Еврейнүүдтэ 2 - Библи

Абаралгын агуу һүр жабхалан

¹ Тиимэһээ урасхалда абтахагүйн тула бидэ дуулажа абаһан юумэеэ хатуугаар сахижа байха ёһотойбди.

² Манай үбгэ эсэгэнэртэ Эльгээмэлнүүдээр дамжуулан хэлэгдэһэн Бурханай үгэ үнэн зүб байгаа. Тиин тэрэ үгые баримталаагүй, али дуулаагүй хүн хүртэхэ ёһотойл хэһээлтэдэ хүртэдэг байгаа.

³ Тиимэ агууехэ абаралгые тоонгүй, бидэ хэһээлтэһээ яажа зугадаха гээшэбибди? Эзэн энэ абаралга тухай анхан Өөрөө айладхаа. Тэрэниие дуулаһан хүнүүд абаралга болбол үнэн гэжэ бидэндэ баталан хэлээ.

⁴ Бурхан тэрэ гэршэлгэдэ элдэб янзын гайхамшагта үзэгдэлнүүдые болон дүлгэ тэмдэгүүдые нэмэн харуулжа, Өөрынгөө һайн дураар Арюун Һүлдэ хайрлаа.

⁵ Бидэнэй дурдаһан шэнэ газар дэлхэйе захиржа байхаар Бурхан Эльгээмэлнүүдые табяагүй юм.

⁶ Харин Нангин Бэшэгэй нэгэ газарта: «Хүн гээшэ юун бэ, яагаад Тэрэниие Ши һананабши? Хүнэй хүбүүн юун бэ, яагаад Ши Тэрэниие анхарнабши?

⁷ Ойро зуура Тэрэниие Ши Эльгээмэлнүүдһээ доогуур табяаш, алдар солоор ба нэрэ хүндөөр титимлээш.

⁸ Ула доронь бүгэдые оруулааш», – гэжэ бэшээтэй байдаг. Бурхан «ула доронь бүгэдые оруулаа» гэхэдээ, хүнэй мэдэлдэ хамаг юумэ үгөө гэһэн удхатай. Тиихэдэ бидэ хүнэй бүхы юумэ мэдэлдээ оруулаад байһыень үшөөл харанагүйбди.

⁹ Харин ойро зуура Эльгээмэлнүүдһээ доогуур табигдаад, Бурханай үршөөл хайраар бүхы хүнүүдэй түлөө үхэһэн Иисүүсые бидэ харанабди. Үхэлые дабажа гараад, алдар солодо ба нэрэ түрэдэ Тэрэнэй хүртэһые бидэ мүнөө харанабди.

¹⁰ Бурхан бүхы юумэ бүтээгөө, бүхы юумэн Тэрэнэй тула оршодог. Тэрэ олон үхибүүдые алдар солодоо хүртөөхэ һанаатай байгаа. Тиимэһээ хүнүүдые абаралгада Хүтэлэгшэ Иисүүсые Бурхан зоболон дабуулаад, эрхим түгэс болгоо.

¹¹ Арюудхагша ба арюудхагдаһан бүхы хүнүүд нэгэ Эсэгэтэй. Тиимэһээ Иисүүс тэдэниие аха дүүнэрни гэжэ нэрлэхэеэ эшэдэггүй.

¹² Иисүүс: «Би аха дүүнэртээ Танай нэрые хэлэхэб, сугларагшадай дунда Таниие магтахаб», – гэжэ Бурханда хэлээ.

¹³ Тэрэ үшөө: «Би Тэрээндэ этигэнэб, Тэрээндэл найданаб», «Бурханай Намда даалгаһан үхибүүдтэй Би мүнөө эндэ байнаб», – гэжэ хэлээ.

¹⁴ Үхибүүдэй махабад бэе ба шуһанһаа бүридэһэн хадань Иисүүс Өөрөө тэдэнтэйл адли хүн болоо. Үхэлые эрхэ мэдэлдээ абаад байһан шолмосые Өөрынгөө үхэлөөр хүсэгүй болгохын тула,

¹⁵ үхэлһөө айжа бүхы наһаараа барлагууд байһан хүнүүдые сүлөөлхын тула Тэрэ тиимэ юумэ бүтээгээ.

¹⁶ Эзэн үнэндөө Эльгээмэлнүүдые дэмжэнэ бэшэ, харин Абраһаамай удамые дэмжэнэ.

¹⁷ Найдабаритай ба үршөөл хайратай Ахамад Санаарта болоод, бүхы хүнүүдэй нүгэлнүүдыень хүлисүүлхын тула Бурханда алба хэжэ байхадаа, Өөрынгөө аха дүүнэртэй адли болохо ёһотой байгаа.

¹⁸ Тэрэ Өөрөө туршуулжа, зоболон эдлэһэн ушарһаа мүнөө туршалгада ороһон хүнүүдтэ туһалха аргатай юм.