Ерэмияа 26 - Библи

Ерэмияае бариба

¹ Ёшияагай хүбүүн Ёякиимэй Иудын хан түрые зонхилжо һаял эхилээд байһан сагта

² Эзэн намда иигэжэ айладхаба: – Һүмын хашаа соо зогсожо, мүргэхэеэ тиишээ Иудын хан түрын бүхы хотонуудһаа ерэһэн улад зондо Минии хэлэхыеш захирһан бүхы үгэнүүдые соносхон бай. Нэгэшье үгэ бү алда!

³ Тэдэ шагнажа, муу замаа орхижо магадгүй. Тиигээ һаань, муу муухай үйлэ хэрэгүүдэйнь түлөө тэдээндэ гай тодхор татахаяа байһан түсэбөө Би болюулхаб.

⁴ Зондо иигэжэ хэлэхыемни Эзэн захираа: – Минии дамжуулһан һургаал заабари сахиха ёһотойт.

⁵ Минии танда ходо эльгээжэ байһан албатан лүндэншэдэй үгэнүүдые дуулаха ёһотойт. Теэд таанад тэдэнэй үгэ дууланагүйт.

⁶ Иигэжэ байгаа һаатнай, Би энэ Һүмэдэ Шилоодо хандаһандал адляар хандахаб, тиихэдэм дэлхэйн бүхы арадууд энэ хотын нэрые хараал мэтээр дурдан хэлэдэг болохо.

⁷ Санаартад, лүндэншэд болон бүхы зон Эзэнэй Һүмэ соо минии эдэ үгэнүүдые хэлэжэ байһые дуулажа,

⁸ дамжуулан хэлэхэ тухай Эзэнэй захирһан бүхы үгэнүүдые минии хэлэжэ дүүргэхэдэ, тэдэ намайе барижа: – Ши үхэхэ ёһотойш!

⁹ Энэ Һүмэ Шилоодол адли болохо, энэ хото һандаргагдаха, хэншье тэндэ ажаһуухагүй гээд юундэ Эзэнэй нэрэһээ лүндэн табижа байнабши? – гэлдэн хашхаралдаба. Тиигээд улад зон намайе тойрон сугларба.

¹⁰ Иудын түшэмэлнүүд энээн тухай дуулахадаа, хаанай ордонһоо Эзэнэй Һүмэ руу ошожо, Шэнэ Бартаануудай хажуугаар һуурияа эзэлбэ.

¹¹ Тиигээд санаартад болон лүндэншэд түшэмэлнүүдтэ болон бүхы зондо хандан: – Энэ хүн үхэхэ ёһотой! Юуб гэхэдэ, тэрэ манай хотын урдаһаа лүндэн табижа байна. Энээниие таанад өөһэдөө һайн дуулаһан байна гээшэт, – гэжэ хэлэбэ.

¹² Тиихэдэнь би: – Энэ Һүмын болон энэ хотын урдаһаа таанадай соносхоһон эдэ бүхы үгэнүүдые хэлэхыемни Эзэн намайе эльгээгээ.

¹³ Өөһэдынгөө ажабайдалай зам болон үйлэ хэрэгүүдээ заһагты, Эзэн Бурханайнгаа үгэ дуулагты. Тиигээ һаатнай, таанарта татахаяа байһан гай тодхороо Тэрэ болюулхал.

¹⁴ Харин нам тухай хэлэхэ болоо һаа, би таанадай мэдэлдэ ороод байнаб. Өөһэдынгөө зүб ба зүйтэй гэжэ һанаһан юумэ намтай хэхэдэтнай болохо.

¹⁵ Харин мэдэжэ байгты: хэрбээ намайе алаа һаа, таанад өөһэдөө мүн энэ хотын ажаһуугшад ямаршье гэмгүй хүниие хорооһон гэм зэмэтэй болохот. Юуб гэхэдэ, эдэ бүхы үгэнүүдые соносхохыемни Эзэн үнэхөөр намайе таанадта эльгээгээ бэлэйл, – гэжэ хэлэбэб.

¹⁶ Тиихэдэм түшэмэлнүүд болон улад зон санаартадта болон лүндэншэдтэ: – Энэ хүн Эзэн Бурханаймнай нэрэһээ бидэнтэй хөөрэлдөө, тиимэһээ тэрэ үхэхэ ёһогүй! – гэжэ хэлэбэ.

¹⁷ Удаань орон нютагай аха захатанай заримань бодожо, сугларһан бүхы зондо хандан:

¹⁸ – Хэзэкияа гэгшын Иудын хаан байха үедэнь лүндэншэ Морээшэдэй Михей Иудын хан түрын бүхы арадта Түмэн Сэрэгтэ Эзэнэй иимэ айладхал дуулгаа бэлэй: Сион таряалангай талмай мэтэ хахалагдаха, Иерусалим обоолоотой һандархай шулуун болохо, Һүмын мүнөө байгааша газар ой модоной ургадаг гүбээ болохо.

¹⁹ Хэзэкияа хаан болон Иудын хан түрын улад зон Михей гэгшые алаагүй. Хэзэкияа Эзэниие хүндэлжэ, Тэрээндэ һайшаагдаха гэжэ оролдоо. Тиимэһээ Эзэн тэдээн дээрэ татаха гэжэ байһан гай тодхороо болюулаа бэлэй. Харин бидэ өөһэдөө өөһэдтөө ехэ гай гасалан үйлэдэхэ гэжэ байнабди.

²⁰ Эзэнэй нэрэһээ энэ хотын болон энэ арад үндэһэтэнэй урдаһаа хэлэжэ байһан, Кирьяат-Еариимэй Шэмаяа гэгшын хүбүүн Урияа гэгшэ байһан гэхэ. Тэрэ Ерэмияадал адли иимэ үгэнүүдые хэлэдэг байгаа.

²¹ Ёякиим хаан, тэрэнэй сэрэгшэд болон түшэмэлнүүд Урияагай үгэнүүдые шагнажа, тэрэниие алахаяа һанаба. Теэд Урияа энээн тушаа дуулаад, айн тэрьедэжэ, Египет руу гүйгөө.

²² Тиихэдэнь Ёякиим хаан Египет руу тэрэнэй хойноһоо Ахбоорой хүбүүн Элнатааные хэдэн хүнтэй хамта эльгээгээ.

²³ Тэдэ Урияае Египедһээ гаргажа, Ёякиим хаанда асараа. Хаан тэрэниие сабшан алажа, бэеыень хара зониие хүдөөлүүлдэг булаша руу хаяа һэн.

²⁴ Теэд би Шапаанай хүбүүн Ахикаамай туһалһанай ашаар зондо үгтөөгүйб, алуулаагүйб.