Ерэмияа 35 - Библи

Ерэмияа ба рэхаабууд

¹ Ёшияагай хүбүүн Ёякиимэй Иудын хаан байха үедэ Эзэн намда иигэжэ хандаба:

² – Рэхаабит уг унгитай хөөрэлдэжэ, Һүмын нэгэ танхим руу асараад, үзэмэй дараһан архи тэдээндэ уулга.

³ Би Рэхаабит уг унгиие бултыень – Хабаццинияагай аша, Ерэмияагай дүү Яазаанияа гэгшые аха, дүүтэйнь хамта абажа, Һүмэ руу асарбаб.

⁴ Игдаалиягай хүбүүн Ханаһаанай шабинарай таһалга руу асарааб. Тэрэ таһалга Һүмын амбан тушаалтан болохо Шаллуум гэгшын хүбүүн Маашэяагай таһалга дээрэ, бусад тушаалтадай таһалгануудай хажуугаар бэлэй.

⁵ Рэхаабит зоной урда жэмэсэй архяар дүүрэн хундагануудые табижа, «үзэмэй дараһан архи уугты» гээд хэлэбэб.

⁶ Теэд тэдэ: – Бидэ үзэмэй дараһан архи уудаггүйбди. Манай үбгэ эсэгэ Рэхаабай хүбүүн Ёнадааб бидэнэй болон уг удамаймнайшье үзэмэй дараһан архи уухагүй тухай захирһан юм.

⁷ Гэр барихыемнай, таряа тарихыемнай, үзэмэй модоной сэсэрлиг һуулгахыемнай тэрэ бидэндэ хорёо. Түр оршон һуужа байгаа энэ нютагта удаан сагта амидархымнай тула тэрэ бидэнэй наһаараа майхангууд соо ажаһуухыемнай захираа.

⁸ Рэхаабай хүбүүн Ёнадаабай хэлэһые бидэнэй дуулажа, хэмнайшье – бидэ өөһэдөө, һамгаднай, үхи хүүгэднай – үзэмэй дараһан архи уудаггүй.

^9-10 Гэрнүүдые баридаггүйбди, майхангууд соо ажаһуунабди, үзэмэй модоной сэсэрлиг, таряалангуудшье бидэндэ үгы. Үбгэ эсэгэ болохо Ёнадаабай захиралтые дууһан сахин дүүргэнэбди.

¹¹ Навуходоносорой орон руумнай добтолон ороходо, Вавилооной, Араамай сэрэгһээ тэрьедэн, Иерусалим руу ерээ бэлэйбди.

^12-13 Тиигээд Түмэн Сэрэгтэ Эзэн, Израилиин Бурхан, Иудын хан түрын болон Иерусалимай улад зондо минии ошожо, иигэжэ дамжуулан хэлэхыемни захирба: – Юундэ таанад Минии, Эзэн Бурханай, үгэ дууланагүйбта?

¹⁴ Рэхаабай хүбүүн Ёнадаабай үри һадаһад үбгэ эсэгынгээ үгэ дуулажа, үзэмэй дараһан архи уунагүй. Минии таанадта хэлэхэдэ, та бүгэдэн үгыем дууланагүйт.

¹⁵ Мүн Би таанадта албатан лүндэншэдээ хэдэн дахин эльгээгээб, танай муу замаа орхижо, зүбөөр ажаһуудаг болохо тухай тэдэ хэлээ. Таанадта болон үбгэ эсэгэнэртэтнай үгэһэн газар дайдадам та бүгэдын саг үргэлжэ ажаһуухын тула ондоо бурхадта мүргэхэгүй, зальбархагүй тухай тэдэ таанадта хэлэн һэргылээ. Теэд таанад үгыень дуулаагүйт, Намайе анхараагүйт.

¹⁶ Рэхаабай хүбүүн Ёнадаабай үри һадаһад үбгэ эсэгынгээ захяа дүүргэдэг, харин таанад Намайе шагнанагүйт.

¹⁷ Тиимэһээ Би, Түмэн Сэрэгтэ Эзэн, Израилиин Бурхан, Иуда дээрэ, Иерусалим хотынхид дээрэ айладхаһан гай тодхороо буулгахам. Минии үгэ дуулаагүй, дуудахадамни, харюусаагүй байһанайтнай түлөө эдэ бүгэдые таанадта үйлэдэхэб.

¹⁸ Тиигээд би рэхаабуудай уг унгида Түмэн Сэрэгтэ Эзэнэй, Израилиин Бурханай, иигэжэ айладхаһые дамжуулбаб: – Үбгэ эсэгэ Ёнадаабай захиралта таанад сахин дүүргэнэт.

¹⁹ Тиимэһээ Би, Түмэн Сэрэгтэ Эзэн, Израилиин Бурхан, Рэхаабай хүбүүн Ёнадааб Намда алба хэхэ хүбүүн уг удамтай хододоо байха гээд найдуулнаб.