Ерэмияа 39 - Библи

Иерусалим руу дайсан оробо

¹ Иудын хаан Цэдэкииягай хан түрэеэ юһэдэхи жэлээ засаглажа байхада, арбадахи һарада Вавилооной хаан Навуходоносор өөрынгөө бүхы сэрэгүүдтэй хамта Иерусалимда дүтэлэн ерэжэ, тэрэниие тойруулжа хүреэлбэ.

² Цэдэкииягай хан түрэеэ арбан нэгэдэхи жэлээ засаглажа байхада, дүрбэдэхи һарын юһэнэй үдэр хотын хэрэм хана сүмэ сохигдобо.

³ Вавилооной түшэмэлнүүд, тэдэнэй дунда Нэргаал-Сарээцер, Самгаар-Нэбоо, ахалагша тайган Сарсэхиим, нүгөөдэ Нэргаал-Сарээцер, Иерусалим руу орожо, Дунда Бартаануудта һуурижаба.

⁴ Иудын хаан Цэдэкиия болон бүхы сэрэгшэд эдэ бүгэдые харахадаа, һүниин харанхые һамбаашалжа тэрьедэхэеэ туршаба. Тэдэ һүниндөө Хоёр Ханын хаалта үүдээр гаража, хаанай сэсэрлигэй хажуугаар, хотын газаа гараад, Арабаа тээшэ ошодог харгыгаар ябабад.

⁵ Теэд Вавилооной сэрэг Цэдэкиия хаанай хойноһоо мүшхэн ябажа, Ерихооной талада тэрэниие хүсэжэ бариба. Хамаат нютагай Риблаа хотодо байһан Вавилооной хаан Навуходоносорто Цэдэкиияе асаржа тушаахадань, тэндэ хаан тэрэниие шиидхэбэ.

⁶ Риблаада Цэдэкииягай хараһаар байтар Вавилооной хаан хүбүүдыень, Иудын хан түрын түшэмэлнүүдые алаба.

⁷ Удаань Цэдэкииягай нюдэ тэһэлжэ, Вавилоон руу абаашахаяа хүрэл гэнжээр гэнжэлбэ.

⁸ Тэрэ үедэ Вавилооной сэрэг хаанай ордон, зоной байра галдажа, Иерусалимай хэрэм ханануудые һандаргааба.

⁹ Харуулай ахамад Набузарадаан хото соо үлэһэн зониие, мүн дайсанай тала баримталан ошогшодые Вавилоон руу нүүлгэн абаашаба.

¹⁰ Хамагай ядуу, үгытэй зарим зониие Набузарадаан Иудын орон нютагта үлөөжэ, үзэмэй модоной сэсэрлигүүдые, таряалангуудые үгэбэ.

Ерэмияа сүлөө табигдаба

¹¹ Навуходоносор хаан Набузарадаанда иимэ захиралта үгэбэ:

¹² «Ошожо, Ерэмияа гэгшые ологты. Тэрээндэ муу юумэ бү хэгты, өөрынь дураар байгты».

¹³ Иигэжэ Набузарадаан үндэр тушаалта Нэбүүшазбаантай, Нэргаал-Сарээцертэй болон Вавилооной бусад түшэмэлнүүдтэй хамта

¹⁴ минии хойноһоо эльгээжэ, ордоной досоо хашаануудһаа намайе абаба. Шапаанай аша, Ахикаамай хүбүүн Гэдаалияада намайе гэртэм абаашахыень даалгаба. Иигэжэ би зоной дунда тэндэ үлөө һэм.

Эбэдмээлэхтэ Эзэнэй һайн үгэ

¹⁵ Минии үшөө түрмэ шорондо һуужа байха үедэ Эзэн намда хандажа,

¹⁶ эфиоп хүн Эбэдмээлэхтэ иигэжэ хэлэхыемни захираа: – Би, Түмэн Сэрэгтэ Эзэн, Израилиин Бурхан, энэ хотодо гай тодхор татахаб гэжэ хэлээшэеэ бэелүүлхэм. Ши тэрэниие харахаш.

¹⁷ Харин Би, Эзэн, шамайе аршалхаб, айдаг зонойнгоо һабарта орохогүйш.

¹⁸ Би шамайе аршалхаб, ши алуулхагүйш, амиды мэндэ байхаш, юуб гэхэдэ, ши Намда этигэн найдан байгааш. Энэ болбол Би, Эзэн, айладхана мүн!