Эзэкээл 33 - Библи

Эзэкээл – арад зоноо һэргылэгшэ мүн

¹ Эзэн намда иигэжэ айладхаба:

² – Хүнэй үри Эзэкээл, арад зоноо иигэжэ һэргылэ: Ямар нэгэн орон нютагта дайн дажар ушаруулба гэлэйб. Тэрэ ороной зон хэн нэгэеэ харуулшан болгон томилбо гэел даа.

³ Дайсанай ерэжэ байһые обёорходоо, тэрэ бүреэгээр үлеэжэ, улад зониие һэргылхэ ёһотой.

^4-5 Бүреэгэй абяа дуулаһаншье һаа, һэргылээгүй, өөрыгөө абархаяа оролдоогүй хэн нэгэн хосорһонойнгоо түлөө өөрөөл гэмтэй болохо.

⁶ Харин тэрэ харуулшан дайсанай дүтэлжэ байһые хараашье һаа, улад зониие һэргылэн бүреэгээр үлеэбэгүй гэел даа. Дайсанай ерэжэ, нүгэлтэй зонииень алахада, тэдэнэй хосорһондо харуулшан лэ зэмэтэй гээд Би тоолохоб.

⁷ Хүнэй үри Эзэкээл, Израилиин арад түмэнэй харуулшанаар Би шамайе томилноб! Минии айладхал шагнаад, ши тэдэниие һэргылэн бай.

⁸ Муу хүниие үхэхэ гэжэ айладхахадам, тэрэ өөрын лэ нүгэлэй түлөө үхэхэ. Нүгэлтэ ябадалаа орхихо тухайнь тэрэниие һэргылээгүй гээшэ һаа, ши, Эзэкээл, үхэһэндэнь зэмэтэй болохош.

⁹ Харин һэргылхэдэш, тэрэ нүгэл үйлэдэһэн зандаа байгаа гээшэ һаа, өөрынгөө хэһэн нүгэлэй түлөө хосорхо. Ши зэмэгүйдэ тоологдохош.

¹⁰ Хүнэй үри Эзэкээл, нүгэлэйнгөө түлөө угаа ехээр хэһээгдээбди гэжэ Израилиин улад зон гомдоно. Тэдэ саашадаа амиды мэндэ байхамнай хэлсээтэй гээд маргана.

¹¹ Би амиды мэндэ Эзэн Бурхамби, нүгэлтэй зоной хосорхые хүсэнэ бэшэб, муу ябадалаа орхижо, амиды мэндэ байхыень хүсэнэб. Израилиин улад зон амиды мэндэ байхаяа хүсэбэл, нүгэл хэхэеэ болёод, Нам руу эрьехэ ёһотой.

¹² Хүнэй үри Эзэкээл! Һайн зоной нүгэл хэжэ эхилхэдэ, урдань үйлэдэһэн һайн хэрэгүүдынь хэһээлтэһээ тэдэниие абарха бэшэ. Муу зон нүгэл хэхэеэ болиходоо сагааруулагдаха, хэһээлтэ амасахагүй.

¹³ Һайн зондо амиды мэндэ байхат гэжэ найдуулхадам, тэдэ һайн гэжэ тоологдоһондоо найдажа, саашадаа нүгэл үйлэдэжэ эхилээ гээшэ һаа, үхэхэ. Урдань хэһэн һайн хэрэгүүдынь тэдэниие абархагүй.

¹⁴ Муу хэрэг үйлэдэгшэдэ «үхэхэш» гэжэ айладхахадам, тэрэ нүгэл хэхэеэ болижо, һайн, үнэн юумэ үйлэдэжэ эхилбэ гэел даа.

¹⁵ Жэшээнь, бариса гэжэ абаһан, үгышье һаа, тоноһон юумэ бусаажа, муу хэрэг үйлэдэнгүй, Минии хуулинуудые сахин байгаа гээшэ һаа, тэрэ амиды мэндэ үлэхэ.

¹⁶ Нүгэлынь арюудхагдаха, һайн, үнэн юумэ тэрэ хэжэ эхилээ, тиимэһээ амиды мэндэ байха.

¹⁷ Эзэкээл, зарим зонтнай Намайе буруу юумэ хэнэ гээд тоолодог. Харин тэдэ өөһэдөө буруу гээшэ!

