Эзэкээл 22 - Библи

Иерусалим хэһээгдэхэ

¹ Эзэн намтай дахин хөөрэлдэбэ:

² – Хүнэй үри Эзэкээл, алууршадаар дүүрэһэн хотые ши шүүхэеэ һанана гүш? Хэһэн бүхы жэгшүүрилтэ муухай хэрэгүүдынь тэрээндэ һануулаарай.

³ Иерусалим, өөрын зониие алаһанайнгаа, онгонуудта мүргэжэ, бэеэ бузарлаһанайнгаа түлөө хэһээлтэ амасаха сагшни ерэжэ байна.

⁴ Шуһа урдахуулжа гэмтэн болоош, онгонуудта мүргэжэ, өөрыгөө бузарлааш. Хэһээлтэ амасаха сагаа иигэжэ дүтэлүүлбэш. Тиимэһээ Би шамайе бусад үндэһэ яһатадай энеэдэ наадан, бусад орон нютагуудай шоо үзэхэ зүйл болгооб.

⁵ Шамһаа ойро, холо оршогшо орон нютагуудай зон нэрээ хухарһан, хүлгөөтэй үймөөтэй шамайе шоо үзэхэ.

⁶ Израилиин удамаршад өөрынгөө хүсэ шадал алалсаа хэхын лэ түлөө хэрэглэнэ.

⁷ Эхэ, эсэгэеэ хүндэлнэгүйт, ерүүл зониие дарланат, үншэн хэнзые, бэлбэһэн эхэнэрнүүдые харшалнат.

⁸ Нангин газарнуудыем хүндэлнэгүйт, субботын үдэрые сахинагүйт.

⁹ Хүниие алуулха зорилготойгоор худалаар хардагшад таанадай дунда бии, обоонуудые тахин үргэл хээд, онгонуудта үргэһэн үргэлэй мяха эдигшэд, забхай һальхай ябадал үйлэдэгшэд олдохо.

¹⁰ Абынгаа һамгантай унтаха, һарынхияа үзэжэ байгааша эхэнэртэй хурисалдаха ябадал танай дунда гарана.

¹¹ Нэгэнь хүршынгөө һамгантай жэгшүүритэй хэрэг үйлэдэжэ, унтана, нүгөөдынь забхайран, бэреэ бузарлан, унтана, гурбадахинь эгэшэ, дүүгээ хүсөөрөө эдлэнэ.

¹² Хэнииешьеб алахын тула эдилгэ абагшад, нэгэ угсаатан болохо Израилиин хүндэ мүнгэ зээлеэр үгэжэ, түрэсынь ашаар баяжагшад таанадай дунда бии. Таанад Намайе, Эзэн Бурханиие, мартаат.

¹³ Үнэн зүб бэшэ аргаар олоһон олзо ашаг, алаха ушар тухайтнай дуулахадаа, уур хилэнтэжэ, нюдаргаа үбдэтэрнь сохиноб.

¹⁴ Таанадай урдаһаа тулахадам, зоригтнай мохожо, гараа үргэхэ хүсэ шадалгүй болоод байхат. Би, Эзэн, айладхаа бол заабол бэелүүлхэб!

¹⁵ Таанадые үндэһэ яһатадай дундуур сасан тараахаб, ондоо газар нютагуудаар хиидхүүлэн байхаб. Тиигээд бузарлаха ябадалнуудыетнай болюулхаб.

¹⁶ Үндэһэ яһатанай урда таанад өөһэдыгөө бузарлахат. Тиихэдээ Намайе, Эзэниие, энээниие үйлэдөө гэжэ мэдэхэт.

¹⁷ Эзэн намда иигэжэ айладхаба:

¹⁸ – Хүнэй үри Эзэкээл! Израилиин арад түмэн Намда хаягдаса, холисо мэтэ болоо. Зууха соо хайлуулжа, мүнгэ сэбэрлэн илгахада зэд, хүнгэн сагаан, түмэр, туулган амяарлаад үлэдэг гээшэ ааб даа. Тэдээн шэнги хэндэшье хэрэггүй зүйл болоол Израилиин зон!

¹⁹ Тиигээ хадань Би, Дээдэ Эзэн, тэдэниие бултыень Иерусалим соо суглуулхаб.

²⁰ Тэрэ мүнгэ, зэд, түмэр, туулга, хүнгэн сагаае хайлуулхаяа зууха руу хэдэгтэл, Би уур хилэн дундаа тэдэниие суглуулжа, хамта болгоод, хайлуулхаб.

²¹ Тиимэ даа, хамта суглуулаад, уур хилэнгэй галаар тэдээн руу сорьёходом, тэдэ хайлан һалаха.

²² Зууха соо мүнгэнэй хайладагтал, тэдэ хайлажа, Минии, Эзэнэй, уур хилэн дундаа өөһэдыень хэһээһые ойлгохо.

²³ Эзэн намда иигэжэ айладхаба:

²⁴ – Хүнэй үри Эзэкээл! Израилиин улад зондо газартнай муу муухай, тиимэһээ Минии, Эзэнэй, тэрэниие хэһээһэн тушаа дуулга.

²⁵ Олзоёо зулгаажа, архиржа байһан арсаланда адлил удамаршадынь! Тэдэ зониие алана, үнэтэ сэнтэй юумэ бултыень өөрын болгоно, эрэшүүлые алажа, бэлбэһэн эхэнэрнүүдэй тоо олошоруулна.

²⁶ Санаартадынь Минии хуули хазагайруулна, нангин, мүн бэшэ, сэбэр болон сээртэй зүйлнүүдые илгаруулнагүй, иигэжэ нангин зүйлнүүдыем бузарлана. Тэдэ субботые сахинагүй, Намайе хүндэлнэгүй.

²⁷ Ноёдынь олзоо зулгаажа байһан шононууд мэтэ. Тэдэ хүниие алажа, баяжана.

²⁸ Тиихэдэнь лүндэншэдынь тэрэ нүгэлыень бүглэжэ, худал үзэгдэл хаража, уридшалан хэлэхэдээ, хуурмаг юумэ дуулгана. Дээдэ Эзэн иигэжэ айладхаа гээд тэдэ хэлэнэ, харин Би тэрэ юумыень оройдоошье айладхаагүй бэлэйб.

²⁹ Баяшуул арад зониие мүлжэнэ, үгытэйшүүлые, ядуу байдалтай зониие дарлана, ерүүл хүниие худалаар харшална.

³⁰ Намда усадхуулхагүйн тула хотые аршалжа, хана бодхоон, һүмэ сохюулһан нүхэндэнь зогсожо, халхалжа байха хүниие тэдэнэй дунда бэдэрээб, гэбэшье олобогүйб.

³¹ Тиимэһээ угаа ехээр уурлажа, Би тэдэниие хэһээхэб, үйлэ хэрэгүүдынь өөһэдынь толгой дээрэ буулгахаб. Энэ болбол Би, Эзэн Бурхан, айладхаа мүн!