Ерэмияа 3 - Библи

Найдабаригүй Израиль

¹ Эзэн айладхал буулгана: – Хэрбээ үбгэн һамган хоёрой һалажа, һамганайнь ондоо хүнэй һамган болоо хадань, дахин тэрэниие түрүүшын үбгэниинь һамган болгон абажа шадахагүй. Тиигээ һаань, газар дэлхэй бүхыдөө бузарлагдаха бэлэйл. Израиль, ши олон амарагтай һальхайрааш. Тиигээд үшөө намда бусахаяа һанажа байнаш!

² Хадын нюсэгэн оройнууд руу харыш. Шинии һальхай ябадал гаргаагүй газар бии юм аал? Элһэн сүл губида амадажа байһан Арааб шэнги ши харгы замай хажуугаар янхан амарагуудаа хүлеэн һуужа, энэ газарые янхан ябадалаараа бузарлааш.

³ Тиимэһээл аадар бороо һаатажа, хабарай бороошье ороогүйл. Энээнэйшье удаа ши эшэхэ-гайхахаяа мэдэрээгүйш – нюуршни янхан эхэнэрэй шарайдал адли.

⁴ Мүнөө ши Намда хандан: «Та минии эсэгэт. Эдир залуу наһанһаамни хойшо намайе хүтэлэн ябаат.

⁵ Хододоо намда уурлажа, хэтэдээ энээниие досоогоо хадагалан байха юм аалта?» – гэнэш. Иигэжэ хэлээшье хадаа шадахысаа муу юумэ үйлэдэһөөр лэ байнаш.

Израиль Иуда хоёр

⁶ Ёшияа хаанай зонхилхо үе сагта Эзэн намда иигэжэ хэлэбэ: – Урбахадаа бэлэн, найдабаригүй Израилиин юу хэһые хараа гүш? Тэрэ үндэр толгой бүхэн дээрэ гаража, һаглагар модон бүхэн доро ошожо, тэндэ шүтөөнүүдтэ мүргэн, янхан эхэнэртэл ябадал гаргаа.

⁷ Эдэ бүгэдые үйлэдэһэнэй удаа тэрэ Нам руу бусаха гэжэ һанаа һэн. Теэд тэрэ бусажа ерээгүй. Энээниие тогтууригүй зантай Иуда эгэшэнь хараа бэлэй.

⁸ Намда урбаһан Израилиин бүхы һальхай забхай ябадалыень хараад, Би тэрэниие ябуулжа, һалаһанай гэршэлгэ үгөөб. Харин үнэн сэхэ бэшэ Иуда эгэшэнь энээнһээ айбагүй, тэрэ мүн лэ янхан эхэнэр мэтэ болоо.

⁹ Тэрэ эшэхэеэ мэдэхэгүй, газар нютагые бузарлажа, модо шулуунда мүргэн забхайрба.

¹⁰ Эдэ бүгэдын удаа Иуда, Израилиин этигэл найдабаригүй эгэшэ, бүхы зүрхэ сэдьхэлээрээ Намда эрьен ерээ бэшэ, харин худал хуурмаг шэг шарай үзүүлнэ. Энэ болбол Би, Эзэн, айладхал буулгана мүн!

¹¹ Тиигээд Эзэн намда үшөө хэлэхэдээ, Израиль Тэрээнһээ буруу хараашье хадаа этигэл найдабаригүй Иудаһаа дээрэ гээд айладхаба.

¹² Тэрэ минии хойто зүг руу ошожо, Израильда иигэжэ хэлэхыемни захирба: – Израилиин найдабаригүй арад зон, бусан ерэгты. Таанадта уурлажа байхагүйб, нигүүлэсхы мэдэрэл досоомни түрэнэ. Хододоо таанадта уурлан хилгэнтэжэ байхагүйлби.

¹³ Минии урдаһаа нүгэл үйлэдэжэ, зэмэтэй байһанаа, һаглагар модон бүхэн доро янхан эхэнэртэл забхайран, бусад арадуудай шүтөөнүүдтэ мүргэжэ, Минии үгэ дуулаагүй байһанаа гансал мэдэрыт. Энэ болбол Би, Эзэн, айладхана мүн!

