Ерэмияа 52 - Библи

Иерусалимай һандарал

¹ Хорин нэгэ наһатайдаа Цэдэкиия хаан боложо, арбан нэгэн жэлэй туршада тэрэ Иерусалимда хааншалаа. Тэрэнэй эхэ Либнаа хотын Ерэмияагай басаган Хамутаал гэжэ нэрэтэй байгаа.

² Ёякиим хаандал адли Цэдэкиия хаан Эзэнэй урда жэгшүүритэй муухай хэрэгүүдые үйлэдэдэг байгаа.

³ Иерусалимай болон Иудын зоной Эзэнэй уур сухалые аргагүй ехээр хүдэлгэхэдэ, Тэрэ тэдэниие буруушаажа, тэдэнһээ буруу хараба. Цэдэкиия Вавилооной хаанай урдаһаа эсэргүүсэн бодобо.

⁴ Цэдэкииягай хан түрэеэ юһэдэхи жэлээ засаглажа байхада, арбадахи һарын арбанай үдэр Вавилооной хаан Навуходоносор өөрынгөө бүхы сэрэгүүдтэй хамта Иерусалимда дүтэлэн ерэбэ. Тэрэ сэрэгүүдээрээ Иерусалимые тойрожо хүреэлөөд, тэрэниие тойруулжа бүһэлэлтын хэрэм бодхобо.

⁵ Тэрэ хотые сэрэгээр хүреэлэлгэн Цэдэкииягай хан түрэеэ арбан нэгэдэхи жэлээ засаглатар үргэжэлбэ.

⁶ Дүрбэдэхи һарын юһэнэй үдэр (тэрэ сагта тэрэ хотын зон эдихэ хоолгүй болоһон тула туража үхэхэ туйлда хүрэбэ)

⁷ хотын хэрэм хана сүмэ сохигдобо. Тиихэдэнь бүхы сэрэгшэд һүниин харанхые һамбаашалжа, Хоёр Ханын хаалта үүдээр гаража, хаанай сэсэрлигэй хажуугаар, хотын газаа гараад, (тиихэдэ тэрэ хото халдейнүүдтэ тойруулан хүреэлүүлэнхэй байба), Арабаа тээшэ ошодог харгыгаар ябабад.

⁸ Теэд Вавилооной сэрэг Цэдэкиия хаанай хойноһоо мүшхэн ябажа, Ерихооной талада тэрэниие хүсэжэ бариба. Цэдэкииягай сэрэгшэд бултадаа хаанаа орхижо тэрьедэбэ.

⁹ Хамаат нютагай Риблаа хотодо байһан Вавилооной хаан руу Цэдэкиияе асаржа тушаахадань, тэндэ Навуходоносор тэрэниие шиидхэбэ.

¹⁰ Риблаада Цэдэкииягай хараһаар байтар Вавилооной хаан хүбүүдыень, Иудын хан түрын түшэмэлнүүдые алаба.

¹¹ Удаань Цэдэкииягай нюдэ тэһэлжэ, хүрэл гэнжээр гэнжэлээд, Вавилоон руу абаашаба. Тэндэ Цэдэкиия үхэн үхэтэрөө түрмэ шорондо байгаа һэн.

Эзэнэй Һүмэ һандаргагдаа

¹² Вавилооной хаан Навуходоносорой арбан юһэдэхи жэлээ хан түрэеэ засаглажа байхада, табадахи һарын арбанай үдэр Вавилооной хаанай зүбшэгшэ, харуулай ахамад Набузарадаан Иерусалим руу ерэбэ.

¹³ Тэрэ Эзэнэй Һүмэ, хаанай ордон, Иерусалимай бүхы томо һайн гэрнүүдые дууһан шатааба.

¹⁴ Набузарадаанай сэрэгшэд Иерусалимые тойроһон хотын хэрэм ханые буталан һандаргаба.

¹⁵ Хото соо үлөөшэ зониие, урбалта хэжэ Вавилооной тала баримталагшадтай хамта хаанай харуулай дарга Набузарадаан Вавилоон руу абаашаба.

¹⁶ Хамагай ядуу зоной заримыень үзэмэй модоной сэсэрлигүүдтэ, таряалан дээрэ ажаллахыень орон нютагтань үлөөбэ.

¹⁷ Халдейшүүд Эзэнэй Һүмэдэ байһан зэд баханануудые, табюур һууринуудые болон Зэд Далайе хэсэгүүд болгожо хухалаад, зэдыень Вавилоон абаашаба.

