Эзэкээл 15 - Библи

Иерусалим болбол хэндэшье хэрэггүй мүшэр мүн

¹ Эзэн намда иигэжэ айладхаба:

² – Хүнэй үри Эзэкээл! Үзэм модоной мүшэр бусад мододой мүшэрһөө юугээрээшье дээрэ бэшэ.

³ Юушьеб дархалхын тула тэрээниие хэрэглэжэ боломоор гү? Хубсаһа хунар үлгэхэеэ хадааһашье тэрээгээр хэжэ болохоор гү? Үгы!

⁴ Гансал гал түлихэдэ тэрэ хэрэгтэй. Хоёр үзүүрынь шатажа, дунда хэһэгынь нүүрһэн болоходо, тэрээгээр ямар нэгэн юумэ хэжэ боломоор гү?

⁵ Бүрин бүтэн байхадань юумэ хэжэ боломоор бэшэ байгаа. Мүнөө галда шатаагдаад байхадаа тэрэ бүришье хэрэггүй болоол!

⁶ Энэ болбол Эзэн Бурханай айладхал үгэнүүд: – Ой сооһоо үзэмэй модо абажа, галда шатааһандал, Иерусалимай улад зониие абажа, гал руу хаяхаб!

⁷ Хэһээхэб тэдэниие. Нэгэ гал дүлэнһөө гарахадаа, тэдэ нүгөө гал дүлэн руу орожо шатаагдаха. Минии тэдэниие хэһээжэ эхилхэдэ таанад Намайе Эзэн гээд мэдэхэт.

⁸ Тэдэнэй Намда урбаһанай түлөө Би энэ орон нютагые зэлүүд хооһон газар болгохоб. Энэ болбол Би, Эзэн Бурхан, айладхаа мүн!