Ерэмияа 29 - Библи

Вавилоон руу угсаатандаа бэшэһэн бэшэг

¹ Иерусалимһаа Вавилоон руу баряанда Навуходоносорой туужа абаашаһан аха захатанда, санаартадта, лүндэншэдтэ, мүн бүхы зондо би бэшэг бэшээ һэм.

² Ехонияа хаанай, тэрэнэй хатан эхын, ордоной түшэмэлнүүдэй, Иудын хан түрын болон Иерусалимай ноёдой, уран гартанай болон дархашуулай Иерусалимһаа гаргагдан туугдаһанай удаа

³ тэрэ бэшэг Шапаанай хүбүүн Элэасаа болон Хилкияагай хүбүүн Гэмаария гэгшэдээр эльгээгдээ һэн. Тэдэниие Иудын хаан Цэдэкиия Вавилоон руу Навуходоносор хаанда эльгээгээ бэлэй.

⁴ Бэшэг соо бэшээтэй үгэнүүд гэбэл, Түмэн Сэрэгтэ Эзэн, Израилиин Бурхан, Иерусалимһаа Вавилоон руу сүлэжэ эльгээһэн бүхы зондо иигэжэ айладхана:

⁵ Гэрнүүдые барижа, тэдэнээ тоологты, сэсэрлигүүдые тарижа, үрэ жэмэсынь эдигты.

⁶ Һамга абажа, үхи хүүгэдтэй бологты, хүбүүдээ һамга абхуулагты, басагадаа хадамда үгэгты, иигэжэ тэдэшье үринэртэй болог. Тэндэ үнэржэгты, бү үсөөрэгты!

⁷ Минии таанадые сүлэн эльгээһэн хотонуудай аша туһада оролдогты. Тэдэнэй түлөө Намда зальбарагты, юуб гэхэдэ, тэдэнэй һайн байбал, таанадшье һайн, урагшатай байхат.

⁸ Би, Түмэн Сэрэгтэ Эзэн, Израилиин Бурхан, таанадай дунда ажаһуудаг лүндэншэд болон үзэлшэдтэ бү мэхэлүүлэгты гэжэ таанадые һэргылнэб. Тэдэнэй зүүдэлдэг зүүдэнүүдые бү тоогты.

⁹ Тэдэ Минии нэрэһээ таанадта худал юумэ тунхаглана. Би тэдэниие эльгээгээгүйб. Энэ болбол Би, Эзэн, айладхана мүн!

¹⁰ Эзэн «Вавилоондо танай байха далан жэлэй дүүрэхэдэнь, таанад тухай һанаагаа табихаб, Өөрын һайн үгые бэелүүлхэб – таанадые һөөргэнь гэртэтнай бусаахаб!

¹¹ Таанад тушаа түсэблэһэн юумэеэ Би гансал Өөрөө мэдэнэб, гай тодхор бэшэ, амгалан тайбаниие таанадта үршөөхэб, танай найдадаг ерээдүйе үгэхэб.

¹² Таанадай Намайе дуудахада, ерэжэ, Намда зальбархада, Би таанадые дуулахаб.

¹³ Таанад Намайе бэдэрхэт, бүхы зүрхэ сэдьхэлээрээ Намда тэгүүлэн бэдэрбэл, олохот.

¹⁴ Тиимэ даа, таанад Намайе олохот гээд Би айладханаб. Тарааһан бүхы орон нютагууд, бүхы газарнууд сооһоо таанадые Би суглуулхаб, тиигээд сүлэлгын урда тээ байһан газартатнай һөөргэнь бусаахаб. Энэ болбол Би, Эзэн, айладхана мүн!» гэнэ.

¹⁵ Эзэн Вавилоондошье таанадта лүндэншэдые үршөөгөө гэлдэнэт.

¹⁶ Давидай хан шэрээ дээрэ һуугша хаан тухай, сүлэлгэдэ тантай хамта ошоогүй, энэ хотодо ажаһуугша аха-дүүнэр тухайтнай Эзэнэй айладхаһые анхарагты.

¹⁷ Түмэн Сэрэгтэ Эзэн иигэжэ айладхана: – Үзэгты, Би тэдээндэ дайн дажар, үлэсхэлэн хооһон байдал болон тахал үбшэ асархаб. Илзарһан тула эдижэ болохогүй инжиртэй адли тэдэниие болгохоб.

