Еврейнүүдтэ 5 - Библи

¹ Хүнүүдэй дундаһаа шэлэгдэжэ абтаһан ямаршье ахамад санаарта хүнүүдэйл аша туһада Бурханда алба хэхээр табигдадаг. Тэрэ санаарта хүнэй нүгэлые хүлисүүлхэ гэжэ Бурханда тахил тахидаг, үргэл асардаг.

² Тэрэ өөрөө олон дутагдалнуудтай ушарһаа эндүүржэ, алдуу хэжэ байһан хүнүүдые хүлисэдэг.

³ Тиимэһээ тэрэ ахамад санаарта гансал хүнэй хэһэн нүгэлнүүдэй түлөө бэшэ, харин өөрынгөө нүгэлнүүдэй түлөө баһал үргэл үргэхэ ёһотой.

⁴ Хүн өөртөө ахамад санаартын нэрэ хүндые олгодоггүй, харин Аарондол адли Бурханай уряалаар ахамад санаарта болодог.

⁵ Тон тиигэжэл ахамад санаартын нэрэ хүндые Христоос Өөрөө Өөртөө зүүгээгүй, харин «Ши Минии Хүбүүмниш. Мүнөөдэр Би Шинии Эсэгэшни болооб» гэһэн Бурхан Тэрээндэ ахамад санаартын нэрэ түрые үгөө.

⁶ Нангин Бэшэг соо нүгөө газарта Бурхан: «Мэлхицээдэгтэ адляар Ши хэтын хэтэдэ санаарта байхаш», – гэжэ хэлэнэ.

⁷ Дэлхэй дээрэ амидархадаа, Тэрэниие абарха аргатай Бурханда Иисүүс шангаар хүхирэн, нулимсаа гоожуулан зальбараа, Тэрэниие гуйгаа. Иисүүсэй номгон, үнэр шударга байһан хада Бурхан Тэрэниие дуулаа.

⁸ Бурханай Хүбүүншье һаа, зоболонгуудые дабан, Тэрэ Бурханай мэдэлдэ байжа һураа.

⁹ Эрхим түгэс болоходоо, Тэрэ үгыень дууладаг бүхы хүнүүдэй мүнхын абаралгын эхиниинь болоо.

¹⁰ Тиигээд Мэлхицээдэгтэ адляар Бурхан Тэрэниие ахамад санаарта болгожо табяа.

Этигэлээ батадхалга

¹¹ Энэ талаар бидэ олон юумэ хэлэхэ байгаабди, гэхэтэй хамта таанадай ойлгосо доройтоһон тула тайлбарилжа үгэхэмнай ехэл бэрхэшээлтэй байна.

¹² Саг хугасаагаар багсаахада, таанад багшанар болоод байха байгаат, харин Бурханай Үгын түрүүшын хэшээлнүүдые таанадта дахин дабтаха хэрэгтэй болоод байна. Хатуу хоол барихын орондо таанад һүөөр ундалха болонот.

¹³ Һүөөр тэжээлгэжэ байһан хүн бүхэн үнэн зүбые, буруугай ушарые илгаха туршалгагүй үхибүүн гээшэ.

¹⁴ Хатуу хоол бэеэ хүсэһэн хүнүүдэй эдеэн юм. Тэдэ хүнүүд туршалга дадалгатай ушарһаа һайн, муу хоёрые илгаха аргатай байдаг.