Эзэкээл 16 - Библи

Иерусалим болбол урбагша эхэнэр мүн

¹ Эзэн намтай дахин хөөрэлдэбэ:

² – Хүнэй үри Эзэкээл! Иерусалимда жэгшүүрилтэ хэрэгүүдыень мэдүүлжэ хэлэ.

³ Эзэн Иерусалимда иигэжэ айладхана гээд хэлэ: Шинии уг гарбал, түрэһэн тоонто нютагшни Ханаһаан нютаг болоно. Эсэгэтнай эмоор, эхэтнай хээт хүн байгаа.

⁴ Шинии түрэн мүндэлхэдэ хэншье хүйһыеш хүндөөгүй, сэбэрлэжэ бэеыеш уһаар угаагаагүй, дабһаар үрөөгүй, мансыда орёогоогүй.

⁵ Эдэ бүгэдын нэгыеньшье хэншье хээгүй, шамайе хайрлаагүй. Харин ши хээрэ тала руу хаягдаа бэлэйш. Юуб гэхэдэ, түрэһэн үдэрһөө эхилэн ши хэндэшье хэрэггүй болоо бэлэйш.

⁶ Эрьен ябахадаа Би шинии өөрынгөө шуһан соо мухарин байхыеш хараа һэм. Тиигээд үхэхэ зүбшэл шамда үгөөгүй бэлэйб.

⁷ Хээрын ногоон мэтээр шамайе эрхэ сүлөөдэ, хашан харшалангүй ургуулааб. Гоё һайхан хүхэтэй, ута үһэтэй залуу басаган болотороо ургааш. Гэбэшье үшөөл нюсэгэн зандаа байгаа бэлэйш.

⁸ Би дахяад шамайе эрьехэдээ, инаг дуранай наһандаа ябахыеш хаража, хубсаһа-далиингаа хормойгоор нюсэгэн бэеыеш орёон хушаа бэлэйб. Минии болохош гэжэ Би тиихэдэ ехэ тангариглаад, шамтай хэлсээ баталаа һэм.

⁹ Уһа абажа, шамайе шуһанһаа сэбэрлээб, оливын тоһо толгойдош түрхеэб.

¹⁰ Угалзатуулан шэрэһэн гоё һайхан хубсаһа, эрхим арһаар оёһон гутал шамда үмдэхүүлээб, үнэтэ лентээр бэеыш орёогооб, торгон нэмэргэ дээрэш хэдэрээб.

¹¹ Ииигэжэ шамайе гоёогоод, гарташ бугааг, хүзүүндэш гоё һайхан зүүдхэл үмдэхүүлээ бэлэйб.

¹² Хамарай, шэхэнэй сахариг, толгойдош гоё һайхан титим бэлэглээ һэм.

¹³ Иигэжэ ши алта, мүнгөөр гоёжо, эгээл һайхан бүд торгоор оёһон, тиихэдэ угалзатуулан шэрэһэн хубсаһа үмдэдэг байгаа бэлэйш. Эрхим шанартай гурилаар бариһан хилээмэ, зүгын бала, оливын тоһо эдидэг һэнши. Хатан мэтэ угаа гоё һайхан болоо бэлэйш.

¹⁴ Дэлхэйн арад зоной дунда хаа-хаанагүй шинии гоё һайхан тушаа һураг суу тараа һэн. Би, Эзэн Бурхан, шамайе иимэ гоё һайхан болгоо бэлэйб.

¹⁵ Гэбэшье гоё һайхан болоһоноо ойлгожо, хажуугааршни гарагша бүхэнтэй забхайран унтажа эхилээш.

¹⁶ Үргэлэй обоонуудые өөртөө зохёон түхеэржэ, хубсаһанһаа үнгэтэ үртэһэнүүдые таһалаад, тэрэ обоонуудые гоёогоо һэнши. Тиигээд һальхай һамуу ябадал гаргажа, хурисал тэндэ үзэжэ эхилээ бэлэйш. Харин иимэ ушар тэндэ хэзээшье тохёолдохо, гараха ёһогүй байгаал!

