Эзэкээл 18 - Библи

Нүгэлтэй зон хосорхо

¹ Эзэн намда иигэжэ хандаба:

² – Эзэкээл, Израилиин улад зон «Түрэлхидэйнь гашуун үзэм эдихэдэ, хүүгэдэйнь аманда гашуун амтан үлэнэ» гэһэн оньһон үгэ дабтадаг гү?

³ Би, Дээдэ Эзэн, Өөрөөрөө тангаригланаб, энэ оньһон үгэ Израиль дотор бэшэ хэлэхэеэ болихо!

⁴ Хүн бүхэнэй – эхэ, эсэгын, үхибүүнэйнь – ами наһан Минии мэдэлэй. Нүгэл үйлэдэгшэ хэн нэгэн өөрынгөөл хэһэнэй түлөө хосорхо.

⁵ Үнэн зүб, үнэн сэхээр хэрэг шиидхэдэг хэн нэгэн бии гэлэй.

⁶ Обоонуудта тахигдаһан үргэлэй хоол тэрэ баридаггүй, Израилиин онгонуудта мүргэдэггүй гэел даа. Ондоо хүнэй һамгантай унтадаггүй, һарынхияа үзэжэ байхадань һамгандаа хүрэдэггүй гэе.

⁷ Хэнииешье дарладаггүй, бариса гэжэ абаһан юумэеэ бусаадаг, дээрмэшэлгэ, тонуул хэдэггүй, үлэн хооһон хүнтэй эдеэ хоолоороо хубаалдадаг, нюсэгэн хүндэ хубсаһа үгэдэг.

⁸ Түрүүлхэ гэжэ мүнгэ үгэдэггүй, муу юумэ хэдэггүй, үнэн зүбөөр хэрэг шиидхэдэг.

⁹ Захиралта, хуулинуудыем тэрэ үнэн зүрхэнһөө дүүргэдэг. Иимэ хүн зүб һайн хүн гээшэ, тиимэһээ тэрэ амиды мэндэ байха гэжэ Би, Дээдэ Эзэн, айладханаб.

¹⁰ Харин энэ хүн дээрмэшэлдэг, аладаг, элдэб нүгэл хэдэг хүбүүтэй байба гэе.

¹¹ Хэдэг муу муухай юумыень эсэгэньшье оройдоо хээгүйл. Хүбүүниинь обоонуудта тахигдаһан үргэлһөө хүртэдэг, ондоо хүнэй һамгантай унтадаг,

¹² ядуу, үгытэй зониие дарладаг, зонһоо юумыень буляадаг, бариса гэжэ абаһан юумэеэ бусаадаггүй, онгонуудта мүргэдэг, жэгшүүрилтэ муухай юумэ хэдэг,

¹³ мүнгэ түрүүлдэг. Иимэ хүбүүн амиды мэндэ байха аал? Үгы! Иимэ жэгшүүритэй муухай юумэ хэһэндээ тэрэ заабол хосорхо. Өөрөөл үхэлдөө зэмэтэй гээшэ.

¹⁴ Харин хэн нэгэн хүбүүтэй боложо, тэрэ хүбүүниинь эсэгынгээ нүгэл хэдэгые хараад, өөрөө иимэ юумэ хэхэеэ тэбшэдэг, эсэгэеэ һажаадаггүй гээшэ һаа,

¹⁵ обоонуудай үргэлһөө эдидэггүй, Израилиин онгонуудта мүргэдэггүй, ондоо хүнэй һамгантай унтадаггүй,

¹⁶ хүниие дарладаггүй, барисаанай юумэ абадаггүй, дээрмэдэдэггүй, үлэсхэлэн хүнтэй эдеэ хоолоороо хубаалдадаг, нюсэгэн хүниие хубсалуулдаг,

¹⁷ үгытэйшүүлые дайрадаггүй, мүнгэ түрүүлжэ байдаггүй, Минии хуулинуудые сахидаг, захиралтануудыем дүүргэдэг гээшэ һаа, эсэгынгээ гэм зэмэй түлөө тэрэ наһа барахагүй, амиды мэндэ байха.

