Ерэмияа 6 - Библи

Хэһээлтэ тушаа үшөө дахин

¹ Бэньямиинэй үри һадаһад, ами наһаяа абархаяа Иерусалимай хотонуудһаа тэрьедэн ошогты! Гай гасалан, агууехэ сүйд хойто зүгһөө болохоёо байна гэжэ Тэкооһада бүреэ үлеэжэ, Бэт-Һахээрэмдэ һэргылэмжын тугуудые үргэгты.

² Гоё һайхан эрхэ тангил Сионой басаган усадхагдаха.

³ Ондоо орон нютагуудай удамаршад улад зонтоёо тэрээн руу ерэжэ, тойруулан хаа-хаанагүй майхангуудые татаха, өөр өөрынгөө хубида зонхилхо.

⁴ Тэдэ иигэжэ хэлэхэ: «Иерусалимда дайлахаяа бэлдэгты! Зэһэгты! Үдын тэнгээр добтолое!» Удаань тэдэ: «Дан орой болоо. Үдэр дууһажа, үдэшын һүүдэр ута боложо байна.

⁵ Һүниндөө добтолое. Хотын хэрэм үгы хэе!» – гэлдэхэ.

⁶ Иерусалимые бүһэлхэеэ модо отолжо, ханануудайнь дэргэдэ хашаа барихыень эдээндэ Түмэн Сэрэгтэ Эзэн захираа: «Би энэ хотодо хэһээлтэ амасуулхаб, юуб гэхэдэ, тэрээн соо дарлалта-харшалалта ходо боложо байна.

⁷ Хабсагайда сабшан бүтээгдэһэн амһарта соо уһанай хододоо шэнэлэгдэн байдагтал, хото соо шэнэ муу муухай ябадал хододоо болон байна. Хүсэрхэл болон һандарал тухай мэдээнүүд тэндэһээ дуулдана. Минии хараха юумэн гэхэдэ, гансал үбшэн болон шарханууд.

⁸ Иерусалим! Ухаа орыш! Үгы һааш, Би шамһаа буруу хаража, хэнэйшье ажаһуудаггүй хооһон газар шамайе болгохоб», – гэжэ Тэрэ айладхана.

Үгэ дуулахагүй Израиль

⁹ Түмэн Сэрэгтэ Эзэн үшөө иигэжэ хэлэбэ: – Бүхы алим жэмэсээ абхуулһан үзэмэй модон мэтэ Израиль болохо. Тиимэһээ ши үрдижэ, гараа мүшэр руу һарбайгыш.

¹⁰ Би: «Хэндэ хэлэхэбиб, хэндэ заабарилхабиб, хэн намайе дуулахаб? Тэдэ үсэд, Танай захяа дуулахаяа арсана. Айладхаһан үгэнүүдыетнай дүүргэнэгүй.

¹¹ Эзэмни, тэдэнэй урдаһаа Танай уур хилэнгээр би мүн лэ халинхайб, досоогоо энээниие багтаажа ядажа байнаб». Тиихэдэм Эзэн намда иигэжэ хэлээ: – Уур хилэнгыем үйлсэдэхи үхибүүд болон сугларһан залуушуул дээрэ адха. Үбгэд, һамгад баряанда абтаха, үндэр наһатай үбгэдшье баряанда туугдан абтахал.

¹² Тэдэнэй гэрнүүд, таряалангууд болон һамгадынь ондоо зондо үгтэхэ. Юуб гэхэдэ, Би энэ орон нютагай ажаһуугшадые хэһээхэ һанаатайб.

¹³ Ушарынь гэхэдэ, хүн бүхэн, бага, ехэ хамаагүй, гансал ашаг олзодо шунанхай. Лүндэншэһөө эхилээд, санаартан хүрэтэр бултадаа зониие мэхэлнэ.

¹⁴ Арадаймни хүндэ шархануудай багахан шулгархай байһан мэтэ тэдэ хайша хэрэгээр тэрэнииень эмшэлнэ. «Бүхы юумэн һайн» гээд тэдэ хэлэнэ. Теэд һайн юумэн үгы!

¹⁵ Тэдэ өөһэдынгөө үйлэдэһэн бузар муу муухайһаа эшэнэ гү? Үгы, огто эшэнэгүй. Улайхаяашье тэдэ мэдэхэгүй ха. Тиимэһээ бултандал адли тэдэ хэһээгдэхэ. Улад зониие шүүбэрилхэеэ ерэхэдээ, Би тэдэниие газар руу шабхадан унагаахаб! Энэ болбол Би, Эзэн, айладхана мүн!

