Эзэкээл 30 - Библи

Египет зэлүүд хооһон тала болохо

¹ Эзэн намда иигэжэ айладхаба:

² – Хүнэй үри Эзэкээл, лүндэн табижа, Египедэй арад түмэндэ иигэжэ дуулга: Бархиржа байгаад хашхаралдагты!

³ Хилэнсэгтэ үдэр дүтэлөө, Эзэнэй хэһээлтэ амасуулха үдэр! Үндэһэ яһатадай хосорхо бүрэнхы саг дүтэлбэ.

⁴ Египедтэ дайн дажар болохо, Эфиопидо гай тодхор ушарха. Египедэй зон, таанад алуулхат, эд баялигтнай тоногдон абтаха, гэр байратнай һандарха.

⁵ Эфиопи, Ливи, Лидиһээ, Аравиһаа, Хүүбһээ, мүн тиихэдэ Хэлсээ баталһан оронһоо хүлһэлэн абагша сэрэгшэд дайн дажарта алдалан унаха.

⁶ Таанадые аршалагшад бултадаа – хойто зүгэй Мигдоолһоо эхилээд, урда зүгэй Сиһээн хото хүрэтэр дайн дажарта алуулагдаха. Омогорходог хүсэтэй сэрэгтнай һалаха. Энэ болбол Би, Эзэн Бурхан, айладхана мүн!

⁷ Газар дайдатнай дэлхэйн эгээл эзэгүй хооһон газар болохо, хотонуудтнай эгээл ехээр һандаранхай байха.

⁸ Танай орон газарые Би шатаахаб. Аршалагшадтнай бүгэдэ хосорхо. Тиихэдэл таанад Намайе Эзэн гээд мэдэрхэт.

⁹ Египедые хэһээжэ байһан тэрэ үдэртөө дүтэлжэ байгша гай тодхор тушаа соносхохыень Би юушье мэдээгүй, хашалгүй Эфиопиин улад зон руу элшэнэрые далайн онгосоор эльгээхэб. Тэдэ угаа ехээр һүрдэхэ.

¹⁰ Египедэй улад зон, таанад угаа олонта. Гэбэшье Вавилооной Навуходоносор хааниие эльгээжэ, таанадые үсөөрүүлхэб.

¹¹ Тэрэ хэрзэгы шэрүүн сэрэгтэеэ хамта танай орон нютаг руу орожо, хооһолхо, һэлмэ далайн таанадта добтолоод, үхэһэн бэеэртнай дэлхэй дүүргэхэ.

¹² Нил мүрэниие хатаахаб, муу муухай зоной мэдэлдэ Египедэй газар уһа дамжуулхаб. Хариин зониие эльгээжэ, газарыетнай зэлүүд хооһон болгохоб. Энэ болбол Би, Эзэн, айладхана мүн!

¹³ Эзэн Бурхан Египедэй зондо иигэжэ айладхана: – Ноодто байгша онгонуудые болон хүрэгүүдые үгы хэхэб. Египедые хүтэлбэрилэн зонхилхо хүн танай дунда бэшэ олдохогүй. Ииигэжэ таанад бултадаа угаа ехээр һүрдэн айхат.

¹⁴ Патроос хотые һандаргахаб, Цооһаниие галдахаб. Ниислэл хото Тэбээс мүн лэ һандаргагдаха.

¹⁵ Египедэй хэрэм хото болохо Сииндэ уур сухалаа үзүүлхэб, Тэбээсэй олон зониие үсөөрүүлхэб.

¹⁶ Египедые галдахаб, Сиин амяа табин шэшэрэн байха, Тэбээс хото һандарха, Ноодой зон дайсадһаа хододоо айжа байха.

¹⁷ Оон болон Пи-Бээшэт хотонуудай залуу сэрэгшэд дайн дажарта алдалан унаха, бусад зониинь баряанда туугдан ошохо.

¹⁸ Танай хүсэ шадалые бууруулжа, омогорходог хүсыетнай һалгаахадам, Тахпанхээс хото дээрэ харанхы бууха. Баряанда туугдан ошоходотнай бүрэгэр хара үүлэн орон нютагыетнай бүрхөөхэ.

¹⁹ Египедые хэһээжэ дүүргэхэдэм, таанад Намайе Эзэн гээд ойлгохот.

²⁰ Баряанда туугдан ошоһоноймнай удаа арба нэгэдэхи жэлэй ябажа байхада, жэлэй түрүүшын һарын долоодохи үдэр Эзэн намтай хөөрэлдөө бэлэй:

²¹ – Хүнэй үри Эзэкээл! Египедэй хаан фараоной гарые хухалааб. Хэншье тэрэниие орёогоо, боогоогүй, һэлмэ барижа шададаг болоторынь эдэгээгээгүй.

²² Египедэй фараоной урдаһаа тулахаб, элүүр, мүн хухарһаншье гарнуудыень хоюулынь хухалхаб, тиигэжэ гарһаань һэлмэ унагаахаб гээд Намайе, Эзэн Бурханиие, айладхана гэжэ фараондо дуулга.

²³ Египедэй улад зониие бүхы дэлхэйгээр тараахаб.

^24-25 Вавилооной хаанай засаг шанга болгохо, Египедэй урдаһаа далайхыень һэлмэ тэрээндэ үгэхэб. Египедэй фараон хүсэгүй боложо, шархатаһан хүндэл адли Вавилооной хаанай урда ёолохо. Тиихэдэ Намайе Эзэн гээд улад зон мэдэрхэ.

²⁶ Египедэй зониие хари гүрэнүүдээр сасан тараахаб, тиихэдэм тэдэ Минии, Эзэнэй, иигэжэ хэһээһые мэдэдэг болохо.