Ерэмияа 47 - Библи

Пилишт арад тушаа

¹ Гааза гээшэдэ Египедэй фараоной добтолхын урда тээ Эзэн намтай пилишт арад тушаа хөөрэлдэһэн байна.

² Тэрэ иигэжэ айладхаа: Харыт! Хойто зүгтэ уһан бодожо, үер мэтэ урдахань. Тэрэ газар дайдые, дээрэнь байгааша бүхы юумэ – хото һууринуудые, ажаһуугшадые хушан бүрхөөхэнь. Зон туһа эрихэ, орон нютагай улад гашуунар уйлаха даа.

³ Азаргануудай гүйлдэхэ түбэрөө, дайшалхы тэргэнүүдэй дүржэгэнөө, сахаригуудайнь хонгироо тэдэ дуулаха. Эсэгэнэр хүүгэдүүд руугаа эрьежэ харахагүй, юуб гэбэл, юушье хэжэ шадахагүй болоно бшуу.

⁴ Пилишт арадые хюдаха, Тиир ба Сидоонһоо үлэһэн бүхы туһамаршадыень таһалха саг ерэжэ байна. Би, Эзэн, пилишт зониие, Каптоор олтирогһоо ерээшэдые усадхахаб.

⁵ Гааза гэгшэдэ ехэ гай гашуудал буужа ерээ, Ашхэлооной зон һалаба, Пилишт орон нютагай бусад зон хэр удаан гашуудан байхаб?

⁶ Таанад иигэжэ ёолонот: «Эзэнэй һэлмэ! Хэды болотор сабшахабши? Хуйндаа буса, амаран, номхон байгыш!»

⁷ Теэд яагаад тэрэ номхон байхаб? Ашхэлоондо, далайн эрьеэр ажаһуудаг уладта добтолхыень тэрээндэ захираа ха юмбиб.