Ерэмияа 41 - Библи

Гэдаалияае алаба

¹ Тэрэ оной долоодохи һарада хаанай гэр бүлын Элишамаагай аша, Нэтаанияагай хүбүүн, хаанай ахамад түшэмэл Ишмаһээл арбан хүнтэй хамта Ахикаамай хүбүүн Гэдаалияада Мицпаа руу ерэбэ. Тэдэнэй тэндэ Мицпаада хамта эдеэлжэ байхада,

² Нэтаанияагай хүбүүн Ишмаһээл болон тэрээнтэй хамта ерээшэ арбан хүн һэлмэнүүдээ гаргаад, орон нютагай захирагшаар Вавилооной хаанай табиһан Шапаанай аша, Ахикаамай хүбүүн Гэдаалияае алаба.

³ Ишмаһээл мүн лэ Гэдаалияатай хамта байһан иудей зониие, тэндэ байгааша Вавилооной сэрэгшэдые усадхаба.

⁴ Гэдаалияае алаһанай удаадахи үдэр, хэнэйшье энээн тушаа мэдээдүй байхада,

⁵ һахалаа хюһуулһан, хубсаһаа таһалһан, бэеэ адааһан наян хүн Шэхээм, Шилоо болон Самариһаа ерэбэ. Тэдэ нангин үргөөдэ үргэхэ эдеэ, уталгануудые баряад ерээ бэлэй.

⁶ Нэтаанияагай хүбүүн Ишмаһээл Мицпааһаа урдаһаань бархиран гаража, «Гэдаалияада ошогты» гэжэ хэлэбэ.

⁷ Тэдэнэй хото руу ороходонь, Нэтаанияагай хүбүүн Ишмаһээл зонтоёо хамта тэдэниие алажа, бэенүүдыень нүхэн руу хаяба.

⁸ Тэдэнэй дундаһаа арбан хүн Ишмаһээлдэ «Маанадые бү алыт! Бидэндэ талада нюугаатай шэниисэ, ешмээн, оливын тоһон, зүгын бала биил» гэлдэбэ. Тиихэдэнь тэрэ тэдэниие алабагүй.

⁹ Алаһан зоноо хаяһан нүхэниинь Асаа хаанай Израилиин хаан Баһашаада добтолуулхадаа малтаһан нүхэн байгаа. Тэрэ нүхые Нэтаанияагай хүбүүн Ишмаһээл зоной һэенүүдээр дүүргэбэ.

¹⁰ Тиигээд Ишмаһээл хаанай басагадые, Мицпаада байһан бүхы зониие баряанда абаба. Тэдэ зониие Набузарадаан Гэдаалияагай харууһан доро орхёо бэлэйл. Нэтаанияагай хүбүүн Ишмаһээл тэдэниие баряанда абаад, Аммооной газар дайда руу шэглэбэ.

¹¹ Карээһаагай хүбүүн Ёханаан, тэрээнтэй байгааша сэрэгэй ноёд Нэтаанияагай хүбүүн Ишмаһээлэй хэһэн хэрэгүүд тушаа дуулахадаа,

¹² зонтоёо хамта Нэтаанияагай хүбүүн Ишмаһээлые мүрдэн ошожо, Гибэһоондохи мантан сөөрэмэй хажууда хүсэжэ олобо.

¹³ Ишмаһээлэй баряанда абаад ябаһан зон Карээһаагай хүбүүн Ёханааниие болон сэрэгэй ноёдые тэрээнтэй хамта харахадаа, баярлаба.

¹⁴ Тиигээд Мицпааһаа баряанда туугдаһан тэдэ зон тэдээн тээшэ гүйжэ тэрьедэбэ.

¹⁵ Харин Нэтаанияагай хүбүүн Ишмаһээл найман хүнтэеэ хамта тэдээнһээ зугадан гүйжэ, Аммооной газар дайда руу шэглээ һэн.

¹⁶ Тиигээд Карээһаагай хүбүүн Ёханаан сэрэгэй ноёдтоёо хамта Нэтаанияагай хүбүүн Ишмаһээлэй Ахикаамай хүбүүн Гэдаалияае алаһанайнгаа удаа Мицпаа хотоһоо баряанда абаһан зониие – сэрэгшэдые, эхэнэрнүүдые, үхи хүүгэдые, тайгануудые – Гибэһоонһоо абаад ошоо һэн.

^17-18 Тэдэ Вавилооной зонһоо айжа байгаа. Юуб гэхэдэ, Вавилооной хаанай орон нютагые захирхаар томилһон Гэдаалияа гэгшые Нэтаанияагай хүбүүн Ишмаһээл алаа бшуу. Тиимэһээ тэдэ Египет руу ошохо гэжэ зорибо. Харгыдаа Бэтлэһээмэй хажуудахи Кимһаам гэжэ нютагта тэдэ тогтобо.