Ерэмияа 27 - Библи

Навуходоносорой мэдэл доро орогты!

¹ Ёшияагай хүбүүн Цэдэкиия гэгшын Иудын хан түрые зонхилжо эхилээд байхада, Эзэн Ерэмияада үгэ айладхаба.

² Хөөмэгшэ болон уялаануудые өөртөө хэжэ, хүзүүндээ үмдэхыемни Эзэн намда захирба.

³ Тиигээд Иудын хаан Цэдэкиияда Иерусалим ерэдэг элшэнэрээр дамжуулан, Эдоомой, Моһаабай, Аммооной, Тиирэй, Сидооной хаашуулда мэдээсэл эльгээхыемни Тэрэ намда захираа.

⁴ Түмэн Сэрэгтэ Эзэн, Израилиин Бурхан, иимэ айладхал хаашуулдаа тэдэнэй дуулгаха тухай минии хэлэхые захирба:

⁵ – Би Өөрын агууехэ шадалаар болон хүсөөр газар дэлхэйе, тэрээн дээрэ ажаһуудаг зониие, ан амитадые бүтээгээб. Энээниие Би дуратай нэгэндээ үгэхэб.

⁶ Иигэжэ Би эдэ бүхы үндэһэ яһатадые Өөрынгөө албатанай, Вавилооной хаан Навуходоносорой мэдэлдэ үгэнэб. Зэрлиг амитадыешье Тэрээндэ алба хэдэг болгооб.

⁷ Орон нютагайнь болон өөрынь Навуходоносорой доройтохо сагай ерэтэр бүхы үндэһэ яһатан тэрээндэ, хүбүүндэнь болон ашадань алба хэн байха. Доройтоһонойнь удаа өөрынь арад зон олон зонтой яһатанда болон томо хаашуулда алба хэдэг болохо.

⁸ Харин Вавилооной хаан Навуходоносорто алба хэдэггүй, мэдэл доронь ородоггүй үндэһэ яһатан гү, али хаан түрэ олдоо һаань, Би тиимэ үндэһэ яһатаниие Навуходоносорой гараар усадхатараа дайн дажараар, үлэсхэлэн хооһон байдалаар болон тахал үбшөөр зобоон-хэһээн байхаб.

⁹ «Таанад Вавилооной хаанай мэдэлдэ бү орогты» гэжэ хэлэдэг лүндэншэдөө, үзэлшэдөө, зүүдэ тайлбарилагшадаа, эди шэдитэнээ, эльбэтэйшүүлээ бү дуулагты.

¹⁰ Тэдэ таанадые мэхэлнэ, орон нютагһаа танай холодуулагдахые хүсэнэ. Би та бүгэдые үлдэн гаргахаб, тиигээд таанад үхэхэт.

¹¹ Харин Вавилооной хаанай мэдэлдэ ороһон, тэрээндэ алба хэдэг болоһон үндэһэ яһатанда Би орон нютагтаа үлэхыень, газараа элдүүрилжэ, тэндээ амидархыень зүбшөөхэб. Энэ болбол Би, Эзэн, айладхана мүн!

¹² Би иимэл үгэнүүдые Иудын хаан Цэдэкиия гэгшэдэ хэлээб: – Вавилооной хаанай мэдэл доро орожо, тэрээндэ болон арад түмэндэнь алба хэгты, тиигээд амиды мэндэ үлэхэт.

¹³ Вавилооной хаанда алба хэдэггүй үндэһэ яһатан тухай Эзэнэй айладхаһанай ёһоор юундэ ши болон арад түмэншни дайн дажарһаа, үлэсхэлэн хооһон байдалһаа болон тахал үбшэнһөө үхэхэ ёһотой юм?

¹⁴ Вавилооной хаанай мэдэл доро орохогүй тухай хэлэдэг лүндэншэдые бү дуулагты. Тэдэ таанарые мэхэлнэ.

¹⁵ Тэдэниие эльгээгээгүй тухайгаа Өөрөө Эзэн тунхаглаа бэлэйл. Эзэнэй таанадые үлдэн гаргахын, таанадай үхэхын тула тэдэ зорюута Эзэнэй нэрэһээ худал үгэнүүдые соносхоно. Тиигэжэ таанад болон энэ худал үгэнүүдые хэлэгшэ лүндэншэд алуулхат.

¹⁶ Би санаартадта болон бүхы зондо хандан, Эзэнэй иигэжэ айладхаһые дуулгабаб: – Нангин үргөөгэй үнэтэ баялигууд удахагүй Вавилоонһоо бусаагдаха гэжэ хэлэдэг лүндэншэдые бү шагнагты. Тэдэ таанадые мэхэлнэ.

¹⁷ Бү шагнагты тэдэниие! Вавилооной хаанай мэдэл доро орогты, тиигээд амиды мэндэ үлэхэт. Энэ хото юундэ һандаргагдаха юм?

¹⁸ Харин тэдэ үнэхөөр лүндэншэд байжа, Минии үгэ мэдэдэг юм һаа, Һүмэ соо, мүн Иудын хаанай ордон соо, Иерусалимда үлөөшэ үнэтэ баялигуудые Вавилоон руу эльгээхэгүй тухай Намайе, Түмэн Сэрэгтэ Эзэниие, одоо гуйг лэ.

^19-20 (Вавилооной хаан Навуходоносор Иудын хаан, Ёякиимэй хүбүүн Ехонияа гэгшые, мүн Иудын хан түрын, Иерусалимай бүхы ноёд түшэмэлнүүдые Вавилоон руу сүлэлгэдэ абаашахадаа, баханануудые, уһанай гуулин ехэ амһарта, табюурнуудые болон Һүмын бусад баялигуудые Иерусалимда үлөөһэн байгаа.)

²¹ Түмэн Сэрэгтэ Эзэн, Израилиин Бурхан, Һүмэ соо болон Иудын хаанай ордон соо, Иерусалимда үлөөшэ үнэтэ баялигууд тушаа иигэжэ айладхана:

²² «Тэдэ Вавилоон руу абаашагдаха, Минии анхартар тэндээл байха. Удаань Би тэдэниие бусаажа, энэ газартань һөөргэнь асархаб. Энэ болбол Би, Эзэн, тунхаглана мүн!»