Еврейнүүдтэ 1 - Библи

Хүбүүгээрээ дамжуулһан Бурханай Үгэ

¹ Урдандаа Бурхан лүндэншэдөөр дамжуулжа элдэб аргаар, олон удаа манай үбгэ эсэгэнэртэ үгэ хэлэдэг байгаа.

² Харин һүүлшын эдэ үдэрнүүдтэ Тэрэ Хүбүүгээрээ дамжуулан бидэндэ хэлэнэ. Бурхан Хүбүүнэйнгээ ашаар замбуулин дэлхэйе бүтээжэ, бүхы юумые залгамжалхаар Тэрэнээл һунгаа.

³ Бурханай алдарай туяа сасаруулан, Бурханай шанар шэнжэтэй байжа, Тэрэ бүхы замбуулин дэлхэйе Өөрын үгын хүсөөр баридаг. Бидэниие нүгэлнүүдһээмнай арилгаад, огторгой дээрэ һүр жабхаланта Бурханай баруун талада һуугаа.

⁴ Бурханай Хүбүүнэй нэрэ түрэ Эльгээмэлнүүдэй нэрэ түрэһөө аргагүй шухала, тиин Хүбүүн Өөрөөшье Эльгээмэлнүүдһээ холо дээгүүр юм.

Бурханай Хүбүүн Эльгээмэлнүүдһээ дээгүүр

⁵ «Ши Минии Хүбүүмниш. Мүнөөдэр Би Шинии Эсэгэшни болооб», – гэжэ Бурхан Өөрынгөө Эльгээмэлнүүдэй нэгэндэньшье хэлээ аал? «Би Тэрэнэй Эсэгэнь болохоб, Тэрэ Минии Хүбүүн болохо», – гэжэ Бурхан нэгэшье Эльгээмэл тухай хэлээ аал?

⁶ Тиихэдэ Бурхан Өөрынгөө ууган Хүбүүе дэлхэй руу эльгээхэдээ: «Бурханай бүхы Эльгээмэлнүүд Тэрээндэ мүргэхэнь болтогой», – гэжэ хэлээ.

⁷ Харин Эльгээмэлнүүд тухай: «Ши һалхиие Өөрын Эльгээмэл, галай дүлэ Өөрын зараса болгонош», – гэжэ Бурхан хэлээ.

⁸ Гэхэдэ Хүбүүн тухайгаа Бурхан: «Хан шэрээшни Бурханай шэрээ мэтэ, хэтэ мүнхэдөө оршохо. Хаанта баягшни – зүб шударга ёһын баяг.

⁹ Ши үнэн зүбтэ дуратайш, муу юумэ үзэн яданаш. Энээнэй түлөө Бурхан, Шинии Бурхан, хажуудашни байһан хэнииешье баярай тоһоор тоһодоогүй, харин гансал Шамайе тоһодон ёһолоол!», – гэжэ айладаа.

¹⁰ Тэрэ үшөө иигэжэ айладхаа: «Ши, Эзэн, анха түрүүн газар дэлхэйе бүтээгээш, Өөрын гараар огторгойе байгуулааш.

¹¹ Тэдэ һүнэхэ, харин Ши үлэхэш. Тэдэ юумэнүүдшни хубсаһан мэтэ үмхирхэ.

¹² Ши тэдэниие хубсаһандал адли эбхэхэш, хубсаһандал мэтэ һэлгэхэш. Харин Ши Өөрөө хододоо хэбээрээ байхаш, тиин үдэрнүүдшни дууһахагүй».

¹³ Бурхан Өөрынгөө Эльгээмэлнүүдэй нэгэндэньшье: «Бузар дайсадыеш хүл дорош дэбһүүлэн табитарни баруун гар таладам һуугаарай», – гэжэ хэлээгүй.

¹⁴ Тиихэдээ Эльгээмэлнүүд хэд гээшэб? Тэдэ Бурханда алба хэжэ, абарагдаха ёһотой хүнүүдтэ туһалхаар Бурханай эльгээһэн һүлдэнүүд гээшэ.