Израиль Эзэнэй һургаалһаа хадуурба

¹⁶ Эзэн өөрын арад зондо иигэжэ айладхаба: «Харгы замууд дээрэ тогтожо харагты. Урданай һайн харгынууд тушаа – Моисейн һургаал тухай һурагшалагты. Тэрэ һайн замаар зорибол, ажана амгалан ажаһуухат». Теэд тэдэ: «Үгы, зорихогүйбди», – гэлдэбэ.

¹⁷ Би Эзэн бүреэгэйнь дохёо шагнахынтнай тула лүндэншэдые харуулшадаар таанад дээрэ табяаб. Гэбэшье таанад «Бидэ шагнахагүйбди» гээ һэнта.

¹⁸ Тиимэһээ Эзэн: – Соносогты, үндэһэ яһатад! Тэрэ арадтай юун болохыень мэдэжэ абагты!

¹⁹ Газар дэлхэй, соносо! Мүнөө Би энэ арадай түсэблэһэн гай тодхорые өөһэдэйнь толгой дээрэ буулгахам. Юуб гэхэдэ, тэдэ Минии үгэ дуулабагүй, Минии заабари тообогүй.

²⁰ Шэбааһаа асардаг гүгэл, алас холо нютагһаа санзай ууюулганууд Намда юуштэб? Тэдэнэй түгэс шатаалта үргэлнүүд Намда хэрэггүй, үргэлнүүдынь Намда зохисгүй.

²¹ «Тиимэһээ Би энэ арадта ехэ бэрхэшээлнүүдые эльгээхэб. Бэрхэшээлнүүд шулуун мэтэ зониие бүдэрүүлхэ. Эсэгэнэр үхи хүүгэдтэеэ хамта, хүршэнэр нүхэдтэеэ хамта унажа, үхэхэ!» – гэжэ тунхаглаба.

Хойто зүгһөө аюул

²² Эзэн иигэжэ айладхана: – Харагты, хойто зүгэй орон нютагһаа сэрэгэй зон ерэжэ байна. Агууехэ үндэһэтэн газар дэлхэйн хизаартахи һууриһаа хүдэлжэ эхилээ.

²³ Тэдэ һурша ном, жада гартаа адханхай, хэрзэгы хархис зантай, хайра гамгүй. Тэдэнэй хашхараан тэнгис далай мэтэ хүнхинэнэ. Сионой басаган, шинии урдаһаа дайлахаяа тэдэ нэгэ хүн мэтэ жагсан, морёор гүйлгэлдэн ерэжэ байна!

²⁴ Иерусалимай зон иигэжэ хэлэнэ: – Тэдээн тушаа һураг суу дуулажа, һал һуушабабди. Түрэжэ байһан эхэнэртэл үбшэндэ, гай зоболондо бидэ нэрбэгдэбэбди.

²⁵ Хээрэ тала руу бү гарагты, харгы замаар бү ябагты. Юуб гэбэл, хаа-хаанагүй – һэлмэ бариһан дайсад, тойроод – аюул!

²⁶ Эзэн: – Минии арад зон! Гашуудалай хубсаһа үмдэжэ, үнэһэн соо хүльбэрэгты. Ори ганса үхибүүгээ гээһэн мэтэ угаа гашуунаар уйлагты, юуб гэхэдэ, таанадые усадхахаяа ерэжэ байгаашад гэнтэ добтолон орохо.

²⁷ Ерэмияа, түмэр түдэгэ шэнжэлдэг хүндэл, ши Минии арад зоной ябадал шэнжэлэн адагла.

²⁸ Бултадаа тэдэ гуулин ба түмэр мэтэ үсэд хатуу, мүхөөгөө үгтэхэгүй зон. Тэдэ – һальхай ябадалтайшуул, хоб зөөгшэд.

²⁹ Хүүдинсын хөөргөөр үлеэлгээд, туулган шатажа һалаа. Түмэр хайлуулагша дэмы хүдэлбэ: муу муухай зүйл амяараа болоогүйл!

³⁰ Тэдэниие голосооной, хаясаанай зүйл гээд нэрлэхэ. Юуб гэхэдэ, Би, Эзэн, тэдэниие голооб, – гэжэ айладхал буулгаба.