Ерэмияа 49 - Библи

Аммооной арад тушаа

¹ Аммооной арад зон тушаа Эзэн иигэжэ айладхана: – Израилиин улад зон үгы юм гү? Юундэ Милхоом бурханда мүргэдэг зон Гаадай обогой газар уһые эзэмдээд, тэндэнь ажаһуунаб?

² Теэд Аммооной ниислэл хото Раббаада дайн дажарай абяа шууяанай дуулдаха саг дүтэлөө. Тэрэ һандаргагдаха, хажуудахи һууринуудынь гал дүлэндэ шатаха. Тиихэдэнь Израиль газар уһаяа тэдээнһээ һөөргэнь абаха.

³ Хэшбооной улад зон, шангаар бархиралдыт! Ай хото һандаргагдаал! Раббаагай эхэнэрнүүд, таар үмдэжэ, гашуудан уйлагты! Хана хэрэмүүдэй дунда наашаа-саашаа гүйлдэгты! Милхоом бурхантнай санаартад, түшэмэлнүүдтэеэ хамта баряанда туугдан ошохонь лэ!

⁴ Юундэ таанад дэмы һаахаралданабта? Хүсэ шадалтнай бууранхайл. «Хэншье намда добтолон орожо шадахагүй» гэжэ хэлэн, юундэ таанад өөһэдтөө үлүү найдаад байнабта?

⁵ Хаа-хаанаһаатнай аюул таанадта табихаб. Бултадаа таанад тэрьедэн гүйлдэхэт. Хүн бүхэн өөрынгөө ами наһа аршалан гүйхэ, хэншье таниие дахин суглуулжа шадахагүй.

⁶ Гэбэшье һүүлдэнь Аммооной хүбүүдые дахин һэргээн һалбаруулхаб. Энэ болбол Би, Түмэн Сэрэгтэ Эзэн, айладхана мүн!

Эдоом тушаа

⁷ Түмэн Сэрэгтэ Эзэн Бурхан Эдоом тушаа иигэжэ айладхана: – Тэмаан соо сэсэн мэргэн зон дайралдахаяа болёо юм гү? Зүблэгшэдынь юу хэхыень заабарилжа шадахаяа болёо гү? Мэргэн ухааниинь доройтоо гү?

⁸ Дэдаанай улад зон, һөөргөө эрьежэ гүйлдэгты! Тэрьедэгты, гүн газарнуудаар хорогты! Эсаавай уг удамые үгы хэхэеэ байнаб, юуб гэхэдэ, тэдэниие хэһээхэ сагни ерээ.

⁹ Уһан жэмэс суглуулагшад шамда ерэбэл, нэгэ хэдышье жэмэс түүнгүй үлөөхэ бэшэ гү? Һүниндөө хулгай хэгшэд орожо ерэбэл, хэрэгтэйл юумэеэ дураараа абан ошодог бэшэ гү?

¹⁰ Харин Би Эсаавай уг удамые нюсэгэн болгохоб, хоргодожо шадахагүй болоторынь Би тэрэнэй нюуса газарнуудые нээгээд орхихоб. Эдоомой зон бултадаа усадхагдаха. Хэншье амиды мэндэ үлэхэгүй.

¹¹ Үншэн хэнзэнүүдээ Намтай үлөөгты, Би тэдээн тушаа һанаагаа табидаг байхаб. Бэлбэһэн эхэнэрнүүдтнай Намһаа дулдыдадаг байха.

¹² Хэһээлтэ амасаха ёһогүй зоншье хэһээлтэ амасаха. Харин таанад хэһээгдэнгүй байхабди гэжэ һанаа гүт? Үгы! Заабол хэһээгдэхэт!

¹³ Боцраа хото үзэмжэгүй муухай, зэлүүд хооһон болохо гэжэ Би тангариглаа һэм. Зон тэрэниие доромжолон наадалжа, хараал хэлэхэдээ нэрыень дурдадаг болохол. Дүтын һууринууд хэтэ мүнхэдөө һандаргагданхай үлэхэ. Энэ болбол Би, Эзэн, айладхана мүн!

¹⁴ Би, Ерэмияа, иигэжэ хэлээб: – Эдоомой улад зон, би Эзэнһээ мэдээсэл абабаб. Сэрэгээ суглуулжа, таанадта добтолхоёо бэлдэхэ тухай үндэһэ яһатадта дуулгаха зорилготойгоор Эзэн элшэ эльгээнхэй.

¹⁵ Би шамайе арадуудай дунда тоогдохоор бэшэ ахир бага болгохоб, шамайе булта шоо үзэхэ.

¹⁶ Бардам заншни шамда һаад, тушаан болоо, юушье ойлгоогүйш. Хэншье шамһаа айнагүй. Ши үндэр хабсагайнуудаар, хада уулануудай оройгоор ажаһуунаш. Бүргэд мэтэ үндэр газарта байгаашье һааш, тэндэһээш Би шамайе доошонь унагаахаб. Энэ болбол Би, Эзэн, айладхана мүн!

¹⁷ Эзэн айладхана: – Эдоом угаа ехээр һандаргагдаха, хажуугаарнь гараһан хүн бүхэн сошохо, шархануудыень хаража, шоо үзэхэ.

¹⁸ Содом, Гоморро болон хажуудахи хотонуудайнь һандаргаһандал адляар Эдоомшье һандаргагдаха. Хэншье тэндэ хэзээдэшье ажаһуухагүй. Энэ болбол Би, Эзэн, айладхана мүн!

