Эстээр 6 - Библи

Мордохайн дэгдэлгэ ба Һамаанай доройтолго

¹ Хаан тэрэ һүни унтажа ядаад, хан түрын түүхэтэ үйлэ хэрэгүүдые тэмдэглэһэн үдэр бүриин дэбтэр асаруулжа уншуулба.

² Хаанай бэе хамгаалагшад болохо Бигтаан ба Тээрэшэй эзэн хааниие алаха гэжэ байһые мэдээд, Мордохайн хаанда дуулгаһан тухай тэмдэглэл тэндэ уншахадань,

³ хаан: – Энээнэй түлөө Мордохайда ямар хайр шагнал үгтөөб? – гэжэ асууба. – Юуншье үгтөөгүй, – гэжэ түшэмэлнүүдынь харюусаба.

⁴ – Хэн газаа ерээд байнаб? – гээд хаан асууба ха. Бэлдэһэн үлгэхэ баханадаа Мордохайе үлгэн алаха зүбшөөл хаанһаа абаха гэжэ Һамаан ордоной дотор хашаа соо ерээд байгаа.

⁵ – Ордоной хашаа руу Һамаан орожо ерээд байна, – гэжэ түшэмэлнүүдынь хэлэбэ.

⁶ Һамаанай орожо ерэхэдэ, хаан тэрээндэ: – Хаан эгээл ехээр һайшаагдаһан хүндөө ямар хайр шагнал үгэхэ ёһотойб? – гэһэн асуудал табиба ха. Энээниие дуулахадаа, Һамаан досоогоо «Намһаа ондоо бэшэ хэндэ хаан хүндэлэл үзүүлхэеэ һанахаб даа» гэжэ бодоод:

⁷ – Дээдын ехэ хүндэлэл үзүүлхэ гэбэл, тэрэ хүндэ

⁸ хаанай үмдэдэг хубсаһа, хаанай унадаг аргамаг һайн хүлэг мори асараад, толгой дээрэнь хаанай титим табижа,

⁹ тэрэ хүниие дээдэ тушаалтай нэгэ ноёноор хубсалуулаад, мориндо мордохуулжа, ниислэл хотын бүхы гудамжаар мориие хүтэлэн ябуулха захиралта ноёндо үгэжэ, тиигээд ябажа ябахадаа, «Эзэн хаан хүндэлэл үзүүлхэ гэһэн хүнөө иигэжэ үргэмжэлэн хүндэлнэ!» гэжэ олондо мэдүүлэн хашхаран ябахые тэрээндэ даалгаха хэрэгтэй, – гэбэ.

¹⁰ – Зай, тиигэбэл, ши минии хаан хубсаһа, хүлэг мориие түргөөр абаад ерэ! Тиигээд ордоной хаалгын дэргэдэ һуудаг Мордохай иудейе абаад, энэ мүнөө хэлэгшэеэ тэрээндэ хүсэлдүүлэ! Харин хэлэһэнһээ юушье мартангүй бултыень тэрээнтэеэ хээрэй! – гэжэ хаан Һамаанда захирба.

¹¹ Һамаан хаанай хубсаһа, хүлэг мориие абажа, Мордохайе дуудан ерүүлээд, хаанай хубсаһа үмдэхүүлжэ, мориндо мордуулаад, хотын бүхы гудамжаар мори хүтэлэн ябуулжа, «Эзэн хаан хүндэлэл үзүүлхэ гэһэн хүнөө иигэжэ үргэмжэлэн хүндэлнэ!» – гэжэ олондо тунхаглан хашхаран ябаба.

¹² Удаань Мордохай ордоной хаалганууд тээшэ һөөргөө бусаба. Һамаан тиихэдэ уруу-дуруу юумэн, нюураа бүглөөд, гэр тээшээ ошоо бэлэй.

¹³ Тиигээд Һамаан Зээрэш һамгаяа, хани нүхэдөө суглуулжа ерүүлээд, өөртэйнь ямар ушарай тохёолдоһые хөөрэжэ үгэбэ. – Шамайе доошонь унагааһан тэрэ Мордохай иудей үндэһэтэн юм һаань, ши тэрэнэй урдаһаа тэмсээд, юумэ олохогүйш, харин өөрөө һүйдхэлдэ орохош, – гэжэ тэдэ сэсэн мэргэн зүблэгшэдынь ба Зээрэш һамганиинь тэрээндэ хэлээ бэлэй.

¹⁴ Үшөө хөөрэлдэжэ байхадань, хаанай тайган түшэмэлнүүд ерэжэ, Эстээрэй бэлдэһэн найр нааданда ошохые Һамааниие яаруулжа эхилбэ.