¹⁷ Минии шамда үгэгшэ алта, мүнгэн шэмэглэлнүүдые абажа, эрын дүрсэтэй онгонуудые өөртөө дархалжа, ши тэдээндэ мүргэн,

¹⁸ Минии шамда үгэгшэ угалзатуулан шэрэһэн гоё һайхан хубсаһа абажа, тэдэ онгонуудта үмдэхүүлбэш, Минии шамда үршөөгшэ оливын тоһо, уталгануудые тэдэнэй урда табибаш.

¹⁹ Минии шамда үршөөһэн эдеэ хоол – эрхим гурил, оливын тоһо, зүгын бала ши тэдэнэй урда хайлуулан ууюулжа, үргөөш. Би, Эзэн Бурхан, энээниие ажаглан хаража байгаа һэм.

²⁰ Намда зорюулан түрэгшэ үхи хүүгэдээшье ши абажа, тэдэ онгонуудта үргэл болгон үргөөш! Өөрөө намда урбахашни багадаад,

²¹ Минии хүүгэдые алажа шатаажа, тэдээндэ үргэбэш!

²² Иигэжэ нүгэл хэжэ, забхайран һальхайржа байха үедөө ши шараа нюсэгэн, шуһандаа зууралданхай газарта мухарижа байһан бага балшар наһаяа һанахаяашье арсааш.

²³ Мүнөө Би, Эзэн Бурхан, ши золгүйш гэжэ тунхагланаб! Эдэ бүхы хорон муу ябадалайнгаа удаа

²⁴ ши харгы бүхэнэй хажуугаар хурисал үзэхэ газарнуудые зохёон баряаш.

²⁵ Хажуугаар гараһан бүхэнтэй ши һальхай һамуу ябадал гаргажа, унтажа, өөрыгөө бузарлааш. Иимэ юумэ үдэр бүри хэдэг һэнши.

²⁶ Намайе сухалдуулхын тула ши Египет ороной ташаяангы хүршэнэртөө өөрыгөө дурадхан унтажа байгааш.

²⁷ Тиимэһээ Би үршөөл хайраяа шамһаа хаһажа, Пилиштын хомхой хобдог дайсадташ газар уһанайш хубиие эзэлхыень зүбшөөгөө һэм. Харин тэдэшье шинии эшхэбтэр ябадалһаа боложо жэрхэжэ байна.

²⁸ Садаха гэдэхээ болижо, Ассириин зоной хойноһоо гүйжэ, тэдээнтэй унтааш. Энээнэй удаашье ши ханабагүйш.

²⁹ Вавилооной зоной хойноһоо гүйн, тэдээнтэй унтаад, баһал ханабагүйш.

³⁰ Һанаһанаа абахын тула ямаршье арга хэрэглэн байхадаа ши угаа жэгшүүритэйш гэжэ Би, Эзэн Бурхан, айладханаб.

³¹ Харгы бүхэндэ забхайран хурисал үзэжэ байхадаа ши бэлэг сэлэг, мүнгэ абадаггүй байгааш. Энэ болбол янхан эхэнэр байхаһаа бүри муу муухай ябадал болоно.

³² Өөрынгөө үбгэнэй орондо ондоо, танигдаагүй хүнтэй хурисал үзэжэ байдаг забхай эхэнэр гээшэ ши болонош.

³³ Янхан эхэнэрнүүд унтаһанайнгаа түлөө мүнгэ абадаг, харин ши өөр тээшээ алишье зүгһөө ерүүлхын, тэдээнтэй унтахын тула өөрөө мүнгэ үгэнэш.

³⁴ Ши бусад янхан эхэнэрнүүдтэ орходоо ондоош. Шамтай унтахын тула хойноһоош гүйнэ бэшэ, ши өөрөө мүнгэ үгэжэ, тэдэниие шамтай унтахыень гуйнаш.

