Еврейнүүдтэ 8 - Библи

Христоос болбол Шэнэ Хэлсээнэй дамжуулагша ба Ахамад Санаарта

¹ Хэлэжэ байһан юумэнэймнай гол удха: бидэ тэнгэридэ Үндэр дээдэ түрэлтын баруун талада һууһан Ахамад Санаартатайбди.

² Тэрэ болбол хүнүүдэй гараар бариһан бэшэ, харин Эзэнэй бодхооһон бодото майханда, хамагай нангин газарта ахамад санаартынгаа үүргэ гүйсэдхэжэ байна.

³ Ямаршье ахамад санаарта Бурханда үргэл асархаар, тахил тахихаар табигдадаг, тиин манайшье Ахамад Санаарта үргэхэ юумэтэй байха ёһотой.

⁴ Хэрбээ Тэрэмнай газар дэлхэй дээрэ байбал, санаарташье бэшэ байха һэн, юундэб гэхэдэ, газар дэлхэйн санаартад Хуулиин ёһоор лэ үргэлнүүдые асардаг.

⁵ Тэдэ санаартад ажалаа хэхэдээ, үнэн дээрээ тэнгэриин юумые һажаана, тэнгэриин юумэнэй һүүдэрынь лэ болоно. Тиимэл юумэн Моисейтэй тохёолдоо. Тэрэнэй майханаа татаха гэжэ байхада, Бурхан тэрээндэ: «Хада дээрэ шамда яажа харуулаа һэмбиб, тон тиимээр жэншэдгүй наринаар бүтээхэ ёһотойш», – гэжэ айладхаа.

⁶ Үлүү һайн найдуулга дээрэ үндэһэлһэн Бурханай болон Тэрэнэй хүнүүдэй хоорондохи Иисүүсээр дамжаһан хэлсээн хэды ехэ һайн гээшэб. Тон тиигэжэл Иисүүстэ мүнөө тэдэ санаартадта орходоо бүри эрхим түгэс албан тушаал үгтөө.

⁷ Хэрбээ түрүүшын хэлсээн дутагдалгүй байбал, хоёрдохи хэлсээнэй хэрэггүй байха һэн даа.

⁸ Зүгөөр Бурхан арадаа зэмэлэн, иигэжэ айладаба: «Үзэгты, Израилиин болон Иудын үри һадаһадтай Минии шэнэ хэлсээ баталха үдэрнүүд дүтэлнэ гээд Эзэн хэлэнэ.

⁹ Энэ хэлсээн тэдэнэрэй үбгэ эсэгэнэрые гарһаань хүтэлэн Египедһээ гаргаха гэһэн үдэр тэдэнтэй баталһан хэлсээндэл адли бэшэ байха. Үбгэ эсэгэнэрынь Минии хэлсээе сахидаггүй байгаа, тиимэһээ Би тэдэниие тоохоёо болёоб.

¹⁰ Тэдэ үдэрнүүдэй һүүлдэ Израилиин арадтай баталха хэлсээн иимэ: Өөрын хуулинуудые тэдэнэй һанал бодолдо хадуулгахаб, зүрхэ сэдьхэлдэнь бэшэхэб. Би тэдэнэй Бурхан, тэдэ Минии арад түмэн болохо гэжэ Эзэн хэлэнэ.

¹¹ Тэдэнэй хэнииньшье Эзэниие мэдэ гэжэ нүхэдөө гү, али аха дүүнэрээ һургахагүй, юундэб гэхэдэ, тэдэ багаһаа томо хүрэтэрөө бултадаа Намайе мэдэжэ байха.

¹² Би тэдэнэй зэмые хүлисэжэ, нүгэл тухайнь дахин дурдахагүйб».

Христоос эрхим түгэс тахил мүн

¹³ Шэнэ хэлсээн тухай хэлэхэдээ Бурхан түрүүшын хэлсээнэй хуушарһые харуулаа, тиихэдэ хуушаржа ба үмхиржэ байһан юумэн мэнэ гэһээр лэ һүнэн һаладаг.