Эзэкээл 27 - Библи

Тиир хото тушаа гашуудалай дуун

¹ Эзэн намда иигэжэ айладхаба:

² – Хүнэй үри Эзэкээл, Тиир хото тушаа гашуудалай дуу татыш.

³ Далайн эрьеэр оршогшо олон арадуудтай аралжаа наймаа ябуулдаг, өөрөөшье далайн эрьедэ байдаг энэ хотын зондо Минии иимэ айладхал дуулга: Тиир, алишье талаһаа тэгшэ һайхамби гэжэ ши һайрханаш.

⁴ Хилэ хизааршни далайн гүн хүрэтэр нэмжыдэг, тэгшэ түгэс тээшэ эрмэлзэн баригдаһан далайн онгосо гээшэш.

⁵ Барилгашад Сэниирэй хабсагайһаа кипарис модо абажа, хамаг банзануудыеш хээ, Ливаанһаа үнэтэ хуша модо абажа, мачтануудыеш хээ.

⁶ Башаанай сарса модоор һэльбэнүүдыеш хээ. Киттиимһээ асарагдаһан нарһан модоор шалануудшни хэгдэжэ, заанай һоёогоор гоёогдоо.

⁷ Египедһээ асарагдаһан шэрэмэл һайхан бүдөөр далбагануудшни хэгдэжэ, холоһоо обёорхоор байгаа һэн. Элишааһаа асарагдаһан хүхэ бэхэ үнгэтэй бүд һүүдэрһөө халхабшаш болоо һэн.

⁸ Сидооной ба Арваадай зон һэлюурдэгшэдшни байгаа, мэргэжэл ехэтэй өөрыншни зон залууршадшни бэлэй.

⁹ Гэбаал хотын дүй дүршэлтэй зон эбдэрһэн һандарһан газарыеш заһадаг байгаа, далайн онгосоор тамардаг бүгэдэ зон шинии портдо аралжаа наймаа эрхилдэг һэн.

¹⁰ Персиин, Лидиин, Ливиин зон шинии сэрэгтэ байлсаа, бамбай, дуулгануудаараа шамайе аршалан, алдар солыеш нэмээгээ.

¹¹ Арваадһаа ерэһэн сэрэг харуулшни болоо, Гамаадай зон самхагуудыешни харууһалан байгаа. Тэдэ ханануудааршни тойрон бамбайнуудаа үлгөө, иигэжэ гоё һайханшни бүри түгэс болоо бэлэй.

¹² Таршиишэй наймаашад мүнгэн, түмэр, туулган эдээр аралжаа наймаа ябуулжа, шинии угаа ехэ эд зөөриин наймаае нилээд гүйлгөө.

¹³ Яваан, Тубаал, Мээшэх барлагуудаар, гуулин амһартануудаар шинии эд бараае андалдан абадаг бэлэйл.

¹⁴ Бэйт-Тогармааһаа ерэһэн зон ажал хүдэлмэриин, дайн дажарай моридоор, элжэгэнүүдээр шинии эд бараае андалдан абадаг һэн.

¹⁵ Дэдаанай зонтой аралжаа наймаа ябуулааш, далайн эрьеэр ажаһуудаг үндэһэ яһатад заанай яһаар, хара модоор эд барааешни андалдан абагша бэлэй.

¹⁶ Араамай зон номин шулуугаар, хүхэ бэхэ үнгэтэй, мүн тиихэдэ шэрэжэ оёһон бүдөөр, гоё һайхан маалинга бүдөөр, шүрэ, рубин шулуунуудаар эд барааешни андалдан абагша һэн.

¹⁷ Иудын хан түрэ болон Израиль эгээл эрхим шэниисэ Минниидһээ, бообо, зүгын бала, оливын тоһо, эдеэ буйлуулдаг, үнэр оруулдаг зүйлнүүдые шинии эд бараагай түлөө түлбэри болгон үгэдэг байгаа.