¹⁸ Һайн хүн муу юумэ хэжэ эхилээ һаа, тэрэнэйнгээ түлөө хосорхо.

¹⁹ Муу хүн нүгэл үйлэдэхэеэ болижо, һайн, үнэн хэрэг хэжэ эхилээ һаа, амиды мэндэ үлэхэ.

²⁰ Израилиин улад зон Намайе буруу гэжэ тооложо байна. Хэһэн хэрэгэйнь хэмээр тэдэниие шүүбэрилхэб!

Иерусалимые дайсадай эзэлһэн тушаа мэдээсэл

²¹ Вавилоон руу сүлэгдэһэнэймнай удаа арбан хоёрдохи жэлэй ябажа байхада арбадахи һарын табанда Иерусалимһаа тэрьедэгшэ нэгэн намда ерэжэ, хотын эзэлэгдэһэн тушаа дуулгаба.

²² Тэрэнэй үшөө ерэхын урда үдэшэлэн Эзэн намайе мэдэл дороо абажа, тэрэ хүнэй үглөө үглөөгүүрынь ерэхэдэ, би үгэ айладхаха хүсэ шадалтай болоод байгааб.

Израильда үлэһэн зоной саашанхи хуби заяан тухай

²³ Эзэн намда иигэжэ айладхаа:

²⁴ – Хүнэй үри Эзэкээл! Израилиин һандарагша хотонуудаар ажаһуугша зон «Абраһаам гансаараа энэ газар абаа бэлэй, харин бидэ оломди, тиимэһээ энэ газар манай байха ёһоороо манай мүн» гэжэ хэлсэнэ.

²⁵ Эзэкээл, тэдээндэ Минии, Эзэн Бурханай, иимэ айладхал дуулга: таанад мяха шуһатайнь хамта эдинэт, онгонуудта мүргэнэт, алалсаа, хүсэрхэлгэ үйлэдэнэт. Иимэ байхадатнай, газар яагаад танай байха юм?!

²⁶ Һэлмэ далайн, хүсэрхэлгэ үүдхэнэт, жэгшүүритэй муухай хэрэг үйлэдэнэт. Ондоо хүнэй һамгантай унтанат. Иимэ байгаад, газар эзэмдэн байхаяа һананат!

²⁷ Би, Эзэн Бурхан, Өөрөөрөө тангаригланаб: һандарһан хотонуудаар ажаһуугша таанад дайн дажарта алуулхат, хүдөө талаар ажаһуугшадтнай ан арьяатанай хүнэһэн болохо, агы нүхэндэ, хабсагай хадаар амидарагшадтнай тахал үбшэнһөө үхэхэ.

²⁸ Орон нютагые зэлүүд хооһон болгохоб, омогорходог хүсэ шадалыетнай бууруулхаб. Израилиин хада ууланууд хооһон болохо, хэншье тэрээгүүр ябажа шадахагүй.

²⁹ Жэгшүүрилтэй муухай хэрэгүүдэйтнай түлөө таанадые хэһээжэ, газарыетнай амигүй хооһон элһэн сүл губи болгоходом, Намайе Эзэн гээд мэдэхэт.

Лүндэншын хэлэһые дүүргэнэгүй

³⁰ Хүнэй үри Эзэкээл, танай арад зон Вавилоондо байһан мүнөө үе сагтаа хотын хэрэм ханануудай гү, али гэрэй үүдэндэ уулзахадаа шам тушаа хөөрэлдэнэ. «Эзэнэй мүнөө юун гэжэ айладхаһые Эзэкээлһээ асууя» гээд тэдэ хэлсэнэ.

³¹ Тиигээд тэдэ сугларан шамда ерэжэ, хэлэһыешни шагнана, гэбэшье соносоһоноо дүүргэнэгүй. Гансал үгэнүүд. Харин өөһэдөө тэдэ ашаг олзын түлөө мэхэлхэдээ һэншье гэхэгүй.

³² Тэдээндэ ши аятай һайханаар дуу дуулагша гү, али һайнаар хүгжэм гарган наадагша мэтэш. Шамайе шагнабашье, хэлэһыеш тэдэ дүүргэнэгүй.

³³ Тэдэниие һэргылээш, харин тэдэ хэлэһыеш дүүргээгүй, тиимэһээ удаан болонгүй хэһээлтэ амасаха, тиихэдээ лүндэншэ манай дунда байгаа гэжэ ойлгохо.