Ерэмияа 43 - Библи

Ерэмияа Египет руу абаашагдаба

¹ Эзэн Бурханай үгэнүүдые минии дамжуулан хэлэжэ дүүргэхэдэ,

² Һошаяагай хүбүүн Азаария, Карээһаагай хүбүүн Ёханаан болон бусад дээрэлхүү зантай зон намда иигэжэ хэлэбэ: – Та буруу юумэ хэлэнэт. Египет руу бү ошогты гэжэ Эзэн Бурхамнай танда айладхаагүй.

³ Нэрияагай хүбүүн Баруух Вавилооной мэдэлдэ маанадые оруулхын, тэдэнэй бидэниие алахын гү, али баряанда туун абаашахын тула оролдожо, таниие иигэжэ хэлүүлнэ.

⁴ Иигэжэ Карээһаагай хүбүүн Ёханааншье, сэрэгэй нэгэшье ноён, нэгэшье хүн Иудын орон нютагта үлэхэ тухай Эзэнэй үгэ дуулахагүй байба.

⁵ Тиигээд Карээһаагай хүбүүн Ёханаан, сэрэгэй бүхы ноёд хариин оронуудһаа Иуда нютагаа бусажа ерэһэн бүхы иудей зониие –

⁶ эрэшүүлые, эхэнэрнүүдые, үхи хүүгэдые, хаанай басагадые – дахуулба. Тэдэ Шапаанай аша, Ахикаамай хүбүүн Гэдаалияагай мэдэл доро Набузарадаанай орхиһон бүхы зониие, тэрэ тоодо намайешье, Нэрияагай хүбүүн Баруух гэгшыешье абаа һэн.

⁷ Тэдэ Эзэнэй үгэ дуулангүй, Египедэй орон нютаг руу зорибо. Тахпанхээс хүрэтэр ябаба.

⁸ Тэндэ Эзэн намда айладхаба:

⁹ – Мантан шулуунуудые гартаа абажа, Тахпанхээстэ, фараоной гэрэй үүдэнэй дэргэдэ, зуурамаг шабар соо хадагала. Иудейнүүдэй хараһаар байтар иимэ юумэ хээрэй.

¹⁰ Тиигээд Минии, Түмэн Сэрэгтэ Эзэнэй, Израилиин Бурханай, Өөрынгөө зараса, Вавилооной хаан Навуходоносорые асаржа, хан шэрээень эдэ шулуунууд дээрэ табихаяа байһан тухай, тэрэнэй майхангай эндэ бодхоогдохоёо байһан тушаа зондо дуулга.

¹¹ Навуходоносор ерэжэ, Египедые диилэхэ. Үбшэ хабшанһаа үхэхэ зон үбшэнһөө үхэхэ, баряанда абтаха зон баряанда туугдан ошохо, дайн дажарта алуулха хүн дайнда унаха.

¹² Египедэй бурхадай һүмэнүүдые Би гал дүлэндэ шатаахаб. Вавилооной хаан бурхадыень шатааха. Хонишодой бөөһэгүй сэбэр хубсаһа шэлэн үмдэдэгтэл, Вавилооной хаан Египедэй газар дайдые сэбэрлэн, шэлэжэ эдлээд, тэрэнээ илан орхихо.

¹³ Тэрэ Египедэй газар дайдадахи Бэт-Шээмэшэй шулуун хүшөөнүүдые хэмхэлхэ, Египедэй бурхадай һүмэнүүдые галдан шатааха.