¹⁸ Дамааскын зон шинии баян дэлгэр наймаае хаража, Хэлбооной үзэмэй дараһан архи, сагаан нооһо шамда дурадхан наймаалаа һэн.

¹⁹ Даан болон Яваан Узаалай хажууда шамтай дабтаһан түмэрөөр, хангалтай хүжээр андалдан наймаа хээ.

²⁰ Дэдаанай зон эмээлэй тохомоор шамтай наймаа хэдэг һэн.

²¹ Аравиин зон болон Кэдаарай зонхилогшод хурьгаар, хонёор, ямаагаар шамтай андалдан наймаа ябуулдаг байгаа.

²² Шэбааһаа, Раамааһаа наймаашад эгээл эрхим халуун ногоогоор, үнэтэ шулуугаар, алтаар шинии эд бараа андалдан абадаг һэн.

²³ Харраан, Ханнээ, Ээдэн, Шэбаа, Ассири, Хилмаад хотонуудай наймаашадтай ши мүн лэ наймаа ябуулааш.

²⁴ Тэдэ шамда үнэтэй һайхан хубсаһа, хүхэ бэхэ үнгэтэй, мүн тиихэдэ шэрэжэ оёһон һайхан бүд, эреэ маряан хибһэн, шанга гүрэһэн олһо худалдаа бэлэй.

²⁵ Таршиишэй мантан томо онгосонууд шинии дураар барааеш зөөжэ байгаа. Хүндэ ашаатай, далайгаар тамаржа байһан онгосо мэтэ болоо бэлэйш.

²⁶ Һэлюуршэдшни шамайе далайн дунда һэлюурдэн абаашаа, гэбэшье зүүн зүгэй шанга һалхинда сохигдон ши һандарааш.

²⁷ Тэрэ һүйдхэлтэ үдэр бүхы эд баялиг, ашааншни, далайгаар тамарагшад, залууршадшни, эбдэрхэйеш заһагша дархашуулшни, наймаашад, бүхы сэрэгшэдшни бултадаа далайда шэнгэн хосороо һэн.

²⁸ Далайда шэнгэжэ байгааша зонойш оог хашхараае эрьеын зон шагнажа, ехэ һүрдөө бэлэй.

²⁹ Далайн бусад онгосонуудай бүхы һэлюуршэд, залууршад, юрэдөө, бүхы ажалшадынь онгосонуудһаа газарта бууба.

³⁰ Тэдэ шам тушаа гашуудан, уйлан, толгойдоо шорой сасан, үнэһэн соо хүльбэрхэ, иигэжэ гашуудалаа элирхэйлнэ.

³¹ Толгойгоо халзан болотор хюһаад, гашуудалай шэрүүн таар хубсаһа үмдөөд, тэдэ шам тушаа сэдьхэл шэшэрмэ гашуунаар уйлаха.

³² Гашуудан тэдэ иигэжэ уйлалдан дуулаха: «Тиир, ши бусад хотонуудһаа мантан бэлэйш, харин мүнөө далайн оёорто абяа шэмээгүй хэбтэнэш.

³³ Олон арад түмэнүүд далайгаар ерэдэг ашаануудыеш баяртай угтан, хэрэгсэлээ хангадаг бэлэйл. Хаашуул хаа-хаанагүй шинии эд бараагаар баяжан байгаа.

³⁴ Харин мүнөө далайда хосороош, гүн уһанда шэнгэн һалааш, бүхы ашааншни, ажалшадшни шамтай хамта далай руу унаа.

³⁵ Далайн эрьеэр бүхы зон гай тодхорыеш хаража һүрдөө, хаашуулынь ехэ айжа, шэг шарайнь сухиигаа.

³⁶ Ши ошонгоо ошоош, хэтэ мүнхэдөө үгы болоош. Дэлхэйн бүхы наймаашад шинии аймшагтай хуби заяае хаража доһолоол».