэйн бүхы арадууд мэдэхэ».