Эзэкээл 23 - Библи

Һальхай ябадалтай эгэшэ дүү хоёр тухай

¹ Эзэн намда иигэжэ айладхаба:

² – Хүнэй үри Эзэкээл! Нэгэ эхэһээ гараһан эгэшэ дүү хоёр тушаа шагна.

³ Тэдэ хоёр Египедтэ ажаһуухадаа, залуу наһандаа һальхай һамуу ябадалтай байгаа.

⁴ Тэдэнэй нэрэнь гэбэл, эгэшэнь Оһолаа, дүүнь Оһолибаа бэлэй. Тэдэ Намда хадамда гаража, үхибүүдые түрөө һэн. Оһолаа болбол Самари, Оһолибаа Иерусалим болоно гээшэ.

⁵ Оһолаа Минии һамган байгаашье хадаа хүршэ Ассириин амарагуудтаяа һальхай забхай ябадал гарган, инаглаба.

⁶ Хүхэ бэхын үнгэтэй хубсаһа үмдэдэг сэрэгшэдтэй, сэбэрхэн шарайтай түшэмэл ноёдтой, мори унааша сэрэгшэдтэй тэрэ унтадаг байгаа.

⁷ Ассириин дээдэ түшэмэлнүүдтэй тэрэ забхайралдадаг, жэгшүүритэй муухай онгонуудтань мүргэдэг һэн.

⁸ Египедтэ һальхай һамуу ябадал үйлэдэжэ эхилһээр тэрэ иимэ ябадалаа бэшэ орхёогүй бэлэй. Залууһаань эхилжэ эрэшүүл тэрээнтэй унтажа, бүри забхайруулжа һургаа һэн.

⁹ Тиимэ ушарһаа Би Оһолаагай угаа ехээр дурлаһан Ассириин амарагуудтань өөрыень үгөө һэм.

¹⁰ Тэдэ Оһолаае нюсэгэлжэ, үхи хүүгэдыень баряанда абажа, өөрыень алаба. Оһолаатай болоһон ушар тушаа эхэнэрнүүд үни удаан шэбэнэлдэн, хоб-жэб хөөрэлдэн байгаа бэлэй.

¹¹ Оһолибаа дүүнь энэ бүгэдые хараашье һаа, өөрөө бүри һальхай забхай ябадалтай, Оһолаа эгэшэһээ бүри дороор забхайрдаг бэлэй.

¹² Тэрэ мүн лэ Ассириин гоё һайхан түшэмэл ноёдой, һайхан хубсаһа үмдэһэн, мори унаһан сэрэгшэдэй хойноһоо гүйдэг, тэдээнтэй унтахаяа ехэ хүсэдэг бэлэй.

¹³ Өөрыгөө бузарлаһыень, мүн тиихэдэ хоюулаа нэгэн адли ябадалтайень Би адаглажа байгаа һэм.

¹⁴ Гэбэшье Оһолибаа эгэшэһээ хэтэрүүгээр забхайрдаг һэн. Хана дээрэ һиилэгдэһэн, улаан шэрээр шэрдэгдэһэн Вавилооной зоной дүрсэнүүдые харахадаа,

¹⁵ нарин матаргай дээгүүрээ бүһэ бүһэлһэн, толгойдоо мантан боолто малгай үмдэһэн, Вавилооной сэрэгэй жанжинуудта адли тэдэниие обёорходоо,

¹⁶ тэрэ гансата тэдээндэ жүрөөдэн дурлажа, хойноһоонь Вавилоон руу элшэнэрые эльгээбэ.

¹⁷ Вавилооной зон ерэжэ, тэрээнтэй унтажа, забхайран бузарлаба, тэрэ өөрөөшье өөрыгөө бузарлаа болоно. Һүүлэй һүүлдэ Оһолибаа тэдээнһээ жэрхэжэ эхилээ һэн.

¹⁸ Тэрэ нюсэгэ салдагаар олоной урда харагдажа, һальхай забхай ябадалынь олондо мэдээжэ болоходонь, Би эгэшэһээнь буруу хараһандал адляар тэрээнһээ буруу харабаб.

¹⁹ Залуудаа Египет орон нютагта забхайрдагаа һанан, Оһолибаа забхай һальхай ябадалаа бүри олошоруулжал байгаа.

²⁰ Элжэгэнэй мэтэ томо заһаатай, мориной мэтэ ехэ һалайтай амарагуудтаяа ходо унтахаяа тэрэ хүсэжэ байгаа.

²¹ Египедэй амарагуудайнгаа тэрээнтэй унтадагые Оһолибаа һанажа, дахин тэрэ сагаа эрьен ерүүлхые хүсэдэг бэлэй.

²² Эзэн Бурхан иигэжэ айладхана: «Оһолибаа, амарагуудтаяа хамта байхаяа шинии арсажа эхилээшье хадаш Би тэдэниие урдаһааш эрьюулэн, дайсад мэтээр бүхы зүгһөө асархаб.

²³ Бүхы сэбэр, залуу түшэмэл ноёдые, захирагшадые, алдар суутай зониие, морин сэрэгэй ноёдые Вавилоонһоо, Ассириһээ, Халдейн Пэкоод, Шооһа, Кооһа гэдэг обогуудһаа хамта суглуулан асархаб.

²⁴ Зэр зэбсэгээ морин тэргэдэ тээнхэй, дайшалхы тэргэнүүдтэй олон гэгшын сэрэг шинии урдаһаа ерэжэ, халхабша, бамбай, дуулга үмдэнхэй тэдэ шамайе тойрохо, тиихэдэнь өөрынгөө хуули ёһонуудаар шүүхыень шамайе тэдээндэ үгэхэб.