¹⁴ Танда этигэхын аргагүй, гэбэшье бусыт, юуб гэхэдэ, Би танай Эзэн гээшэб. Би таанарые хотоһоо нэгые, уг урагһаа хоёрые абажа, Сион руу асархаб.

¹⁵ Тиигээд Намда үнэн сэхэ удамаршадые таанадта үгэхэб. Тэдэ таанарые ойлгон, ухаатай сэсэнээр хүтэлбэрилхэ.

¹⁶ Газар дэлхэй дээрэ таанарай үнэржэжэ, угаа олон болоһон үедэтнай зон Минии хэлсээнэй ханза тухай хэлсэхэеэ болихо. Тэдэ энээн тухай һанаандаа оруулхашьегүй, бодохошьегүй, үгылхэшьегүй, мүн тэрэниие дахин дархалхашьегүй.

¹⁷ Тэрэ үедэ Иерусалим Эзэнэй хан шэрээ гэжэ нэрлэгдэжэ, Намда мүргэхэеэ бүхы уласууд тэндэ сугларха. Тэдэ өөһэдынгөө муу муухай зүрхэ сэдьхэл шагнахагүй, тэрэниие дагахагүй.

¹⁸ Израиль Иудатай хамтаржа, хойто зүгтэ орон нютагта сүлэлгэдэ байһанаа хоюулаа ябан гаража, танай элинсэг хулинсагта угай зөөри болгон Минии үгэһэн орон нютагта бусаха.

Шүтөөнүүдтэ мүргэлгэ

¹⁹ Эзэн иигэжэ айладхана: Би, Эзэн, Өөрынгөө үхибүүдтэ мэтээр таанадта хандахаяа һанаа һэм. Бусад арадуудта орходоо үлүү һайхан, үзэсхэлэн гоё газар нютаг таанадта үгэхэеэ һанаа һэм. Таанад Намайе Эсэгэ гэжэ нэрлэжэ, хододоо хойноһоомни дахажа ябахат гэжэ һанаа бэлэйб.

²⁰ Теэд ши, Израиль, үбгэндөө үнэн сэхэ бэшэ һамган мэтэ, Намайе мэхэлэн байбаш. Энэ болбол Би, Эзэн, тунхаглана мүн!

²¹ Хадын нюсэгэн оройнууд дээрэһээ абяан дуулдана: энэ хадаа Израилиин улад зоной гуйха болон уйлахань соностоно. Ушарынь гэбэл, тэдэ нүгэл хэжэ, Эзэниие, өөрынгөө Бурханиие, мартаа.

²² Эзэнһээ буруу хараһан таанад, бусажа ерэгты. Тэрэ таанадые эмшэлжэ, үнэн сэхэ болгохо. Таанад хэлээ бэлэйт: – Харагты, Эзэндэ бидэ эрьехэмнай. Тэрэ манай Бурхан.

²³ Үнэхөөрөө, гүбээ хаданууд дээрэ манай мүргэл хэһэн ушар бидэндэ оройдоошье туһа болоогүй. Израилиин абарал хадаа гансал манай Эзэн Бурхан болоно гээшэл!

²⁴ Эгшүүритэй муухай Баалда мүргэхэдөө, эд зөөриеэ, үхэр малаа – эртэ урдаһаа хойшо үбгэ эсэгэнэрэйнгээ суглуулһан бүхы баялигые гээгээбди. Баалай шүтөөнүүд хүбүүд, басагадыемнай залгижархёо.

²⁵ Эшхэбтэр муу байдалда орожо, доромжолуулан һалаха ёһотойбди. Бидэ болон элинсэг хулинсагнай саг үргэлжэ Эзэн Бурханайнгаа урдаһаа нүгэл үйлэдэжэ байгаабди, Тэрэнэй үгэ дуулаагүйбди.