¹⁸ Би тэдээнһээ дайн дажар, үлэн хооһон байдал, тахал үбшэ таһалдуулангүй дахан байлгахаб. Дэлхэйн үндэһэ яһатан тэдэниие хаража, һүрдэхэ. Хаа-хаанагүй тэдэниие тараахаб, зон эдэ бүгэдые хараад, сошохо, айха. Үндэһэ яһатад тэдэниие наада хараха, хараал мэтээр нэрыень дурдадаг болохо.

¹⁹ Минии тэдээндэ Өөрын зарасанараа – лүндэншэдээ хэдэн дахин эльгээжэ байбашье, тэдэ Минии үгэ дуулахаяа арсаа.

²⁰ Мүнөө таанад, Иерусалимһаа Вавилоон руу сүлэлгэдэ ябуулһан улад зомни, Минии, Эзэнэй, үгэ шагнагты.

²¹ Минии нэрэ хэрэглэн, таанадта худал юумэ соносходог Холайяагай хүбүүн Ахааб болон Маашэяагай хүбүүн Цэдэкиия гэгшэдые Вавилооной хаан Навуходоносорой мэдэлдэ үгэхэб, тиихэдэм тэрэ тэдэниие хараһаар байтартнай алаха. Энэ болбол Би, Түмэн Сэрэгтэ Эзэн, Израилиин Бурхан, айладхана мүн!

²² Иигэжэ Вавилоон руу сүлэгдэһэн Иудын бүхы зон хараал табихаяа һанахадаа, «Вавилооной хаанай амидыгаар галда шатааһан Цэдэкиия болон Ахаабта адляар Эзэн таанадта хандаг лэ!» – гэдэг байха.

²³ Жэгшүүрилтэй муухай юумэ тэдэ Израиль соо хээ: хадамтай эхэнэрнүүдтэй забхайралдаа, Эзэнэй нэрэһээ худал юумэ тунхаглаа. Харин Эзэн иимэ юумэ хэлэхыень тэдээндэ захираагүй бэлэй. Тэдэнэй хэһэн юумые Эзэн мэдэнэ, Тэрэ – урдаһаань тулаха гэршэ.

Шэмаяагай бэшэг

^24-25 Түмэн Сэрэгтэ Эзэн, Израилиин Бурхан, Иерусалимай улад зондо болон Маашэяагай хүбүүн, санаартан Цэпаанияа гэгшэдэ, мүн бусад санаартадта бэшэг эльгээхэ Нэхэлаам хүн Шэмаяа гэгшэдэ мэдээсэл дуулгахыемни захираа. Тэрэ бэшэг соогоо Шэмаяа Цэпаанияада иигэжэ бэшэнэ:

²⁶ – Ёядаагай орондо шамайе Эзэн санаартан болгон табяа. Ши Һүмэ соо эгээл ехэ тушаалтан болоош. Галзуу хүн бүхэн лүндэншэ болохоёо һанадаг. Тиимэ хүндэ түмэр хөөмэгшэ углаад, гэнжэлхэ ёһотойш.

²⁷ Анатоот хотын Ерэмияа гэгшын лүндэн табихадань, юундэ тиигээгүйбши?

²⁸ Тэрэ Вавилоон руу, зондо «Баряанда байхатнай удаан үргэлжэлхэ. Гэрнүүдые барижа, тэндээ ажаһуугты, сэсэрлиг тарижа, үрэ жэмэсээрнь хооллогты» – гэжэ хэлээ.

²⁹ Цэпаанияа энэ бэшэг намда уншажа үгөө.

³⁰ Тэрэнэй һүүлээр Эзэн намда хандажа,

^31-32 Вавилоондо баряанда байгааша бүхы зондо Шэмаяа тухай иимэ мэдээсэл дуулгахыемни захираа: – Би, Эзэн, Нэхэлаамай Шэмаяа гэгшые, тэрэнэй уг удамые хэһээхэб. Би тэрэниие эльгээгээгүйб, теэд тэрэ таанадтай лүндэншэ мэтээр хөөрэлдөө, таанадые худал юумэндэ этигүүлээ. Тиимэһээ тэрэ үри хүүгэдгүй байха. Намда эсэргүүсэн номлоһонойнгоо түлөө тэрэ улад зондоо Минии хэхэеэ байһан һайн һайхан юумэнүүдые харахагүй. Энэ болбол Би, Эзэн, айладхана мүн!