²⁵ Би шамда угаа уурланхайб, тиимэһээ тэдэнэй шамда хэрзэгы муухайгаар хандахыень хорихогүйб. Тэдэ хамар, шэхыеш отолхо, үхи хүүгэдыеш һэлмээр усадхаха, галдан һалгааха.

²⁶ Хубсаһа хунарыеш, үнэтэ гоё зүүдхэлнүүдыеш шамһаа саб шүүрэн, тайлан абаха.

²⁷ Иигэжэ Би шинии үшөө Египедтэ байхадаа һурагша муу муухай ташаяан хэрэгүүдыеш, забхайрһыеш болюулхаб. Онгонуудта мүргэхэеэ, Египет тушаа һанахаяа бэшэ болихош.

²⁸ Үзэн ядадаг, жэрхэдэг зонойш һабарта шамайе үгэхэб.

²⁹ Тэдэ шамда хэрзэгы муухайгаар хандажа, хүдэлһэн ажалайш бүхы үрэ дүн хуряан абаха, шамайе нюсэгэлөөд орхихо, тиихэдэнь хүн бүхэн янхан эхэнэр байһыешни, һальхай забхай ябадал гаргадагыешни хараха.

³⁰ Үндэһэ яһатадай онгонуудта мүргэжэ, өөрыгөө бузарлаһанайш түлөө тэрэ хэгдэхэ.

³¹ Эгэшынгээ замаар ябаһанайш түлөө тэрээндэ уулгаһан хэһээлтынгээ шүлэ мүн лэ шамда уулгахаб.

³² Би, Эзэн Бурхан, гүнзэгы, үргэн аягаар хэһээлтын шүлэ эгэшэдэш уулгаа һэм. Тон тиимэ аяга ши уужа, шоо үзүүлхэ, наадалуулха болонош.

³³ Һогтон, уйдан байхаш, энэ айхын, һандархын аяга, эгэшэ Самарииншни аяга!

³⁴ Тэрэниие дууһан уужа, хатаагаад, удаань бута сохижо, хэлтэрхэйнүүдээрнь үбсүүгээ таһа татан байхаш. Энэ болбол Би, Эзэн Бурхан, айладхана мүн!»

³⁵ Ши Намайе мартажа, буруу харааш, тиимэһээ һальхай забхай байһанайнгаа түлөө хэһээгдэхэш.

³⁶ Эзэн намда айладхаба: – Хүнэй үри Эзэкээл! Оһолаа Оһолибаа хоёрые шүүхэ һанаатай гүш? Жэгшүүрилтэй муухай хэрэгүүдыень тэдээндэ һануулаарай.

³⁷ Тэдэ онгонуудта мүргэжэ, өөһэдынгөө үхи хүүгэдые алажа, тэрэ муухай онгонуудта үргэдэг байгаа.

³⁸ Үшөө юу хээб гэхэдэ, Минии нангин үргөөе бузарлаа, субботын үдэрыем сахяагүй.

³⁹ Онгонуудтаа үргэл болгон үхи хүүгэдээ алаһанайнгаа һүүлээр тэрэл үдэртөө Минии нангин үргөө руу ерэжэ, тэдэ бузарлаа. Иигэжэ тэдэ Минии нангин гэртэ хандаа болоно.

⁴⁰ Холын зониие асаруулхаяа элшэнэрые тэдэ эльгэжэ, ерэхэдэнь, тэдэ хоёр эгэшэнэр бэеэ угаажа, нюдөө будажа, зүүдхэлнүүдээрээ бэеэ гоёодог бэлэй.

⁴¹ Шэрээ урдань табяатай гоё һайхан буйдан дээрэ тэдэ хэбтэдэг бэлэй. Тэрэ шэрээ дээрэнь Минии үршөөһэн оливын тоһон, уталганууд байдаг һэн.

⁴² Тэдэнэй гэртэ элһэн сүл губиин архиншад олоороо үймэржэ, шууяжа байгша һэн. Эдэ зон эгэшэнэрэй гарта бугаагуудые, толгойдонь үзэсхэлэн һайхан титимүүдые үмдэхүүлдэг байгаа.

⁴³ Забхайралгые үйлэдэжэ эсэһэн тэдэ эхэнэрнүүд тушаа «Яажа эсэнэгүйб?» гэжэ Би Өөртөө дуугаран һанаа һэм.

⁴⁴ Теэд тэдэ зон янхан эхэнэрнүүд болохо Оһолаа Оһолибаа хоёрто һамгадтаа ерэһэндэл адляар дахин-дахин ерэжэл байгаа.

⁴⁵ Гэбэшье үнэн сэхэ зон тэдэ хоёр эгэшэнэрые алууршад байһандань, мүн урбан забхайран байһанайнь түлөө шүүхэ.

⁴⁶ Мүнөө тэдээн руу олон зониие дуудажа, сохюулха, дээрмэшэлүүлхэб гэжэ Би, Эзэн Бурхан, айладханаб.

⁴⁷ Тэдэ зон эгэшэнэр руу шулуу шэдэн, һэлмээр сабшан усадхаха, үхи хүүгэдыень алаха, гэр байрануудыень шатаан һалгааха.

⁴⁸ Энэ орон нютагта забхайрха ябадал үгы хэхэб, тиихэдэм бүхы эхэнэрнүүд тэдээндэл адли һальхай һамуун байхаяа тэбшэхэ.

⁴⁹ Һальхай ябадал гаргаһанайнгаа, онгонуудта мүргэһэнэйнгээ түлөө эгэшэнэр хэһээгдэхэ, тиихэдээ Намайе Эзэн Бурхан гэжэ мэдэдэг болохо.