Ерэмияа 11 - Библи

Хэлсээн тухай

¹ Эзэн намда айладхаба:

² – Энэ хэлсээнэй үгэнүүдые шагнажа, Иудын болон Иерусалимай улад зондо дуулга.

³ Израилиин Эзэн Бурхан иигэжэ айладхана: Хэлсээнэй үгэнүүдые сахин дүүргэдэггүй хүн бүхэн хараал шэрээл шэнгээхэ.

⁴ Түмэр хайлуулдаг зууха мэтэ Египедэй орон нютагһаа таанадай үбгэ эсэгэнэрые гаргахадаа, Би энэ Хэлсээ тэдээндэ захин заабарилаа һэм. Минии үгэ дуулажа, захирһан бүхы юумыемни дүүргэжэ байхыень Би тэдээндэ захин хэлээб. Тиигэбэлнь, тэдэ Минии арад түмэн, Би тэдэнэй Бурхан болохо байһан тухайгаа айладхаа бэлэйб.

⁵ Тиигэбэлнь, һүн далайн, зүгын балай урдажа байһан, мүнөө тэдэнэй эзэлжэ байгаа газар нютагые үгэхэб гэжэ элинсэг хулинсагтань тангариглаһан тангаригаа бэелүүлхэ байгааб. Би харюудань: – Мүн даа, Эзэмни! – гэбэб.

⁶ Тиихэдэм Эзэн намда: – Эдэ бүхы үгэнүүдые Иудын хотонуудаар болон Иерусалимай үйлсэнүүдээр соносхо. Хэлсээнэй үгэнүүдые анхаржа, сахин бэелүүлхыень зондо хэлээрэй.

⁷ Египедэй орон нютагһаа гаргаһан тэрэ үдэрһөө хойшо мүнөө хүрэтэр Би таанадай үбгэ эсэгэнэрые Минии үгэ дуулаха тухайнь захиржа, һэргылжэ, оло дахин һануулаа һэм.

⁸ Гэбэшье тэдэ үгыем дуулабагүй, анхаралаа хандуулбагүй, хүн бүхэн үсэд, муу зантай байһан зандаал байгаа бэлэй. Хэлсээ сахин дүүргэжэ байха тухай тэдээндэ захяа һэм, теэд тэдэ дүүргэжэ байгаагүй. Ушар тиимэһээнь Би хэлсээн соо хэлэгдэһэн бүхы хэһээлтэнүүдые тэдээндэ шэглүүлээ һэм, – гэжэ айладхаба.

⁹ Тиигээд Эзэн намда: – Иудын хан түрын болон Иерусалимай зон Минии урдаһаа нюуса хэлсээ зохёон байгуулаа.

¹⁰ Минии үгэ дуулахаһаа татагалзаһан уг унгиингаа нүгэл шэбэлдэ тэдэ эрьен бусажа, ондоо бурхадта мүргэжэ эхилбэ. Израилиин болон Иудын үри һадаһад үбгэ эсэгэнэртэйнь Минии байгуулһан хэлсээе эбдэбэ.

¹¹ Тиимэһээ Би, Эзэн, тэдэнэй зугадажа шадахын аргагүй гай тодхор тэдээн руу шэглүүлхэб гэжэ соносхоноб. Намһаа туһа эрин тэдэнэй хашхаралдахада, Би дуулахагүйб!

¹² Тиихэдэ Иудын хан түрын болон Иерусалимай улад зон санзай урдань ууюулдаг бурхадтаа ошожо, туһа эрин дуудаха, теэд тэдэнь гай гасалангайнь үедэ оройдоошье туһалха-абархагүй.

¹³ Иудын хан түрын хото бүхэндэ өөрын бурхан бии. Иерусалимай үйлсэ бүхэндэ жэгшүүритэй муухай юумэндэ үргэлэй шэрээ табигдаа, Баалда санзай ууюулхын тула тэдэ бодхоогдоо.

¹⁴ Ерэмияа, эдэ зоной түлөө бү зальбара, бү уйла, бү гуй Намайе! Гай тодхорто ороходоо Намайе тэдэнэй дуудахада, Би шагнахагүйб.

¹⁵ Минии дуратай амараг, муу юумэ хэдэг аад, Минии үргөөдэ байха ямар эрхэтэйбши? Үргэлэй мяха шамһаа яажа би абахабиб? Муу муухайе хэхэдээ, ши баярладаг ха юмши.

¹⁶ Үзэсхэлэн һайхан, жэмэстэй, ногооржо байһан чидун модон гэжэ Би шамайе нэрлээ һэм. Харин мүнөө ехэ аадарай дуу-шуугаар Би шам руу гал эльгээн носообоб. Тиигээд мүшэрнүүдшни шатан һалаба.

¹⁷ Би, Түмэн Сэрэгтэ Эзэн, Израиль болон Иудын хан түрэ байгуулааб. Харин мүнөө тэдээндэ гай тодхор ушаруулхаб гэжэ занажа байнаб. Тэдэ өөһэдөө эдэ бүгэдые өөр дээрээ татаа, юуб гэхэдэ, Баалда санзай ууюулжа, Минии уур сухал тэдэ хүргөө ха юм.

Ерэмияагай урдаһаа нюуса хэлсээн

¹⁸ Эзэнэй намда харуулхадань, би ойлгобоб. Тэдэ зоной муу муухай хэрэгүүдынь Тэрэ намда нээжэ харуулаа.

¹⁹ Үүсэлүүлхээр хүтэлэгдэн ябажа байһан номхон хурьган мэтэ байгаа бэлэйб. Урдаһаамни муу юумэ дайсадай зохёожо байһые мэдээгүй һэм: «Жэмэстэйнь хамта модо отолжо унагаая, тэрэниие хюдан һалгаая, тиихэдэмнай хүрьһэтэ алтан дэлхэй дээрэ улад зон тэрээн тухай мартаха», – гэжэ тэдэ хэлсэжэ байгаал.

²⁰ Түмэн Сэрэгтэ Эзэн! Та үнэн зүбөөр шүүбэрилнэт. Зоной зүрхэ сэдьхэл, һанаан бодол шалган туршадагта. Би Танда зарга хэрэгээ даалгааб. Тиимэһээ тэдэнһээ үһөөгөө абахыетнай би хараһуулби, зүбшөөгыт.

²¹ Анатоот хотын зон намайе алахаяа һанаа. Эзэнэй нэрэһээ абарал буулгахаяа болёогүй һаамни, тэдэ намайе алаха тухайгаа хэлээ һэн.

²² Тиихэдэнь Түмэн Сэрэгтэ Эзэн иигэжэ айладхаа: – Би тэдэниие хэһээхэб! Залуушуулынь дайн дажарта алуулха, үхи хүүгэдынь туража үхэхэ.

²³ Би Анатоодой зониие хэһээхэ сагаа тодорхойлооб. Тэрэ сагай ерэхэдэ, хэнииньшье амиды мэндэ үлэхэгүй.