Эстээр 2 - Библи

Эстээр хатан болобо

¹ Энэ үйлэ хэрэгэй удаа Ахашвероош хаан уур сухалайнгаа буурахада, Баштии, тэрэнэй хэһэн хэрэг, тэрээн тушаа буулгаһан зарлиг тухайгаа һанаба.

² Хаанда албалжа байгаашад: – Эрэ хүниие үзөөгүй залуу һайхан басагадые танда, эзэн хаан, бэдэрэн шэлэхэнь зүйтэй.

³ Хан түрын бүхы аймаг нютагуудаар залуу һайхан басагадые шэлэн бэдэрхэ түлөөлгэтэй зониие томилыт. Тэдэ басагадые ниислэл хото Сүүзэдэ, ордоной эхэнэрнүүдэй таһагта асараг. Басагад, эхэнэрнүүдэй харуулшан, тайган түшэмэл Хигайн харууһан доро үгтэхэ, тэдээндэ гоё һайханаар анхилһан түрхидэг тоһон үгтэдэг байха.

⁴ Хаанай һанаанда таараһан басаган Баштиин орондо хатан болог лэ, – гэлдэбэ. Энэ зүбшэл хаанда һайшаагдажа, тэрэ тон тиимээр хэрэг ябуулба.

⁵ Тэрэ үедэ Яһиирай Мордохай гэдэг иудей хүн ниислэл хото Сүүзэдэ ажаһуугаа. Яһиир хадаа Шимэйн, Шимэй Киишэй, уг удамаараа Бэньямиинэй обогой болохо.

⁶ Урдань Вавилоон уласай хаан Навуходоносор Иерусалим хото эзэлжэ, Иудын хаан Ехонияатай хамта олон зониие олзолон нүүлгэһэн, Мордохай тэдэнэй хоорондо байһан ушарһаа иимэ замаар Сүүзэдэ асарагдаад, амидаржа байгаа.

⁷ Мордохайн үеэлэ үхин Һадассаагай эхэ эсэгынь хоюулаа наһа барахада, Мордохай басагые үргэн абажа, түрэһэн басагандаа мэтээр хандажа, тэнжээгээ бэлэй. Басаганай нэрэ «Һадассаа», гэбэшье тэрэ «Эстээр» гэжэ үшөө ондоо нэрэтэй һэн. Тэрэ үзэсхэлэн һайхан, тэгшэ гоё бэетэй басаган бэлэй.

⁸ Эзэн хаанай зарлиг тогтоол тунхаглагдажа, түшэмэлнүүдынь олон басагадые ниислэл хото Сүүзэдэ асаржа, эхэнэрнүүдэй хүреэлэнгэй захирагша Хигайн харууһан доро үгэжэ байба. Эстээр басаган тэдэнэй тоодо мүн лэ асарагдаба.

⁹ Эстээр Хигайда угаа һайшаагдажа, тэрэ дары басаганда һайхан хангалтай тоһон, тусхай хоол үгтэдэг болобо. Ордоной зараса эхэнэрнүүдэй дундаһаа долоон зараса басагадые Эстээртэ үгэжэ, Хигай Эстээрые шэбэгшэнэртэйнь хамта эхэнэрэй гэрэй эгээл һайн хубида байрлуулба.

¹⁰ Мордохайн заабарилһанай ёһоор Эстээр өөрынгөө түрэл гарал, үндэһэ угсаатан тухай хэндэшье хэлэдэггүй һэн.

¹¹ Эстээрэй хэр амидаржа байһан тухай мэдэхын тула үеэлэ аха Мордохайнь үдэр бүри эхэнэрнүүдэй хүреэлэнэй хашаа руу ерэдэг һэн.

¹² Басагад хаанда орохын урда тээ арбан хоёр һарын туршада бэеэ гоё һайхан болгоод, ээлжээнэй ёһоор ородог һэн: зургаан һарын туршада смирна модоной дабирхайгаар бэеэ аршуулдаг, үшөө зургаан һарын туршада ондоо хангалтама һайхан зүйлнүүдээр бэеэ гоё болгодог бэлэй.

¹³ Тиигээд лэ тэдэ хаанда ородог байгаа. Хаанда ошохын урда тээ эриһэн лэ юумэнь, хубсаһа хунар, зүүдхэл тэдээндэ үгтэдэг һэн.

¹⁴ Хаанай үргөө руу басаган үдэшэ ороод, үглөөнь эхэнэрнүүдэй хүреэлэн руу бусажа, тэрээнһээ хойшо бага хатанай үргөөдэ амидарха ёһотой байба. Хаанай тайган түшэмэл Шаашгааз гэдэг хүн тэрэ үргөөгэй түлөө харюусадаг һэн. Хаанай талархажа, дахин тэрэ басагые нэрээрнь нэрлэн дуудаагүйл һаа, тэрэ һөөргөө хаанда хэзээдэшье оруулагдадаггүй бэлэй.

¹⁵ Абиһааилай басаган Эстээр, Мордохайн үеэлэ, үргэмэл басаганиинь, хаанда орохо сагайнгаа ерэхэдэ, хаанай тайган түшэмэл Хигай гэгшын зүбшэлэй ёһоор хубсаһа хунар үмдэжэ, гоёолто зүүжэ тааруулба. Тэрэ бэшэ юушье эрибэгүй. Эстээрые хараһан хүн бүхэн өөрыень һайхашаажа байба.

¹⁶ Ахашвероош хаанай шэрээдэ заларһанай удаа долоодохи жэлэй арбадахи һарада, иудейнүүдэй тоололгоор, тэбээт һарада, Эстээрые хаанай үргөөдэ оруулба.

¹⁷ Эзэн хаан бусад басагадһаа үлүүгээр Эстээртэ дурлажа, энхэрэн илдамаар хандажа, толгой дээрэнь хатанай титим табижа, Баштиин орондо хатан болгон үргэбэ.

¹⁸ Тиигээд хаан Эстээрэй хүндэдэ найр наада хэжэ, бүхы түшэмэл, захирагшадые урижа, аймаг бүхэндэ энэрэл хайра үзүүлжэ, баян бэлэгүүдые тарааба.

Мордохай хаанай ами наһа абарна

^19-20 Басагадые хоёрдохиёо суглуулган болоходошье, хатан болотороошье Эстээр ямар түрэл гаралтай, ямар үндэһэ яһатанай хүн байһанаа хэндэшье энэ болотор хэлэдэггүй бэлэй. Мордохайн харууһан доро байһандал адляар үгыень сахин дүүргэдэг һэн. Энэ үедэ Мордохай хаанай ордон соо ажаллаха болобо.

²¹ Хаанай ордондо Мордохайн уялгаяа дүүргэжэ байхада, харуулшад Бигтаан Тээрэш хоёр хаанда дурагүйдэн, амииень таһалхаар хэлсэжэ байба.

²² Энээниие дуулахадаа, Мордохай Эстээр хатанда хэлэбэ. Эстээр энээниие хаанда дамжуулжа, Мордохайн мэдүүлһэн тушаа мэдээсэбэ ха.

²³ Хаан энэ мэдээ шалган үзөөд, үнэн байһыень баталжа, үнөөхи хоёрые модондо үлгэн саазалба. Хаанай зарлигай ёһоор энэ үйлэ ябадал уласай үдэр бүриин дэбтэртэ тэмдэглэн бэшэгдээд хадагалагдаба.