Эзэкээл 26 - Библи

Тиир хото тушаа уридшалан айладхаба

¹ Баряанда туугдан ошоһоноймнай һүүлээр арба нэгэдэхи жэлдэ һарын нэгэндэ Эзэн намтай хөөрэлдөө һэн. Тэрэ иигэжэ айладхаа:

² – Хүнэй үри Эзэкээл! Тиир хотын зон Иерусалимай гай тодхорто баярлан иигэжэ хэлсэнэ: «Ха-ха, Иерусалим һандаргагдаа! Олон уласуудай аралжаа наймаанай томо уулзуур газар һэн бэлэй, мүнөө тэрэ хооһороо, һуурииень бидэ эзэлхэбди».

³ Энээнэйнь түлөө Би, Эзэн Бурхан, Тиирэй урдаһаа тулахаб! Далайн долгинуудаа туун асардагтал мэтэ Би Тииртэ добтолхыень олон үндэһэ яһатадые эльгээхэб!

⁴ Тэдэ Тиир хотын ханануудые, самхагуудые һандаргааха. Ганса нюсэгэн хада болон үлэтэрнь хотын һандархай шулуунуудые хаман бутаргаахаб.

⁵ Далайн дунда оршогшо энэ газарта загаһашад гүльмэеэ хатаадаг байха. Энэ болбол Би, Эзэн Бурхан, айладхана мүн! Үндэһэ яһатад тэрэниие дээрмэдэн тонохо.

⁶ Далайн эрьеэр оршогшо һууринуудайнь ажаһуугшад һэлмээр усадхагдаха. Тиихэдэнь тэдэ Намайе Эзэн гээд мэдэдэг болохо.

⁷ Дэлхэй дээрэ эгээл хүсэтэй хаан гэбэл, Вавилооной хаан Навуходоносор болоно. Би тэрэниие Тииртэ добтолхыень хойто зүгһөө асархаб. Тэрэ моритой, дайшалхы морин тэргэнүүдтэй угаа ехэ сэрэгтэй ерэхэ.

⁸ Далайн эрьеэр оршогшо һууринуудайнь улад зониие тэрэ һэлмээр сабшан усадхаха, хотын ханануудай үндэр хүрэтэр далан бодхоохо, мантан халхабша байгуулха.

⁹ Хэрэм хана сохин эбдэдэг түхеэрэлгэнүүдээ тэдэ хэрэглэхэ, самхагуудые түмэр һүхэнүүдээр сабшан унагааха.

¹⁰ Һандарһан хото руу тэдэнэй ороходонь, тоо томшогүй моридойнь туруунһаа бурьялан бодоһон тооһон хотые үүлэн мэтэ хушаха, мориндо мордоһон, дайшалхы тэргэнүүдээр ябаһан сэрэгэйнь, сахаригуудайнь шууяанһаа хотын хананууд дорьёжо доһолжо байха.

¹¹ Морёор үйлсэнүүдээр үнгэрхэдөө, тэдэ шоройе үнэһэн тобороог болгохо, улад зониие һэлмээр сабшан усадхаха, хүсэ шадалай һүлдэ хүшөөнүүдые газар руу унагаан һандаргаха.

¹² Тэдэ хотын баялиг дээрмэшэлхэ, ханануудые сүмэ сохихо, гоё һайхан байшангуудые һандаргааха, тиигээд үлэһэн модо, шулуу, бог шорой далай руу хаяха.

¹³ Энээнэй удаа дуу дуулаха, ятагаар наадан хүгжэмлэхэ абяан бэшэ дуулдахагүй.

¹⁴ Иигэжэ Би хотые загаһашадай гүльмэеэ хатаадаг халзан хабсагай болгохоб. Хото хэзээдэшье бэшэ һэргээгдэхэгүй. Энэ болбол Би, Эзэн Бурхан, иимэ юумэ үйлэдэхэб гэжэ айладханаб!

¹⁵ Тиир хото, шинии һандарал хуймаа, шархатаһан, алуулжа байһан зонойш ёолоо далайн эрьеэр ажаһуудаг арадууд дуулажа, шэшэрэлдэн байха.

¹⁶ Далайн эрьеэр оршодог улас түрэнүүдэй хаашуул хан шэрээһээ буужа, нэмэргэнүүдээ, шэрэн оёһон гоё һайхан хубсаһануудаа хуу татан тайлажа, шэшэрэн доогуур һууха. Диилдэжэ байһан тухайш шэнэ һонин байд гээд лэ дуулажа байхадаа, тэдэ шэшэрхэ һалганахаяа оройдоош болюулжа шадахагүй.

¹⁷ Тиигээд тэдэ шам тушаа иимэ гашуудалай дуу дуулаха: Далайн хажууда оршоһон суутай мантан хото һалаа, һандараа! Хотын ажаһуугшад бүхы эрье зонхилон, бусад зониие айлган һүрдөөн байгаа бэлэйл.

¹⁸ Харин мүнөө Тиир хото унаа, һалаа. Эрьеын бусад арадууд энээниие харахадаа, ехэ сошоо, һалганан айгаа.

¹⁹ Би, Эзэн Бурхан, шамайе хаясаанай, орхисооной газар болгохоб. Тэнгис далайн уһан дээшээ бодожо, шамайе бүрхөөхэ.

²⁰ Эртэ урда сагта ажаһуудаг байһан зонтой хамтаруулан, шамайе үхэһэн зоной орон руу доошонь буулгахаб. Иигэжэ нүгшэһэн зонтой хамта, хэтэ мүнхэдөө һандарал шулуунуудай дунда байхыеш баадхахаб. Ши хэзээдэшье дахин улад зоноор дүүрэжэ, хүүежэ байхагүйш. Өөрынгөө туяа гэрэл Би амиды зоной орон дэлхэй дээгүүр сасаргахаб.

²¹ Зоной айха һүрдэхэ жэшээ шамайе болгохоб. Тиир хотые зон бэдэрбэл, хэзээдэшье олохогүй. Энэ болбол Би, Эзэн Бурхан, айладхана мүн!