Эзэкээл 25 - Библи

Аммоонууд тушаа уридшалан айладхаба

¹ Эзэн Бурхан намда иигэжэ айладхаба:

² – Хүнэй үри Эзэкээл! Аммооной улад зоной урдаһаа лүндэн табижа, иигэжэ тэдээндэ дуулга:

³ Минии нангин үргөөгэй һандаргагдаад, Израилиин диилдээд, Иудын арад түмэнэй баряанда туугдан ошоод байхада таанад хүхилдэжэ байгаа һэнта.

⁴ Тиимэһээ Би мүнөө зүүн зүгэй обогуудта таанадые диилдүүлхэб. Тэдэ хотон хүреэнээ газар уһан дээрэтнай табиха, үрэ жэмэсыетнай эдихэ, һүыетнай ууха.

⁵ Танай ниислэл хото Раббаае тэмээнэй бэлшээри, Аммооной хүбүүдэй хото һууринуудые хониной хэбтэри болгохоб. Тиихэдэм таанад Намайе Эзэн гээд мэдэдэг болохот.

⁶ Израилиин гай тодхорто таанад альгаа ташажа, собхоржо дэбһэжэ баясан байгаа бэлэйт.

⁷ Тиимэһээ Би таанадые үндэһэ яһатадта олзо болгон үгэхэб. Дууһан таанадые усадхахаб. Тиихэдэм таанад дахин арад гэжэ тоологдохо мүртэй зонгүй байхат. Тиигээд Минии, Эзэнэй, эдэ бүгэдые үйлэдэһые ойлгохот.

Моһаабууд тушаа уридшалан айладхаба

⁸ Эзэн Бурхан иигэжэ айладаа: – Иудын хан түрэ бусад арадуудһаа юугээрээшье илгаагүй гэжэ Моһаабай болон Сэһиирэй улад зон хэлэжэ байна.

⁹ Тиимэһээ Моһаабай хилээр оршогшо хотонуудта, тэрэ тоодо эгээл һайхан хотонуудтань – Бэт-Ешимоот, Бааһал-Мэһоон, Кириатааим гэгшэдтэ, дайсадайнь добтолхые зүбшөөхэб.

¹⁰ Аммоон руу добтолон орогшо зүүн зүгэй обог зон Моһааб руу добтолон орохо, тиигэжэ Аммоондол адли Моһааб дэлхэй дээрэ хэзээдэшье бэшэ дурсагдахагүй.

¹¹ Иигэжэ Моһаабые хэһээхэдэм, Намайе Эзэн гээд зон мэдэдэг болохо.

Эдоомууд тушаа уридшалан айладхаба

¹² Эзэн Бурхан иигэжэ айладхана: – Эдоомой арад түмэн Иудын зонһоо үһөөгөө ехэ шангаар абаһандаа зэмэтэй.

¹³ Тиимэһээ улад зонииень, адууһа малыень усадхажа, Эдоомые хэһээхэб. Газар дайдань Тэмаанһаа эхилээд, Дэдаан хүрэтэр ханха зайдан болохо, бүхы зонииень һэлмээр усадхахаб.

¹⁴ Минии арад түмэн Израиль Минии түлөө Эдоомһоо үһөөгөө абаха, уур хилэнгыем Эдоомой зондо мэдэрүүлхэ, иигэжэ тэдэ Минии үһөөгөө абалга ямар гээшэб гэжэ мэдэдэг болохо.

Пилиштүүд тушаа уридшалан айладхаба

¹⁵ Эзэн Бурхан иигэжэ айладхана: – Пилиштын арад зон хэтын дайсадһаа үһөөгөө оло дахин абан, усадхахаяа һэдэдэг байгаа.

¹⁶ Тиимэһээ Пилиштын арад түмэндэ Би добтолхоб, хэрээдүүдые һалгаахаб, далайн эрьеэр оршодог хотонуудайнь ажаһуугшадые дууһан усадхахаб.

¹⁷ Угаа ехээр тэдэниие хэһээжэ, дүүрэн хэмжээгээр үһөөгөө абахаб. Иигэжэ шанга уур сухал дундаа хэһээхэдэм, тэдэ Намайе Эзэн гээд мэдэдэг болохо.