Ерэмияа 28 - Библи

Ерэмияа ба Ханаанияа

¹ Цэдэкиия гэгшын Иудын хан түрые дүрбэдэхи жэлээ, табадахи һараа зонхилжо байха үедэ, эгээл тэрэ жэлдэ Аззуурай хүбүүн, Гибэһоон хотын лүндэншэ Ханаанияа Эзэнэй Һүмэ соо намтай хөөрэлдөө бэлэй. Санаартадай болон улад зоной дуулаһаар байтар тэрэ Түмэн Сэрэгтэ Эзэнэй, Израилиин Бурханай, иигэжэ айладхаһые дуулгаба:

² – Израилиин Бурхан, Түмэн Сэрэгтэ Эзэн иигэжэ айладана: – Вавилооной хаанай хүсэ шадалые бута сохин бууруулхаб.

³ Навуходоносор хаанай Вавилоон руу абаашаһан Һүмын бүхы үнэтэ баялигуудые хоёр жэлэй туршада энэ газар руу һөөргэнь бусаахаб.

⁴ Би мүн лэ Иудын хаан, Ёякиимэй хүбүүн Ехонияа гэгшые Вавилоон руу сүлэгдэһэн Иудын бүхы зонтойнь хамта һөөргэнь бусаахаб. Мүн даа, Вавилооной хаанай хүсэ шадалые бута сохин бууруулхаб. Энэ болбол Би, Эзэн, айладхана гээшэб! – гэжэ тунхаглана.

⁵ Тиихэдэнь Һүмэ соо байгааша санаартадай болон бүхы зоной дуулаһаар байтар би Ханаанияа гэгшэдэ:

⁶ – Һайн даа! Эзэн иигэжэ үйлэдэхэнь болтогой! Нангин үргөөгэй үнэтэ баялигуудые болон Вавилоон руу сүлэгдэһэн бүхы зониие Тэрэ һөөргэнь бусааха гэгшэ шинии үгэнүүдые Эзэн бэелүүлхэнь болтогой!

⁷ Гэбэшье шамда болон улад зондо минии хэлэхэ үгэнүүдые шагна.

⁸ Минии, шинии урда тээ ажаһуугша лүндэншэд олон үндэһэ яһатан руу, ехэ хан түрэнүүд руу дайн дажар, үлэсхэлэн хооһон байдал, тахал үбшэн бууха гээд лүндэн табиһан юм.

⁹ Амгалан тайбан байха гээд соносходог лүндэншын хэлэһэн үгэнүүдэй үнэн дээрээ бэелүүлэгдэшоо гээшэ һаань, тэрэ Эзэнэй үнэхөөр эльгээһэн лүндэншэ гээд мэдэрэгдэхэл, – гээд хэлэбэб.

¹⁰ Тиихэдэ Ханаанияа лүндэншэн минии хүзүүнһээ хөөмэгшэ шүүрэн абажа хаяад, бута сохибо.

¹¹ Тиигээд тэрэ бүхы зоной байһаар байтар иигэжэ хэлэбэ: – Бүхы үндэһэ яһатанай хүзүүндэ Навуходоносор хаанай углаһан хөөмэгшые хоёр жэлэй туршада тон иимээр бута сохин һалгаахаб гэжэ Эзэн айладхана. Тиихэдэнь би ябашабаб.

¹² Энээнэй удаа Эзэн намда:

¹³ – Ошожо, Ханаанияада иигэжэ дуулга «Ши модон хөөмэгшэ эбдэхэдээ бэрхэш, теэд Би тэрэниие түмэр хөөмэгшөөр һэлгэхэб гэжэ Эзэн айладхана.

¹⁴ Түмэн Сэрэгтэ Эзэн, Израилиин бурхан, эдэ бүхы үндэһэ яһатан дээрэ түмэр хөөмэгшэ углаха, тиихэдэнь тэдэ Вавилооной хаан Навуходоносорто алба хэдэг болохо. Зэрлиг амитадыешье Навуходоносорто алба хэдэг Тэрэ болгохол!» гээд Ханаанияада дуулга, – гэбэ.

¹⁵ Энээниие би лүндэншэн Ханаанияада дуулгажа, үшөө: – Ханаанияа, шагна! Эзэн шамайе эльгээгээгүй. Зониие худал юумэндэ этигүүлжэ байнаш!

¹⁶ Тиимэ ушарһаа Эзэн шамайе газарай хүрьһэн дээрэһээ үгы хэхэ. Энэл жэлдээ ши үхэхэш, юундэб гэбэл, Эзэнэй урдаһаа эсэргүүсээш. Эзэн Өөрөө энээн тухай айладхал буулгаа! – гэжэ хэлэбэб.

¹⁷ Иигэжэ Ханаанияа тэрэл жэлэй долоодохи һарада наһа бараа бэлэй.