Ерэмияа 18 - Библи

Ерэмияа амһарта бүтээгшын гэртэ

¹ Эзэн намда иигэжэ айладхаба:

² – Шабар амһарта бүтээгшын гэртэ уруудан ошо. Тэндэ Би шамда үгэеэ айладхахаб.

³ Шабар амһарта бүтээгшын гэртэ ошоходом, тэрэ эрьелдэдэг түхэреэн эрьюулгэ дээрээ нэгэ зүйл хэжэ байба.

⁴ Шабараар хэжэ байһан амһартынь бүтэхэгүйдэ тэрэ өөрынгөө һанагшаар ондоо амһарта тэрээгээр бүтээжэ байгаа бэлэй.

⁵ Тиихэдэнь Эзэн намда иигэжэ айладхаба:

⁶ – Израилиин улад зон, энэ шабар амһарта бүтээгшэдэл адли, Би таанадтай иимэ юумэ хэжэ шадахагүй гэжэ гү? Амһарта бүтээгшын гарта байһан шабартал адли таанад Минии гарта байнат.

⁷ Алишье сагта Би ямар нэгэ үндэһэтэниие, үгышье һаа, хан түрые үндэһөөрнь татан һалгааха, бута сохихо, усадхаха тухай айладхал буулгажа болохоб.

⁸ Теэд тэрэ хэлээшэ арадаймни өөрын муу муухай хэрэгүүдһээ эрьен холодоо һаань, Би тэдээн дээрэ буулгахаар түсэблэжэ байгаа гай тодхороо болюулхаб.

⁹ Алишье сагта ямар нэгэ үндэһэтэниие, үгышье һаа, хан түрые байгуулха, үндэһэлэн һуурижуулха тухай айладхал буулгажа болохоб.

¹⁰ Теэд тэрэнэй үгыем дуулангүй, муу юумэ хэжэ байбалнь, тэрэниие юрөөхөөр амаа алдаһан һайн һайханаа болюулхаб.

¹¹ Тиимэһээ одоо Иудын хан түрын, тэрэ тоодо Иерусалим хотын, улад зондо Минии тэдэнэй урдаһаа түсэблэн байгаа гай тодхор тухай, мүн тэдэниие хэһээхэеэ бэлдэжэ байһан тухайм дуулга. Хүн бүхэн нүгэлһөө зайлажа, һанаа бодол, хэрэгүүдээ хубилгаха ёһотой.

¹² Теэд тэдэ: «Үгы даа! Бидэ һанаһаараа юумэ үйлэдэхэбди, үсэд, муу байһаараал байхабди», – гэжэ хэлэхэл.

Зон Эзэнһээ хадуурба

¹³ Эзэн иигэжэ айладхана: Иимэ юумэн урдань болодог байгаа юм аал гэжэ үндэһэн арад бүхэнһөө асуугты. Израилиин улад зон угаа жэгшүүритэй зүйл үйлэдэнэ.

¹⁴ Ливаанай хабсагайта үндэрнүүд хэзээ нэгэтэ саһагүй болодог юм гү? Хадын хүйтэн урасхалнуудынь шэргэдэг юм аал?

¹⁵ Харин Минии арад зон Нам тухай мартаа. Тэдэ шүтөөнүүдтэ санзай ууюулна, харгы замаа төөрижэ, урданай һайн замуудаа – Моисейн Хуули орхибо. Тэдэ зүргэ мэтэ муу харгыгаар ябана.

¹⁶ Тэдэ өөрын нютагаа жэгшүүрилтэ зүйл, баһан наадалха зүйл болгоо! Тэрэнэй хажуугаар үнгэрһэн хүн бүхэн угаа гайхажа, толгойгоо һэжэрхэл.

¹⁷ Зүүн зүгэй һалхинай тооһо шорой хүдэлгэдэгтэл, өөрын арад зониие дайсадайнь урда тараахаб. Нюргаа тэдээндэ харуулжа, гай тодхоройнь үедэ туһалхагүйб!

Ерэмияагай урдаһаа хэлсээн

¹⁸ Байһаар улад зон иигэжэ хэлсэбэ: «Ерэмияагай урдаһаа хамтарая! Маанадта хуули ёһо зааха санаартад, зүбшэл үгэхэ сэсэн мэргэшүүл, лүндэншэд хододоо байхал. Тэрэниие улаан хэлээрээ даража, хардая, хэлээшыень анхархаяа болие!»

¹⁹ Би: – Эзэмни, намайе шагнажа, дайсадаймни юу хэлэжэ байгаашые соносыт!

²⁰ Һайн юумэ муугаар харюулдаг юм гү? Минии унахын тула тэдэ нүхэ малтаа. Уур хилэнгыетнай тэдэнһээ зайлуулхын тула Таниие гуйжа байһыем һаныт!

²¹ Теэд мүнөө үхи хүүгэдыень туража үхүүлыт, дайн дажарта усадхыт, эхэнэрнүүдынь бэлбэһэн болог, үри хүүгэдээ гээг, эрэшүүлынь үхэл хаталда дайрагдаг, залуушуулынь байлдаанда алуулаг лэ!

²² Гэр байрыень дээрмэдүүлхэеэ гэнтэ зониие эльгээгыт, һүрдэн, оог хашхараан тэдэ болог лэ. Минии унахын тула тэдэ нүхэ малтаа, хүлыем тушахын тула урьха табин нюугаа.

²³ Теэд Та, Эзэн, намайе алахаяа һанаһыень мэдэнэт. Гэм бурууень бү хүлисыт, нүгэлыень бү мартыт. Тэдэ Танай урда хүмэрин унаха болтогой. Уурлан хилэнтэһэн сагтаа тэдээнтэй юушье хэхэ – Танай дуран.