¹⁸ Эсэгэнь хүниие угаа ехээр дарлажа, дээрмэшэлжэ, бүхы зондо муу юумэ хэжэ байһанайнгаа түлөө, юрэдөө, өөрынгөөл гэм зэмэй түлөө үхэхэ.

¹⁹ Гэбэшье таанад «Хүбүүниинь эсэгынгээ гэмэй түлөө юундэ хэһээгдэхэгүйб?» гэжэ асуужа болохот. Юундэб гэхэдэ, тэрэ хүбүүн үнэн зүбөөр, сэбэр сэхээр юумэ үйлэдэдэг, бүхы хуули ёһонуудыем наринаар сахидаг, тиимэһээ тэрэ амиды мэндэ байха.

²⁰ Хэн нэгэн нүгэл хэбэл, үхэхэ, харин хүүгэдынь эхэ, эсэгынгээ гэм зэмые амасахагүй, эхэ, эсэгэ хүүгэдэйнгээ түлөө хэһээгдэхэгүй. Һайн хүнэй һайн хэрэгынь өөртэнь туһалха, муу хүнэй муу хэрэгынь өөрыень тушаха.

²¹ Хэрбээ муу хүн нүгэл хэхэеэ болижо, Минии бүхы хуулинуудые сахидаг, үнэн зүбые, сэбэр сэхые үйлэдэдэг болоо гээшэ һаа, амиды мэндэ үлэхэ, үхэхэгүй.

²² Хэһэн бүхы муу хэрэгүүдынь сагааруулагдаха, сэбэр сэхэ юумэ үйлэдэһэндөө тэрэ амиды мэндэ үлэхэ.

²³ Би, Эзэн Бурхан, муу хүнэй хосорходо баярлана бэшэб. Тэрэнэй нүгэл хэхэеэ болижо, амиды мэндэ үлэхэдэ баярладагби.

²⁴ Үнэн зүбые үйлэдэдэг хүн үнэн зүбһөө буруу хаража, муу зоной хэдэг жэгшүүритэй муухай хэрэгүүдые хэжэ эхилээ гээшэ һаа, амиды мэндэ байха гү? Үгы! Бүхы үнэн зүб хэрэгүүдынь мартагдаха, урбаһанайнгаа, нүгэл хэһэнэйнгээ түлөө тэрэ хосорхо.

²⁵ Таанад Намайе зүб бэшэ гэжэ зэмэлнэт. Теэд шагныт, Израилиин улад зон, өөһэдынтнай хэһэн хэрэгүүд буруу, харин Минии хэрэг үнэн зүб мүн!

²⁶ Һайн хүн һайе үйлэдэхэеэ болижо, мууе хэжэ эхилээ һаа, өөрынгөө гэм зэмэй түлөө хосорхо.

²⁷ Харин муу зон һайн хэрэг үйлэдэжэ эхилбэл, абарагдаха.

²⁸ Муу хэрэг хэһэнээ тэрэ ойлгожо, тэрээнһээ зайсажа, амиды мэндэ үлэхэ, хосорхогүй.

²⁹ Энээнэй һүүлээршье таанад Намайе зүб бэшэ гээд зэмэлнэт. Израилиин улад зон, таанад өөһэдөө буруут!

³⁰ Би, Эзэн Бурхан, таанадай хүн бүхэниие хэһэн хэмээрнь шүүхэб! Нүгэлнүүдэйтнай таанадые хосороохогүйн тула муу хэрэгүүдые хэхэеэ болигты, нүгэлөө наманшалагты.

³¹ Муу муухай юумэ өөрһөө зайсуулагты, сэбэр, арюун бодолтой, Намда үнэн сэхэ бологты. Тиигэбэл, Израилиин арад түмэн, таанад хосорхогүйт!

³² Би, Эзэн Бурхан, хэнииешье үхэг гэжэ хүсэнэ бэшэб. Муу юумэ үйлэдэхэеэ болижо, амиды мэндэ байгыт!