¹⁸ Тиихэдээ тэдэнэр тогоонуудые, удхуурнуудые, бойпуурнуудые, хабшуурнуудые, сүршэлгын аягануудые, шанагануудые болон мүргэлдэ хэрэглэгдэдэг хамаг бүхы зэд хэрэгсэлнүүдые абалсаба.

¹⁹ Хаанай харуулай дарга баһа алта, мүнгөөр хэгдэһэн бүхы юумэ: шэмхүүр, тогоон, бойпуур, сүршэлгын аяга, дэн, һаба, үргэлэй аяга, табаг – бултыень үбэршэлөө.

²⁰ Эзэнэй Һүмэ соо байха гэжэ Соломооной бүтээлгэһэн үшөө хоёр баханын, нэгэ Зэд Далайн, тэрэ Далайе үргөөд байһан арбан хоёр бухануудай болон табюур һууринуудай зэдые тооложо, шэгнэжэ барагдашагүй ехэ байгаа.

^21-22 Тэдэ хоёр бахана аб адли һэн: бахана бүхэн арбан найман тохой үндэртэй, тэбэрибэл, арбан хоёр тохой үргэнтэй, досоогоо хүнды хооһон, дүрбэн хурган хэмжээнэй зузаан түмэрөөр бүтээгдэһэн бэлэй. Тэдэнэй дээрэхиие хүрэлөөр хэгдэһэн оройн толгой бүхэн табан тохой үндэртэй байба. Бахана бүхэнэй оройн толгойе тойруулжа, хүрэлөөр шэмэглэн гоёоһон сэмбэрүү модоной үрэ жэмэсүүдтэй ба тортой байгаа.

²³ Хажуу таладань зуун сэмбэрүү сэсэг, тэдэнэй ерэн зургааниинь дороһоо харагдагша бэлэй.

Иудын хан түрын зон баряанда туугдаба

²⁴ Харуулай дарга Набузарадаан ахамад санаарта Сэраяае, хоёрдохи санаарта Цэпаанияае болон үүдэнэй гурбан харуулшадые олзолон абаба.

²⁵ Тиигээд тэрэ мүн баһа хотодо байһан нэгэ сэрэгэй ноёниие, хотодо олдоһон хаанай долоон зүбшэгшэдые, орон нютагай зониие сэрэгэй албанда татадаг жанжинай бэшээшые, үшөө тэрэ хотодо олдоһон хүндэтэй жаран хүнүүдые олзолон абаба.

²⁶ Хаанай харуулай дарга Набузарадаан тэдэ олзолон абагшадаа туужа, Риблаа хотодо байһан Вавилооной хаанда асарба.

²⁷ Вавилооной хаан тэдэниие Хамаат газарай Риблаа хотодо саазалба. Иигэжэ Иудын хан түрын улад зон түрэл нютагһаа сүлэгдөө һэн.

²⁸ Навуходоносорой сүлэлгэдэ эльгээһэн зоной тоо бүридхэл гэбэл, энэ: тэрэнэй долоодохи жэлээ хаан шэрээ эзэлжэ байхада, гурба мянга хорин гурбан,

²⁹ арба наймадахи жэлээ хааншалхадань, найман зуун гушан хоёр,

³⁰ хорин гурбадахи жэлээ хааншалхадань, харуулай ахамад Набузарадаан долоон зуун дүшэн табан хүниие Иерусалимһаа баряанда эльгээгээ. Бүхыдөө дүрбэ мянга зургаан зуун хүн сүлэгдөө.

³¹ Эвиил-Мэродаах Вавилооной хаан болоходоо, тэрэл жэлээ Иудын хаан Ехонияае олзолгондо абтаһанһаа хойшо гушан долоон жэлэй үнгэрөөд байхада, арбан хоёрдохи һарын хорин табадахи үдэр тэрэниие түрмэһөө табиба.

³² Эвиил-Мэродаах Ехонияатай урин зулгыгаар хөөрэлдөөд, тэрэнэй Вавилоондо байһан сагта бусад хаашуулһаа дээгүүр һуурида һуухые захирба.

³³ Ехонияа түрмэдэ һуухадаа үмдэжэ байһан хуушан хубсаһаа тайлажа, шэнэ хубсаһа үмдэбэ. Тиигээд Ехонияа тэрэ үдэрһөө эхилжэ, үхэн үхэтэрөө Вавилооной хаантай хамта шэрээдэ һуужа эдеэлдэг байба.

³⁴ Тиигэжэ тэрэ наһа баратараа Вавилооной хаанһаа үдэр бүхэндэ тэдхэмжэ тэжээл ходол абажа байһан юм.