Ерэмияа 12 - Библи

Ерэмияа Эзэндэ хандана

¹ Эзэмни, минии Тантай зарга хэрэг ябуулаа һаа, Та хододоо үнэн зүб байхат. Гэбэшье Би Тантай үнэн шударгы ёһын хэрэгүүд тушаа адхаг һэжэгтэ баригдан хөөрэлдэхэ байнаб. Муу ябадалтайшуулда юундэ аза талаан туданаб, этигэлгүй, зүй буса зон юундэ хашалгүй амар байнаб?

² Һуулган тарихадатнай, тэдэ үндэһэлөө. Ургажа, үрэ жэмэсшье үгэдэг болоо. Танай нэрэ тэдэ аманһаа унагаадаггүй, гэбэшье зүрхэ сэдьхэлдээ сахидаггүй.

³ Харин, Эзэн, Та намайе мэдэнэт, минии юу хэдэгые харанат, Танда дуратайем ойлгонот. Үүсэлэгдэхэ хонид мэтээр тэдэниие шэрэжэ, һалгаагдаха үдэр хүрэтэрынь тэдэниие тусгаар харууһалыт.

⁴ Газар нютагнай хэды болотор уйдхар гашуудалда абтажа, хүдөө талын ургаса ногоон хатажа-гандажа байха юм? «Бидэнтэй юун болохые Бурхан мэдэнэгүй» гэжэ зон хэлсэнэ. Муу муухай эдэ зонһоо боложо, амитад болон шубууд хосорно.

⁵ Эзэн иигэжэ айладхаба: Ерэмияа, хэрбээ ши гүйгөөшэдтэй гүйжэ, ядараа, эсээ хадаа моридтой яажа урилдажа шадахабши? Хэрбээ ши салуу, үргэн нютагта бүдэрэн унажа байбал, Иорданай бүтүү шэрэнги соо яаха болонош?

⁶ Аха дүүнэршни, түрэл түтимшни хүрэтэрөө шамда урбаад байна. Тэдэ шам тухай муу юумэ хэлэнэ. Һайн үгэ нюурташни хэлээшье хадань, тэдээндэ бү этигэ.

Өөрын арадта Эзэнэй гомдол

⁷ Би Израилиие орхижо, Өөрынгөө арад түмэниие хаяаб. Дуратай арад зоноо дайсадайнь мэдэлдэ үгөөб.

⁸ Шэлэһэн зомни урдаһаам эсэргүүсэбэ. Ой соохи арсалан мэтэ тэдэ нам руу архирба. Тиимэһээ Би тэдэниие үзэн яданаб!

⁹ Мяхаша шубуудта тойруулан тоншуулжа байһан эреэ-маряан шубуун мэтэл шэлэһэн арадни. Ябажа, талын бүхы арьяатаниие суглуулагты! Ерэг, залгиха юумэн олдохол.

¹⁰ Хариин олон удамаршад үзэмэй модоной сэсэрлигыем һалгаагаа, дуратай газарыем дэбһэжэ, үнэһэн тобороог болгоо, дуратай газарыем һандархай хооһон дайда болгобо.

¹¹ Энэнь зэлүүд хооһон, эзэгүй болоод, Минии урда уйлажа байна. Бүхы газар нютаг ханха зайдан болоо. Хэншье тэрэниие хайхарнагүй.

¹² Сүл губиин нюсэгэн добо толгойгоор һүйд хэгшэд ябажа байна. Бүхы орон нютаг хюдахаяа дайн дажар үүсхэхэб. Ямаршье амитанда амгалан байдал таһалдаха.

¹³ Минии арад зон шэниисэ тариһан аад, үрмэдүүл хуряажа абаба. Тэдэ эсэн ядараа, гэбэшье ямаршье ашаг олзо олоогүй. Өөһэдынгөө ургасаһаа тэдэ эшэг лэ! Дүлэтэһэн уур сухални иимэл!

Израилиин хүршэнэр тушаа

¹⁴ Эзэн иигэжэ айладхана: – Минии арад түмэн болохо Израильда заяаһан газар орондом добтологшо хүршэнэр тухайнь: хараарайгты, ургамал үндэһөөрнь таһа татажа гаргаһандал, Би тэдэниие газар нютагһаань гаргахаб, Иудын хан түрые тэдээнһээ абархаб.

¹⁵ Гаргаһанайнгаа удаа Би тэдэниие дахин хайрлан, үндэһэн арад бүхэниие өөрынь газарта, өөрынь орон нютагта бусаан абаашахаб.

¹⁶ Хэрбээ тэдэ Минии арад зоной шажан мүргэл даган абажа, Баалай урда Минии зониие тангариглажа һургаһандал, Минии нэрээр «Бурхан үзэг!» гэжэ тангариглажа байгаа һаа, тэдэ Минии арад зоной нэгэ хуби болохо.

¹⁷ Харин Минии үгэ дуулаагүй арад түмэниие Би үндэһөөрнь һалгаажа, дууһан усадхахаб. Энэ болбол Би, Эзэн, айладхана мүн!