³⁵ Эзэн иигэжэ айладхана: – Янхан эхэнэр Иерусалим, Минии айладхал шагна!

³⁶ Зондо мүнгэ сасажа, түлэжэ, удаань тэдэнэй урда нюсэгэлөөд, хурисал тэдээнтэй хэдэг байгааш. Жэгшүүрилтэй муухай онгонуудта мүргэжэ, хүүгэдээ тэдээндэ үргэн алааш.

³⁷ Тиимэһээ Би шинии дуратай амарагуудыеш, мүн шамайе үзэн ядагшадые бултыень хамта суглуулжа, шамайе тойруулан зогсоогоод, хубсаһыеш хуулан абахаб. Тиихэдэм тэдэ шинии шараа нюсэгые хараха.

³⁸ Үбгэндөө урбан, һальхай һамуу ябадал гаргаһанайш, алууршан байһанайш түлөө Би шамайе шүүбэрилхэб! Угаа ехээр уурлан, шамайе хороохо гэжэ заргада оруулан шиидхэхэб!

³⁹ Тиигээд амарагуудташ шамайе дамжуулхадам, тэдэ хурисал үзэһэн газарнуудыеш һандарган һалгааха. Хубсаһыеш тайлажа, зүүдхэлнүүдыеш саб шүүрэн абаха. Тиигээд шамайе нюсэгэн, салдаган орхихо.

⁴⁰ Тэдэ олониитые тухиран, шам руу үхэтэрыш шулуу шэдүүлхэ, бэеыеш һэлмээр сабшаха.

⁴¹ Гэр байрануудыеш дууһан шатааха, бусад эхэнэрнүүдэй хараһаар байтар энэ хэһээлтэ шамда амасуулха. Иигэжэ Би шинии забхайрхые, мүнгэ түлэн унтадаг байхыеш болюулхаб.

⁴² Эгээл тииһэнэйнгээ удаа Би номгоржо, уурлахаяа, хилэнтэхэеэ болихоб.

⁴³ Залуу байхадаш туһалдаг дэмжэдэг тушаам мартажа, муу муухай юумэ үйлэдэжэ, Намайе ехэ сухалдуулааш. Һальхай һамуу ябадал гарган, жэгшүүритэй юумэ хэжэ байгааш. Энээниие өөрыншни толгой дээрэ буулгажа, хэһээхэб! Энэ болбол Би, Эзэн Бурхан, айладхана мүн!

Эгэшэ дүү хоёр тушаа

⁴⁴ «Эхэнь ямар бэ, басаганиинь тон тиимэ байха» гэдэг сэсэн мэргэн үгэ шам тушаа, Иерусалим, зон хэлэдэг байха.

⁴⁵ Ши эхэдээл адлиш, үбгэеэ, үхи хүүгэдээ үзэн яданаш. Үбгэеэ, хүүгэдээ үзэн ядадаг эгэшэнэртэл адлиш. Шинии болон эгэшэ хотонуудайш эхэ гэбэл, хээт, эсэгэ гэбэл, эмоор үндэһэ яһанай зон байгаа бэлэйл.

⁴⁶ Шамһаа хойшоо зүгтэ һууринуудтаяа хамта оршогшо Самари болбол шинии эгэшэ мүн, шамһаа урагшаа зүгтэ һууринуудтаяа хамта оршогшо Содом болбол дүүшни мүн.

⁴⁷ Юрэдөө, ши тэдээнтэй адляар ажаһуугааш, тэдэнэй жэгшүүритэй үйлэ хэрэгүүдые һажаалдан хэдэг байгааш. Гэбэшье энэ шамда багадаад, ши тэдээнһээ үлүүгээр һальхайран, хэһэн хэрэг бүхэнөө тэдээнһээ бүри муухайгаар хэдэг болоош.

