Эзэкээл 35 - Библи

Сэһиир нютаг хооһорхо

¹ Эзэн намда иигэжэ айладхаба:

² – Хүнэй үри Эзэкээл, Сэһиирэй зониие шүүмжэлэ.

³ Тэдээндэ Минии иигэжэ айладхаһые хэлэ: Би, Эзэн Бурхан, урдаһаатнай тулахаб! Орон нютагыетнай хубхай хооһон тала болгохоб!

⁴ Хотонуудыетнай һандаргаахаб, газар дайдатнай хооһорхо, тиихэдэ Намайе Эзэн гээд мэдэхэт.

⁵ Эдоомой улад зон, Израилиин арад түмэнтэй үни заяанһаа хойшо дайсад бэлэйт. Тэдээнтэй гай тодхорой тохёолдоходо юушье хээгүй, миин лэ хаража байгаат.

⁶ Би, Эзэн Бурхан, Өөрөөрөө тангаригланаб: алахадаа бэрхэ хадаш өөрыешни үхэл хатал һалан һандангүй хойноһоош дахаха.

⁷ Сэһиир оронииетнай зэлүүд хооһон болгожо, дээгүүрнь гарааша амитан бүхэниие алахаб.

⁸ Үхэһэн зонойтнай бэенүүд хада уула, гол нюруу дүүрэн болохо.

⁹ Газар уһантнай хэтэ мүнхэдөө хооһон байха, хотонуудаартнай хэншье дахин ажаһуухагүй. Эгээл тиихэдэ Намайе Эзэн гэжэ ойлгохот.

¹⁰ Иудын хан түрэ болон Израиль манай болохо, газарыень эзэмдэн ажаһуухабди гээд хэлээ бэлэйт. Харин Би, Эзэн, тэдэнэй Бурхан байнаб.

¹¹ Өөрөөрөө тангаригланаб: Минии арад түмэниие үзэн ядадаг, атаархадаг байһанайтнай хэмээр Би өөһэдыетнай хэһээхэб! Таанадые хэһээжэ байһыемни Израилиин улад зон хараха.

¹² Израилиин орон нютагай һалажа хооһоржо байһан тушаа баһажа хэлэһыетнай Минии шагнаһые таанад ойлгохот.

¹³ Нам тушаа ехэрхэжэ бардамлажа хэлэхыетнай Би шагнаһан байнаб.

¹⁴ Таанадые һалгаажа байхадам, дэлхэйн бүхы зон баярлаха.

¹⁵ Израилиин һалан һандаржа байхада баясажа байгаа бэлэйш. Тон тиимэ юумэн шамтай тохёолдохо: Сэһиирэй хадалиг улас, хамаг Эдоом орон нютаг хооһорон һандарха. Тиихэдэ хүн бүхэн Намайе Эзэн гээд ойлгохо.