Ерэмияа 17 - Библи

Иудын хан түрын нүгэл

¹ Эзэн айладхана: – Иудын хан түрын зоной нүгэл түмэр эритээр, баллахын аргагүйгөөр бэшэгдэнхэй, ошорой үзүүрээр зүрхэнэйнь хабтаһан дээрэ һиилэгдэнхэй, үргэлэй шэрээгэй углуунууд дээрэ барлагданхай.

^2-3 Үхибүүдтээ һанаагаа табидагтал, тэдэ үргэлэй шэрээнүүд, Ашэраа бурханай хүрэгүүд, һаглагар модод, үндэр гүбээнүүд, намжаа талаар ербылдэгшэ хаданууд тухай һанаагаа табидаг. Тиимэһээ таанадай, Иудын хан түрын зоной, мүргэлэй обоонуудай түлөө, өөрынгөө бүхы орон нютагаар хэһэн нүгэлэйтнай түлөө танай эд баялигые болон бүхы эрдэни зэндэмэниие дайсадтатнай үгэхэб.

⁴ Минии үршөөһэн газар нютагые таанад өөрынгөө мууһаа боложо гээхэт. Мэдэхэ-танихагүй нютагтатнай Би таанадые дайсадтатнай богоол болгон үгэхэб. Юуб гэхэдэ, таанад Намайе угаа сухалдуулаат, уур хилэмни гал мэтэ бушаганаа, хэтэ мүнхэдөө тэрэ носохол!

Элдэб айладхалнууд

⁵ Эзэн иигэжэ айладхана: Намһаа буруу хаража, зондо найдажа, хэзээ нэгэтэ үхэхэ юумэндэ найдан түшэглэгшэд хараал шэнгээхэ!

⁶ Элһэн сүл губидахи хадхууртай һөөг мэтэ, халуун, хуурай хооһон, бэшэ юунэйшье ургадаггүй дабһатай газарта байгааша, хэнэйшье харадаггүй һөөг мэтэ тэрэ. Бурханай үршөөдэг һайн һайхан юумэн тухай тэрэ мэдэнэгүй.

⁷ Намда этигэдэг, этигэл найдабаряа Намда зорюулдаг хүниие Би үреэхэб.

⁸ Урасхал уһанай дэргэдэ һуулгаһан, үндэһөө уһан руу татаһан, халуунай шатахада айхагүй модон мэтэ тэрэ болохо. Набша намаань ногоон, бороогүй, хуурай байхада тэрэ айхагүй, үрэ жэмэс тэрэ үгэжэл байдаг.

⁹ Хүнэй зүрхэ сэдьхэл харатай, заһахын аргагүй. Тэрэниие хэн ойлгожо шадахаб?

¹⁰ Бил, Эзэн, зоной һанаа бодол нэбтэ хаража, зүрхэ сэдьхэлыень туршадагби! Ажаһуудаг заяг заршамайнь ёһоор, үйлэ хэрэгүүдэйнь лэ ёһоор тэдээндэ хандадагби!

¹¹ Хуули бусаар баяжаһан хүн түрөөгүй үндэгэеэ дарадаг шубуундал адли. Наһанайнгаа түлэг дунда тэрэ баялигаа гээжэ, эсэсэй эсэстэ тэнэг болоод үлэхэ!

¹² Манай Эзэнэй үргөө эгээл эхинһээ Бурханай алдар солын сэнтии, эгээл нангин газар лэ.

¹³ Эзэн, Та – Израилиин найдабарит. Танһаа арсан ошогшод нэрээ гутааха, тооһон дээрэ бэшэһэн бэшэгтэл үгы болохо. Юуб гэбэл, тэдэ Таниие, Эзэниие, сэбэр уһанай булагые, орхибо ха юм.

Ерэмияа туһа эринэ

¹⁴ Оо, Эзэн, намайе аргалыт, тиихэдэтнай би эдэгэхэб; намайе абарыт, тиихэдэтнай би абарагдахаб. Та – минии магтаал гээшэт!

