Эзэкээл 31 - Библи

Египедэй фараоной эсэс аймшагтай байха

¹ Вавилоон руу сүлэлгэдэ туугдаһанаймнай удаа арба нэгэдэхи жэлэй ябажа байхада гурбадахи һарын түрүүшын үдэр Эзэн намда иигэжэ хандаба:

² – Хүнэй үри Эзэкээл! Египедэй фараондо болон албатандань иигэжэ дуулга: шамдал адли хүсэ шадалтай хэншье байхагүй. Мүнөө нэгэ иимэ түүхэ шагна.

³ Ассиритэй сасуулха гү? Бата бэхи, һаглагар мүшэртэй, угаа үндэр, оройнь үүлэн дунда байһан хуша модон Ливаанда нэгэтэ байгаа бэлэй.

⁴ Уһан тэрэниие ундалуулан ургуулжа, газарай гүн тэрэниие үндылгөө. Хажуугаарнь урдагша гол горход ойн бүхы мододые ундалуулдаг һэн.

⁵ Харин энэ модон бусад мододһоо үндэр болоо, гэшүүһэдынь олон, мүшэрнүүдынь ута бэлэй.

⁶ Гэшүүһэд дээрэнь жэгүүртэн уурхай зохёожо, мүшэрнүүд доронь ан арьяатан түрэжэ, дэлхэйн олон арадууд һүүдэртэнь ажамидардаг һэн.

⁷ Угаа һайхан модон бэлэй: ута һаглагар мүшэртэй, үндэр, газарай гүн уһан хүрэтэр үндэһэниинь ошодог һэн.

⁸ Минии сэсэрлиг соо ямаршье хуша модон тэрээнтэй зэргэсэхэгүй. Ямаршье нарһан тэрээндэл адли гэшүүһэгүй, ямаршье агар модон тэрээндэл адли мүшэргүй, юрэдөө, Минии сэсэрлигэй ямаршье модон гоё һайханаараа тэрээндэ хүрэхэгүй һэн.

⁹ Би тэрэниие олон һайхан мүшэрнүүдтэй болгооб, Эдээмэй Минии сэсэрлигэй бүхы модод тэрээндэ атаархадаг бэлэй.

¹⁰ Мүнөө Минии, Эзэн Бурханай, тэрэ модон тушаа иигэжэ айладхаһые шагна, Египедэй фараон: үүлэн хүрэтэр үндэр болоходоо тэрэ модон бардамлажа эхилбэ.

¹¹ Тиимэһээ Би тэрэниие буруу гэжэ гэмнээд, муу муухай ябадалайнь түлөө хэһээхыень хариин хаанда дамжуулааб.

¹² Хариин хэрзэгы зон тэрэниие отолжо, унаһан газартань орхибо: гэшүүһэдынь, мүшэрнүүдынь хада уулаар, нюруу газараар унан тараа. Тэрэнэй һүүдэртэ амидарагша зон бултадаа тэндэһээ холодон ошобо.

¹³ Унаһан модоной түгсүүл дээрэ шубуу шонхор байрлаба, гэшүүһэдээрнь ан арьяатан гэшхэн гүйлдэбэ.

¹⁴ Уһаар оройдоошье дутангүй ургаашье хадаа ямаршье модон иимэ үндэр болохоёо, оройгоо үүлэд хүрэтэр үргэхэеэ бэшэ һанахагүй. Зоной нүгшэжэ, үхэлэй орон руу ошоһондол модон бүхэн мүн лэ һалаха юм.

¹⁵ Тэрэнэй үхэлэй орон руу шэглэхэдэ Би, Эзэн Бурхан, тэрэ үдэрые гашуудалай үдэр болгохоб, гүн уһанда, гол горходто захирхадамни, тэдэ урдахаяа болёод байха. Ливаанай хада ууланууд гашуудан, харанхы бүрэнхы болохо. Хээрэ талын хамаг модод хатажа эхилхэ.

¹⁶ Тэрэ модоной шууяа гарган унажа, Эдээмэй Минии тэрэниие үхэлэй орон руу шэглүүлхэдэ, дэлхэйн үндэһэ яһатад айн шэшэрэлдэхэ. Үхэлэй орондо оршогшо модод – Минии сэсэрлигэй болон Ливаанай эрхим модод тэрэ модоной унахада сэдьхэлээ ханаха, баясаха.

¹⁷ Тэрэ модоной һүүдэртэ амидарагша зон мүн лэ үхэлэй орон руу ошоо.

¹⁸ Египедэй фараон! Эдээмэй сэсэрлигэй али модонтой ши алдар солоороо, һүр жабхалангаараа зэргэсэхэ аргатайбши? Иимэ ушар шамтай болон улад зонтойш тохёолдохо. Дэлхэйн зонһоо эгээл хүсэтэй, үндэр байхадаш шамайе тэрэ модонтой жэшэхээр бэлэй. Эдээмэй Минии сэсэрлигэй мододой үхэн хатадагтал ши мүн лэ үхэхэш, үхэлэй орон руу эльгээгдэхэш, Бурхан гэжэ мэдэхэгүй, мүн дайн дажарта алуулһан зоной дунда хэбтэхэш. Энэ болбол Би, Эзэн Бурхан, айладхана мүн!