Еврейнүүдтэ 7 - Библи

Христоос хэтэдээ бодото ахамад санаарта

¹ Мэлхицээдэг болбол Шалээмэй хаан, Дээдэ Бурханай санаарта байгаа. Абраһаамай дүрбэн хаашуулые дараад, дайнһаа бусажа ябахадань, Мэлхицээдэг тэрээнтэй ушаржа, үршөөл хайрадаа хүртөөгөө бэлэй.

² Тиин Абраһаам байһан юумэнэйгээ арбанай нэгэ хубиие Мэлхицээдэгтэ үгөө. Мэлхицээдэгэй нэрынь нэгэ удха болбол «үнэн сэдьхэлэй хаан»; тиихэдэ Шалээмэй хаан байһан хадань тэрэнэй нэрэ үшөө «энхэ тайбанай хаан» гэһэн удхатай.

³ Тэрэ эхэ эсэгэгүй, угай бэшэггүй; тэрэнэй түрэһэн гү, али үхэһэн тухай гэршэлгэ байдаггүй. Тэрэ Бурханай Хүбүүндэ тон адли, хэтэдээ санаарта байха.

⁴ Тэрэнэй агууехэ байһые таанар харагты. Манай үбгэ эсэгэ Абраһаам дайнда олзолһон бүхы юумэнэйнгээ арбанай нэгэ хубиие тэрээндэ үгөө.

⁵ Санаартадаар табигдаһан Левиин үри һадаһад Хуулиин ёһоор баһал Абраһаамай үри һадаһад байһан өөрынгөө аха дүүнэрһээ, Израилиин арад түмэнэй олзын арбанай нэгэ хубиие суглуулха эрхэтэй.

⁶ Мэлхицээдэг болбол Левиин үри һадаһан бэшэшье һаа, Абраһаамһаа арбанай нэгэ хубииень абаад, Бурханай найдуулгада хүртэһэн тэрэ Абраһаамые үршөөл хайрадаа хүртөөгөө.

⁷ Үршөөлдөө хүртөөжэ байһан хүнэй үршөөгдэжэ байһан хүнһөө үлүү дээгүүр байһаниинь арсашагүй.

⁸ Эндэ арбанай нэгэ хубиие суглуулжа байдаг санаартад үхэлтэ хүнүүд юм, харин тэндэ арбанай нэгэ хубиие абаһан Мэлхицээдэг амиды гэжэ гэршэлэгдээтэй.

⁹ Абраһаамай арбанай нэгэ хубиие түлэхэдэ, Левийшье (үри һадаһадынь арбанай нэгэ хубиие суглуулдаг) өөрөө баһал түлөөһэ үгэһэн болоно.

¹⁰ Мэлхицээдэгэй Абраһаамтай уулзахада, Левий үшөө түрөөгүй, харин үбгэ эсэгэ Абраһаамайнгаа досоонь байгаа гэжэ хэлэмээр.

¹¹ Израилиин арадта үгтэһэн Хуулиин ёһоор левидүүд санаартан болоо. Хэрбээ левидүүд түгэс түгэлдэр санаартад байбал, Аароной табиһанаар бэшэ, харин Мэлхицээдэгэй заяаһанаар ондоо санаартын гаража ерэхын хэрэг үгы һэн даа.

¹² Санаарталгын ээлжэлгэ хубилбал, Хуулииншье тогтоолнууд хубилгагдаха ёһотой байдаг.

¹³ Бидэнэй дурдаһан Эзэн ондоо обогой хүн байгаа, тиин обогойнь нэгэшье хүн санаартын алба гүйсэдхээгүй.

¹⁴ Эзэн болбол Иудын обогой гэжэ һайн мэдээжэ. Санаартад тухай асуудал хүндэхэдөө, Моисей энэ обог тухай юушье хэлээгүй.

¹⁵ Мэлхицээдэгтэл адли ондоо санаартын бии болоһониинь эндэһээ бүри элеэр харагдана.

¹⁶ Тэрэ Хуулиин ёһоор гү, али тогтоолоор бэшэ, харин дууһашагүй амидаралай хүсөөр санаарта болоо.

¹⁷ «Мэлхицээдэгтэ адли Ши хэтын хэтэдэ санаарта байхаш», – гэжэ Нангин Бэшэг соо хэлэгдэнэ.

¹⁸ Хуушан тогтоол бирагүй, аша туһагүй байһан дээрэһээ мүнөө хүсэгүй болгогдонхой.

¹⁹ Моисейн Хуули ямаршье юумые эрхим түгэс болгоогүй. Тиимэһээ маанадай Бурханда ойртохын тула мүнөө бүри һайн найдуулга үгтэнэ.

²⁰ Тиихэдэ үшөө Бурханай тангариг үгтөө. Ондоо хүнүүдэй санаарта болоходо, Бурхан тиимэ тангариг үгөөгүй һэн.

²¹ Харин Иисүүс болбол Бурханай Тэрээндэ үгэһэн тангаригай ёһоор санаарта болоо: «Эзэн „Ши хэтын хэтэдэ санаарта байхаш“ гээд тангариглаа, тиин айладхаһан үгөө бусаажа абахагүй».

²² Энэ илгаа Иисүүсые баһал бүри һайн хэлсээнэй найдабари болгоно.

²³ Ондоошье илгаа: бусад санаартад үхэдэг ушарһаа ехэ олон байгаа.

²⁴ Харин Иисүүсэй мүнхэ амидаржа байһан хадань Тэрэнэй санаартын албан баһа мүнхэ юм.

²⁵ Тиимэһээ зониие үргэлжэ абаржа байха аргатай Тэрэ санаарта хэтын хэтэдэ амиды байжа, Тэрээгүүр дамжан Бурханда ерэһэн хүнүүдэй түлөө Бурханай урда гуйдаг.

²⁶ Үнэндөө Иисүүс маанадтал хэрэгтэй Ахамад Санаарта юм. Тэрэ болбол арюун гэгээн; харата хэрэгүүдые үйлэдөөгүй, нүгэл шэбэлдэ унаагүй; нүгэлтэ зонһоо илгаруулагдаад, тэнгэридэ дэгдүүлэгдээ.

²⁷ Ондоо ахамад санаартадтал адли түрүүн өөрынгөө нүгэлнүүдэй түлөө, һүүлдэнь арад зоной нүгэлнүүдэй түлөө үдэр бүхэн үргэл асарха Тэрээндэ хэрэггүй. Тэрэ нэгэтэ, тиихэдэ хэтын хэтэдэ Өөрыгөө үргэл болгон үргөө.

²⁸ Моисейн Хуули дутагдалнуудтай хүнүүдые ахамад санаартаар табидаг, харин Хуулиин һүүлдэ үгтэһэн Бурханай тангариг хододоо эрхим түгэс Хүбүүниие ахамад санаартаар табяа.