⁴⁸ Содомой болон хажуугаарнь оршодог һууринуудай улад зон шинии болон хажуугаархи һууринуудайш зоной хэһэн муу муухай үйлэ хэрэгүүдые хэзээдэшье хэжэ байгаагүй гэжэ Би, Эзэн Бурхан, Өөрөөрөө батадхан соносхоноб.

⁴⁹ Содом дүүшни басагадтаяа хамта дээрэлхүү зантай, элбэг дэлбэг эдеэ хоолтой, амгалан тайбан байдалтай байһан аад, ядуу байдалтай, үгытэйшүүлдэ туһалдаггүй һэн.

⁵⁰ Бусадһаа дээрэбди гэжэ тэдэ бэеэ тоолоод, Минии үзэн ядадаг үйлэ хэрэгүүдые хээ. Тиимэһээ харамсаараа Би тэдэниие һандаргааб.

⁵¹ Таанад, Иерусалимай улад зон, Самариин зонһоо хоёр дахин үлүү нүгэл хээт. Эгэшэ, дүү болохо Самари, Содом гэгшэдһээ бүри жэгшүүритэй хэрэгүүдые ши хэжэ, шамтай зэргэсүүлбэл, хэрэгүүдэйнь долоон дээрэ, арюун байһые элирүүлбэш.

⁵² Тиигээд мүнөө ши нэрээ хухарһанаа амасан бай. Самари, Содомдо орходоо шинии нүгэл хүндэ, тиимэһээ хэһээлтэшни хүндэ байха. Мүнөө эшэжэ улайжа, нэрээ хухарһанаа амасажа бай.

⁵³ Нэгэтэ Би Содом, Самариие хажуугаархи һууринуудтайнь хамта үргэн һэргээхэб. Мүн Би шамайешье, Иерусалим, һэргээн бодхоохоб.

⁵⁴ Тиихэдэм өөрынгөө үйлэ хэрэгүүдэй түлөө ши эшэхэш, Содом болон Самари шамһаа багаар нүгэл үйлэдэһэндөө баясан байха.

⁵⁵ Иигэжэ Содом болон Самари хажуудахи һууринуудтаяа хамта һөөргөө һэргэн бодохо. Би шамайешье, Иерусалим, һууринуудтайш хамта һэргээн бодхоохоб.

⁵⁶ Иерусалим, ши дээрэлхүү бардам зан гарган байха үедөө Содом тушаа хорон үгэ хэлэдэг, ехэрхэдэг бэлэйш.

⁵⁷ Харин мүнөө бүгэдэ шинии хорон мууе хаража ойлгоо. Араамай, Пилиштын зон, мүн тиихэдэ бусад хүршэнэршни шамайе үзэн ядажа, зэмэлэн байна.

⁵⁸ Өөрынгөө забхай һальхай ябадалай, жэгшүүрилтэ муухай хэрэгүүдэй түлөө ши хэһээгдэхэ ёһотойш. Энэ болбол Би, Эзэн Бурхан, айладхана мүн!

Найдал байха!

⁵⁹ Ши өөрынгөө хэлсээ, тангаригые эбдээш, тиимэһээ Би тон тиимээр шамда хандахаб.

⁶⁰ Гэбэшье залуу хонгор байхадаш шамтай баталһан хэлсээгээ Би мартахагүйб, энэ хадаа хэтэ мүнхэдөө хүсэндөө байха гээд найдуулхаб.

⁶¹ Эгэшэ, дүүгээ һөөргэнь абажа байхадаа өөрынгөө хэһэн хэрэгүүдые һанажа, ши эшэхэш. Хэлсээгээр иимэ юумэ баталаагүйшье хадаа Би тэдэниие шамда басагад болгон үгэхэб.

⁶² Хэлсээгээ һэргээн сахин байхадам, ши Намайе Эзэн гэжэ мэдэрхэш.

⁶³ Хэһэн юумыеш Би хүлисэхэб, гэбэшье ши тэдэниие мартахагүйш, үгэшье хэлэхэеэ эшэжэ байхаш. Энэ болбол Би, Эзэн Бурхан, айладхана мүн!