¹⁵ «Эзэнэй бидэниие занажа хэлэһэниинь хаана гээшэб? Бэелдэг лэ!» – гээд зон намда хэлэнэ.

¹⁶ Эзэмни, эдээндэ гай тодхор татахыетнай Таниие би гуйжа байгаагүйб, гай зоболоной саг эдээндэ хүсэн байгаагүйб, энээниие Та мэдэнэт. Минии хэлэжэ байгаашые Та Өөрөө мэдэжэ байнат.

¹⁷ Намайе ухаа алдуулан айлгажа бү байгыт. Гай тодхорой үедэ Та минии аршалалтат.

¹⁸ Хойноһоом мүрдэгшэдэй нэрыень хухалыт, харин намайе дүмөөрэйт, Эзэмни. Тэдэниие һүрдөөн айлгыт, харин намайе бү һүрдөөгыт. Тэдээндэ гай зоболон асаржа, тэһэ биса сохиит!

Амаралтын үдэр сахиха тухай

¹⁹ Эзэн намда иигэжэ айладхаба: – Иудын хаашуулай орожо-гаража байдаг Иерусалимай ниитын бартаануудта ошожо, энэ соносхол дабта.

²⁰ Иудын хаашуулда болон улад зондо, Иерусалимда ажаһуудаг, эдэ бартаануудаар орон ерэдэг бүхы зондо Минии айладхал шагнахыень дуулга.

²¹ Ами наһаяа аршалха гээ һаа, амаралтын үдэр ямар нэгэн ашаа үргэхэһөө, Иерусалимай бартаануудаар ямар нэгэн зүйл үргэн гаргахаһаа болгоомжологты гэжэ тэдээндэ дуулга.

²² Таанад амаралтын үдэр гэрһээ ямар нэгэн ашаа зөөжэ бү гаргагты, ямаршье ажал бү хэгты. Элинсэг хулинсагуудтатнай захирһанайм ёһоор, амаралтын үдэрые арюун нангин үдэр гэжэ сахин байгты.

²³ Танай үбгэ эсэгэнэр Минии үгэ дуулаагүй, анхаралаа табяагүй. Дам саашаа Минии захиралта дүүргэхэгүйн, һургаалыем шагнахагүйн тула тэдэ үсэрхөө.

²⁴ Хэрбээ амаралтын үдэр энэ хотын бартаануудаар ямаршье ашаа зөөжэ оруулангүй, ямаршье ажал хэнгүй, амаралтын үдэрые нангинаар сахин, Минии үгэнүүдые дуулабалтнай,

²⁵ Иерусалимай бартаануудаар хаашуултнай, амбан ноёдтнай орон байха. Тэдэ Давидтал адли ехэ засаг түлөөлгэнүүдтэй байха юм. Иудын хан түрын болон Иерусалимай улад зонтой хамта тэдэ мори тэргээр болон мори унан ябаха, Иерусалим хото хэтэ мүнхэдөө улад зоноор дүүрэн хүүехэл!

²⁶ Түгэс шатаалта үргэл, үргэл, эдеэн үргэл болон уталга, мүн баясхалан хүргэһэн үргэлнүүдые Эзэнэй үргөөдэ асаржа, улад зон Иудын хан түрын хотонуудһаа, Иерусалимай оршон тойронхи нютагуудһаа, Бэньямиинэй газар нютагһаа, набтар нюруу газарһаа, хада уулатай газарһаа, урда Иудын хан түрэһөө ерэдэг байхал.

²⁷ Харин Минии үгэ дуулангүй, амаралтын үдэр нангинаар сахингүй, ашаа үргэн, амаралтын үдэр Иерусалимай бартаануудаар гаража байбалтнай, Би тэдэ бартаануудые галда шатаахаб! Гал дүлэн Иерусалимай ордонгуудые дууһан залгиха, хэншье тэрэниие унтаргаажа шадахагүй!