Еврейнүүдтэ 6 - Библи

^1-2 Христоосой һургаалай түрүүшын хэшээлнүүдые хойноо орхижо, урагшаа дабшаял. Үхэлдэ хүргэдэг хэрэгүүдээ орхижо, Бурханда һүзэглэхэ, уһаар арюудхаха болон гараараа адислаха тухай, үхэһэн хүнүүдэй амидырха, хэтын зарга шүүбэри тухай һургаалай һуури дахин табиха хэрэггүй.

³ Бурханай зүбшөөбэл, бидэ энэниие бэелүүлхэбди.

⁴ Һүзэг этигэлээ алдаһан хүнүүд яажа дахин гэм хэхэеэ болёод, Бурханда хандахаб? Тэдэнэр нэгэ үедэ Бурханай гэрэл туяада ябаа, тэнгэриин бэлэг абажа, Арюун Һүлдые тогтоожо абаа.

⁵ Тэдэнэр өөһэдынгөө туршалгаһаа Бурханай үгэ һайн гэжэ мэдээ, ерээдүйн зуун жэлнүүдэй хүсэ шадал мэдэжэ абаа.

⁶ Тиибэшье тэдэнэр һүзэг этигэлээ алдаа. Тэдэниие дахин нүгэлһөөнь Бурханда хандуулха аргагүй юм. Юундэб гэхэдэ, тэдэнэр Бурханай Хүбүүе дахин хэрээһэндэ хадажа, Тэрэниие хүнүүдэй урда гутааха.

⁷ Оло дахин орожо байһан бороогой уһаар уһалагдаад, эдлэжэ байгаа эзэдтээ аша туһатай ургаса үгэжэ байһан газар Бурханай үршөөлдэ хүртэнэ.

⁸ Харин тиихэдэ хашаг болон буртаг үбһэ ургуулһан газар юундэшье хэрэггүй, Бурханай хараалда арай хүртөөгүй, галда шатаагдаха хойшолонтой байдаг.

⁹ Инаг хайрата нүхэдни, маанадай иигэжэ хатуугаар хэлэжэ байһаншье һаа, таанад үлүү һайн нүхэсэлдэ байнат, тиимэһээ абарагдахат гэжэ найданабди.

¹⁰ Бурхан болбол найдабаритай үнэн сэхэ юм. Тэрэ хэһэн хэрэгүүдыетнай, бусад һүзэглэгшэдтэ туһалһан, мүнөөшье туһалан, Өөртэнь үзүүлһэн хайра дурыетнай мартахагүй.

¹¹ Таанадай найдажа байһан юумэнэй үнэн зүб байхын тулада таанадай хүн бүхэн эсэстэ хүрэтэрөө зүдхэмжэтэй байһай гэжэ хүсэнэбди.

¹² Таанадые залхуурангүй, һүзэг этигэлтэй, тэсэбэритэй байгаад, Бурханай найдуулһан юумые хүлеэжэ абадаг хүнүүдтэл адли байхыетнай хүсэнэбди.

Бурханай агууехэ найдуулга

¹³ Бурхан Абраһаамые найдуулхадаа, найдуулһанаа бэелүүлхэб гэһэн дашаа тангариг үгөө. Өөрһөөнь дээгүүр хүнэй үгы юм хада Бурхан Өөрынгөө нэрээр тангариглаа.

¹⁴ «Би шамайе үршөөл хайрадаа хүртөөхэб, олон үри һадаһадые шамда хайрлахаб гэһэн үгөө үгэнэб», – гэжэ Бурхан Абраһаамда айладхаа.

¹⁵ Абраһаам ехэл тэсэбэритэй байжа, Бурханай найдуулһанда хүртөө.

¹⁶ Бидэ тангариглахадаа, өөһэдһөө дээгүүр юумээр тангаригладагбди, тиин тангариг ямаршье арсалдаа заргалдаае үгы хэдэг.

¹⁷ Найдуулһан юумыень абаха ёһотой байһан хүнүүдтэ эрхэ хүсэлөө хубилгахагүй байһанаа элеэр харуулхын тулада Бурхан найдуулгаа тангаригаараа баталаа.

¹⁸ Бурханай худалаар хэлэжэ болохогүй, хубилдаггүй хоёр юумэн бии. Тиимэһээ бидэ урдамнай оршожо байһан найдуулга хатуугаар адхаад, ехэтэ урмашажа, Бурхантай хамтархадаа хоргодохо газар олобобди.

¹⁹ Тэрэ найдалга манай амиин бархагтал мэтэ. Тэрэ найдалга аюулгүй, бата, тэнгэриин Һүмын хүшэгэй саагуур досоонь ородог.

²⁰ Тиихэдэ Иисүүс бидэнэй аша туһада урдамнай тиишээ ороод, Мэлхицээдэгтэ адли хэтын хэтэдэ ахамад санаарта болоо.