Эзэкээл 19 - Библи

Гашуудалай дуун

¹ Эзэн намда иигэжэ айладхаа:

² – Эзэкээл, Израилиин удамаршадта гашуудалай иимэ дуу дуулажа үгыш: Эхэтнай арсалан мэтэ зоригтой бэлэйл. Хүсэтэ арсалангуудай дунда тэрэ гансаараа гүлгэдөө үндын тэжээгээ.

³ Тиигээд нэгэ гүлгэеэ агнаха эрдэмдэ һургаба. Тэрэнь хүниие барижа, эдижэ һураба.

⁴ Үндэһэ яһатад тэрээн тушаа дуулажа, нүхэндэ мэхэлэн оруулжа бариба. Тиигээд тэрэниие дэгээгээр шэрэжэ, Египет орон руу абаашаба.

⁵ Эмэ арсалан хүлеэжэ сүхэрөөд, найдалаа гээһэнээ мэдэхэдээ, нүгөөдэ гүлгэеэ һургажа, тэрэнь хүсэтэй арсалан болобо.

⁶ Бусад арсалангуудтай хамта тэрэ агнажа ябадаг бэлэй. Олзо барижа, хүниие барин эдижэ тэрэ һураба.

⁷ Бүхэлэгдэһэн самхагуудые, хотонуудые тэрэ һандаргаа, архираан дуунһаань орон нютагай зон айжа тэрьедэдэг һэн.

⁸ Тиихэдэнь бүхы талаһаа үндэһэ яһатад тэрэнэй урдаһаа хамтаржа, урьха тор табиба, иигэжэ арсалан нүхэндэнь орожо баригдаа бэлэй.

⁹ Дэгээгээр хамһан, тэрэниие тор руу оруулаад, Вавилооной хаанда абаашаба. Иигэжэ тэрэ хэрэмдэ хаагдажа, оог дууниинь Израилиин хадануудаар бэшэ дуулдахаяа болёо бэлэй.

¹⁰ Шинии эхэ болбол уһанай дэргэдэ һуулгаһан үзэмэй модон мэтэ бэлэйл. Билтарма ехэ уһатай газарта байһандаа тэрэ жэмэс олонтой, һагсагар гэшүүһэ, мүшэрнүүдтэй һэн.

¹¹ Гэшүүһэдынь хүсэтэй, хаашуулай баяг болохоор ургажа байгаа. Бусад мододһоо тэрэ үндэр, харахада, олон набша намаатай, һаглагар үндэр бэлэйл.

¹² Харин Би уур хилэнтэжэ, тэрэниие газарһаань һуга татан газарта хаябаб. Элһэн сүл губиин халуун һалхин жэмэсынь хатаагаа. Хүдэр гэшүүһэдынь хатажа, галда шатаагдаба.

¹³ Тиигээд энэ модон хуурай элһэн сүл губида һуулгагдаа.

¹⁴ Мүшэрһөөнь гал гаража, гэшүүһэдынь, жэмэсынь дууһан шатаба. Иигэжэ хүдэр гэшүүһэд, мүн тиихэдэ хаанай баягшье бэшэ байхаа болёо һэн.