¹⁹ Иорданай шугы шэдхэһээ тунга ногоон бэлшээри руу ошожо байһан арсаландал Би гаража, Эдоомой улад зониие гэнтэ орон нютагһаань тэрьедүүлхэб. Минии шэлэһэн хүн арад түмэниие хүтэлбэрилхэ. Хэн Намтай зэргэсэжэ шадахаб? Хэн Минии урдаһаа тулажа шадахаб? Ямар удамарша урдаһаамни һөөргэдэхэб?

²⁰ Эдоомой улад зон тушаа Эзэнэй шиидэһэн, Тэмаан хотынхидой урдаһаа зохёоһон Тэрэнэй түсэб шагнагты. Бага балшар үхибүүдшье харюуда татагдаха, хотонуудынь хооһорхо.

²¹ Эдоомой унахадань, оог хашхараанһаа газар доһолон хүдэлхэ, Хулһата далай хүрэтэр хашхараа шууяа дуулдаха.

²² Далияа дэбиһэн бүргэдтэл, дайсан Боцраа хото руу добтолон орохо. Тэрэ үдэр Эдоомой сэрэгшэд үхибүүгээ түрэжэ байһан эхэнэртэл, зобохо.

Дамааск тушаа

²³ Эзэнэй Дамааск тушаа айладхаһаниинь энэ: – Хамаат болон Арпаад хотонуудта зон хүлгэнэнэ, һанаагаа зобоно. Юуб гэбэл, тэдэ муу һураг суу дуулаа. Һанаагаа зобоһондоо тэдэ далайдал адли таһалгаряагүй бурьялна.

²⁴ Дамааскын улад зон аймхай, айһандаа тэдэ тэрьедээ, үхибүү түрэжэ байһан эхэнэртэл, үбдэжэ, зобожо байна.

²⁵ Жаргалтай байһан энэ мэдээжэ хото орхигдонхой.

²⁶ Тэрэ үдэр залуу зониинь үйлсэнүүдтэ алуулагдаха, бүхы сэрэгшэдынь усадхагдаха.

²⁷ Дамааскын ханануудые гал дүлэндэ шатаахаб, Бэн-Һадаад хаанайнь ордонгуудые үгы болоторынь галдахаб. Энэ болбол Би, Түмэн Сэрэгтэ Эзэн, айладхана мүн!

Кэдаарай обог болон Хацоорой газар нютагууд тушаа

²⁸ Вавилооной хаан Навуходоносорой диилэһэн Кэдаарай обог зон болон Хацоорой нютагууд тухай Эзэн иигэжэ айладхана: – Кэдаарта добтолжо, зүүн зүгэй уг унги болохо тэдэниие усадхагты!

²⁹ Майхангуудыень, мал һүрэгыень, майхангуудайнь хүшэгэнүүдые, майхан соо байгаа бүхы юумыень эзэмдэн абагты. Тэмээнүүдыень абагты, тиигээд зондо «Тойроод аюул!» гэжэ дуулган хашхарагты.

³⁰ Гүйгты, зугадагты, гүн газарнуудаар хорогты, Хацоорой улад зон! Вавилооной хаан Навуходоносор таанадай урдаһаа добтолхо тухай түсэб зохёонхой.

³¹ Ерэжэ байна! Вавилоонойхид, хашалгүй, һанаа амар байгаа арад түмэндэ добтологты! Тэдэнэй хото ямаршье үүдэ үрхэгүй, суургагүй, ямаршье аршалалтагүй.

³² Тэмээнүүдыень, юрэдөө, бүхы мал һүрэгынь абагты! Һаншагаа хюһадаг зониие Би найман зүгөөр тараан сасахаб, хаа-хаанаһаа тэдээн дээрэ гай тодхор буулгахаб.

³³ Хацоор сүүбэн шононуудай үүр болон, хэтэ мүнхэдөө зэлүүд хооһон газар болохо. Хэншье тэндэ ажаһуухагүй. Энэ болбол Би, Эзэн, айладхана мүн!

Элаам тушаа

³⁴ Цэдэкииягай Иудын хаан болоһоной һүүлээр удахагүй Түмэн Сэрэгтэ Эзэн Элаам орон нютаг тушаа намтай хөөрэлдөө бэлэй.

³⁵ Түмэн Сэрэгтэ Эзэн иигэжэ айладхаа: – Элаамые шадалтай шанга болгоһон бүхы харбаашадыень Би хюдахаб.

³⁶ Найман зүгһөө Элаам руу һалхи шуурга эльгээжэ, бүхы зонииень бүгэдэ орон нютагаар тараахаб.

³⁷ Элаамай улад зониие дайсадһаа айдаг болгохоб. Уур сухал дундаа тэдээндэ гай тодхор ушаруулжа, бултыень һалгаатараа сэрэг тэдээндэ эльгээжэл байхаб.

³⁸ Тэдэнэй хаан, түшэмэлнүүдые үгы хэхэб, Өөрынгөө хаан шэрээ Элаамда байгуулхаб.

³⁹ Гэбэшье һүүлдэнь Элаамай арад зониие баряанһаа бусаажа, һэргээжэ, һайн һайхан ажаһуулгахаб. Энэ болбол Би, Эзэн, айладхана мүн!