Эзэкээл 2 - Библи

Эзэн Эзэкээлые лүндэншэ болгон шэлэбэ

¹ Тэрэ иигэжэ намда айладхаа: «Хүнэй үри Эзэкээл, бодо! Би шамтай хөөрэлдэхэм».

² Тэрэнэй дуугаржа байхада, Бурханай Һүлдэ нам руу халин орожо, хүл дээрэм намайе бодхообо. Тиигээд айладхалыень саашань дуулаа һэм:

³ – Хүнэй үри Эзэкээл, Би шамайе Израилиин арад түмэн руу эльгээхэм. Тэдэ Минии урдаһаа эсэргүүсэн бодоо, буһалгааша зон даа. Үбгэ эсэгэнэртээ адли тэдэ урбагшад гээшэл.

⁴ Үсэд, шулуун хатуу зүрхэтэй тэдээн руу шамайе Минии, Бүгэдын Эзэнэй, айладхал дуулгахыень эльгээхэм.

⁵ Зүрилдөөтэй тэдэнэр шамайе шагнана гү, али үгы гү, юрэдөө, өөһэдынь хоорондо Бурханай захяа дуулгаһан лүндэншын байһые тэдэ мэдэдэг болохо.

⁶ Харин ши, хүнэй үри Эзэкээл, тэдэнһээ, үгэнүүдһээньшье бү ай. Тэдэнэй хадхан харшалаашье хадань, доромжолоошье һаань, хорото могойнуудай дунда байһандал шамда болоошье һаань, тэдэ зүрилдөөтэ зонһоо бү ай, үгэ хүүрһээнь бү һүрдэ.

⁷ Дуулаа, үгышье һаань, Минии үгэнүүдые тэдээндэ дамжуула. Зүрилдөөтэй зон гээд бү мартаарай.

⁸ Ши, хүнэй үри Эзэкээл, Минии айладхалые шагна. Тэдээндэл адли үсэд бү боло. Амаа нээгээд, Минии үгэжэ байгаашые эди.

⁹ Тиигээд минии харахада, нам руу гарынь һунгаатай, гар соонь хуйламал бэшэг байба.

¹⁰ Тэрэнэй энэ бэшэг минии урда дэлгэхэдэнь, хоёр тээһээ тэрэ бэшэгдэнхэй, гашуудал, уйлаан, зоболон тэндэ бэшээтэй байгаа һэн.