Ерэмияа 19 - Библи

Бутарһан домбо

¹ Эзэн минии ошожо, шабар амһарта худалдан абахыем захирба. Арад түмэнэй ахамад зоной, мүн ахамад санаартадай заримые абан ошохо тухайм Тэрэ мүн лэ захираа.

² Потшертэ бартаануудаар гаража, Бэн-Һинноомой хүндыдэ ошожо, Тэрэнэй намда айладхаһан үгэнүүдые би тунхаглаха ёһотой бэлэйб.

³ Эзэн намда иигэжэ хэлэхыем захирба: – Иудын хаашуул, Иерусалимай ажаһуугшад, Израилиин Бурханай, Түмэн Сэрэгтэ Эзэнэй, айладхал шагнагты! Энэ газар нютагта Би гай тодхор татахамни, тэрээн тушаа дуулаһан хүн бүхэн угаа ехээр бахардаха.

⁴ Ушарынь гэбэл, зон Намайе орхижо, энэ газар бузарлаа, өөһэдөөшье мэдэхэгүй, үбгэ эсэгэнэрэйньшье мэдэхэгүй, Иудын хаашуулайшье танихагүй ондоо бурхадта санзай эндэ ууюулаа. Гэм зэмэгүй зоной шуһаар энэ газарые дүүргээ.

⁵ Түгэс шатаалта үргэл болгон үхи хүүгэдээ галда шатаахын тула тэдэ Баалда обоонуудые бариһан юм. Энэнь Минии хэзээшье захираагүй, хэлээгүй, Минии һанаандашье ороогүй зүйл лэ.

⁶ Тиимэһээ, үзөөрэйгты, энэ газар Тоопэт гү, али Бэн-Һинноомой хүнды гэжэ дахин нэрлэгдэхэеэ болижо, харин Хюдалгын хүнды гэжэ нэрлэгдэхэ саг дүтэлжэ байна.

⁷ Иудын хан түрын болон Иерусалимай улад зоной бүхы түсэбүүдые энэ газар дээрэ һандаргаажа, дайсадтань тэдэниие диилүүлхэб, байлдаануудта алуулхаб. Тэдэнэй хүүрнүүдые тэнгэриин шубуу шонхорто болон зэрлиг амитадта хүнэһэн болгон үгэхэб.

⁸ Энэ хотые угаа ехээр һандаргаахаб. Хажуугаарнь гараһан хүн бүхэн сошохо, шархануудыень хаража, сэдьхэлээ доһолхо.

⁹ Дайсан хотые бүһэлжэ, зониие гай зоболондо оруулха. Бүһэлэлтэдэ байха гээшэ угаа аймшагтай байха: хото соо байгааша зон бэе бэеэ, үхи хүүгэдээшье эдижэ эхилхэ.

¹⁰ Намтай ябаһан зоной хараһаар байтар шабар амһарта тэһэлхыемни Эзэн намда захирба.

¹¹ Түмэн Сэрэгтэ Эзэн иигэжэ айладхана гээд хэлэхыемни Тэрэ намда захираа: «Дахин бүтэн болгожо шадахагүйгөөр шабар амһарта хахалһантай адляар Би эдэ зониие болон энэ хотые һандаргаахаб! Хүдөөлүүлхэ газарай үгы болоһон ушарһаа зониие Тоопэдтэшье хүдөөлүүлдэг болохо.

¹² Энэ хотые болон ажаһуугшадынь Тоопэдтэл адли болгохоб!

¹³ Гэрэй хушалтанууд дээрэ огторгойн мүшэдтэ уталга ууюулһан, ондоо бурхадта сэржэм үргэһэн – бүхы иимэ Иерусалимай гэр байранууд, Иудын хаашуулай гэрнүүд Тоопэт газартал бузарлагдаха».

¹⁴ Айладхалынь дуулгахаяа Эзэнэй намайе эльгээһэн Тоопэдһээ би тиигээд гаража ошоо һэм. Эзэнэй Һүмын хорёо соо зогсоод, бүхы улад зондо

¹⁵ Израилиин Бурхан, Түмэн Сэрэгтэ Эзэн иигэжэ айладана: «Үзөөрэйгты, Минии үгэ дуулахагүй гэжэ үсэрхэһэнэйтнай түлөө Би тунхаглаһан бүхы гай тодхороо энэ хотодо болон оршон тойронхи һууринуудтань шэглүүлхэмни», – гээшые дуулгаа һэм.