Эзэкээл 12 - Библи

Ерээдүй һандарал тухай

¹ Эзэн намда иигэжэ айладхаа:

² – Хүнэй үри Эзэкээл! Үгэ дууладаггүй зоной дунда ажаһуунаш. Тэдэ нюдэтэй аад, юушье харадаггүй, шэхэтэй аад, юушье дууладаггүй, юуб гэхэдэ, үгэ дуулахаяа һананагүй.

³ Тиимэһээ ши, хүнэй үри Эзэкээл, сүлэлгэ руу нүүхэдэ хэрэгтэй болохо зөөриеэ бэлдэжэ, бүрэг бараг болоогүйдэ, гэгээн сагаан үдэр дунда, хараһаар байтарнь гаргаарай. Ондоо газар руу нүүхыешни тэдэ хаража байг, тиихэдэ тэдэ үгэ дууладаггүйгөө ойлгохо аалам.

⁴ Сүлэлгэдэ хэрэгтэй зөөриеэ үдэртөө хараһаар байтарнь бэлдээд, сүлэлгэдэ ошохоёо үдэшэлэн хараһаар байтарнь гараарай.

⁵ Хараһаар байтарнь хана нүхэлжэ, зөөриеэ тэрэ нүхөөр гаргаарай.

⁶ Хаража байхадань үдэшын бараагаар зөөриеэ үргэлөөд, хайшаашье ошоһоноо харахагүйгөөр нюдэ нюураа бүтүүлээд, гаража ошоорой. Ши хадаа Израилиин арад түмэндэ Минии харуулһан дүлгэ тэмдэг болонош.

⁷ Тиигэжэ би захирһанайнь ёһоор хээ һэм. Үдэр байхада би өөрын зөөриеэ сүлэлгэдэ хэрэгтэй ашаан мэтээр гаргабаб. Тиигээд үдэшэ, харанхы боложо байхада гараараа ханада нүхэ нүхэлжэ, зоной хараһаар байтар ашаагаа мүр дээрээ үргөөд ошобоб.

⁸ Нүгөөдэ үглөө Эзэн намда иигэжэ айладхаба:

⁹ – Хүнэй үри Эзэкээл! Үгэ дууладаггүй тэрэ Израилиин зоной мүнөө шамһаа «Юу хэжэ байнабта?» гэжэ асуухада,

¹⁰ иигэжэ Эзэн Бурхан айладхаа гээд тунхагла: энэ хадаа Иерусалимда захиржа байгааша ноёндо болон тэндэ ажаһуугааша Израилиин бүхы арад түмэндэ хамаатай мэдээсэл гээд хэлээрэй.

¹¹ «Би хадаа таанадта дүлгэ тэмдэг болоноб» гээд хэлэ. Шинии энэ хэжэ байгааша зүйл тэдээнтэй тохёолдохо. Сүлэлгэ руу тэдэ туугдаха, баряанда абтаха.

¹² Тэдэниие захирагша ноён харанхыда зөөриеэ мүртөө үргэлөөд, гаража ошохо. Гаража ошохынь тула тэрээндэ ханые һандаргаха. Тэрэ нюураа бүтүүлхэ. Иигэжэ тэрэ хайшаа ошожо ябаһанаа харахагүй.

¹³ Би тэрээн дээрэ Өөрынгөө гүльмэ хаяжа, барихаб. Тиигээд Вавилоон руу абаашахаб, гэбэшье тэрэ Вавилооной орон нютаг харангүй гээгдэхэ.

¹⁴ Тэрэниие хүреэлэгшэ түшэмэлнүүдые, зүбшэгшэдыень, бэеынь хамгаалдаг сэрэгшэдые найман зүгөөр сасан тараахаб. Тиигээд тэдэниие алахаяа зон бэдэрхэ.

¹⁵ Иигэжэ Минии тэдэниие үндэһэ яһатадай дундуур, ондоо улас түрэнүүдээр тараахада, тэдэ Намайе Эзэн гээд мэдэдэг болохо.

¹⁶ Үсөөхэн зонииень дайн дажарһаа, үлэн хооһон байдалһаа, үбшэ хабшанһаа аршалан амиды мэндэ үлөөхэб. Тиихэдэм тэдэ ондоо үндэһэ яһатанай дунда байхадаа ямар жэгшүүрилтэ үйлэ хэрэгүүдые хэһэнээ ойлгожо, Намайе Эзэн гээд баталан гэршэлхэ.

¹⁷ Эзэн намда иигэжэ айладхаа:

¹⁸ – Хүнэй үри Эзэкээл! Эдеэ эдихэдээ шэшэржэ, уһа уухадаа айн һүрдэн уу.

¹⁹ Минии, Эзэн Бурханай, орон нютагтаа үшөө ажаһуужа байгааша Иерусалимай улад зондо иигэжэ тунхаглаһыемни дуулга: тэдэ эдеэ барихадаа шэшэржэ, уһа уухадаа айжа һүрдэжэ байха. Муу муухай хэрэгүүдэйнь түлөө газарынь гандан хатажа, таряан ургахагүй.

²⁰ Олон зонтой хото һууринуудынь һандаргагдаха, орон нютагынь хооһорхо. Тиихэдэ тэдэ Намайе Эзэн гээд мэдэрхэ.

²¹ Эзэн намда иигэжэ айладхаба:

²² – Хүнэй үри Эзэкээл! «Саг ябажал байха, харин уридшалан айладхаһан лүндэнүүд бэелүүлэгдэнэгүй» гэһэн үгэнүүдые зон юундэ дабтанаб, юундэ зүйр үгэ тэрэ болооб?

²³ Намайе, Эзэн Бурханиие, иигэжэ айладхана гээд тэдээндэ хэлэ: тэрэ зүйр үгые үгы хэхэб, Израиль соо тэрэ бэшэ дуулдахагүй. Тэрэнэй орондо тэдэ иимэ үгэнүүдые дабтадаг болог лэ – «саг ерэжэ, уридшалан хэлээшэ юумэн бэелүүлэгдэжэ эхилбэ!»

²⁴ Израилиин улад зоной дунда худал үзэгдэл хараха ушар, хуурмаг зүн, лүндэн табиха гээшэ бэшэ гарахагүй.

²⁵ Би, Эзэн, тэдээнтэй хөөрэлдэхэб, тиигээд Минии айладхал бэелүүлэгдэхэ, удаархагүй. Үгэ дууладаггүй зон, танай наһанай үргэлжэлдэ Би айладхаһанаа бэелүүлхэб. Энэ болбол Би, Эзэн Бурхан, айладхана мүн!

²⁶ Эзэн намда иигэжэ айладхаа:

²⁷ – Хүнэй үри Эзэкээл! Үзэһэн үзэлшни болон табиһан зүншни бэелдэхэнь үды, хэзээ нэгэтэ, олон жэлнүүдэй үнгэрһэнэй удаа бэелдэхэ гэжэ Израилиин улад зон һанажа байна.

²⁸ Тиимэһээ тэдээндэ Минии, Эзэн Бурханай, иигэжэ айладаһые дуулга: «Минии нэгэшье үгэ удаархагүй. Айладхални тэрэ дары бэелүүлэгдэхэ. Энэ болбол Би, Эзэн Бурхан, тунхаглана мүн!»