Ерэмияа 10 - Библи

Шүтөөнүүдтэ бэшэ, үнэн зүйлнүүдтэ мүргэгты

¹ Израилиин улад зон, Эзэнэй таанадта айладхажа байһан үгэ шагнагты! Тэрэ иигэжэ айладхана:

² Ондоо үндэһэ яһатадай ажабайдалые бү һажаалдагты. Тэдэнэй айдаг тэнгэриин дүлгэ тэмдэгүүдһээ бү айгты.

³ Эдэ арадуудай шажан мүргэлынь юуншье бэшэ. Ой соо модо отолоод, модошо дархан һүхөөр тэрэниие болбосоруулна.

⁴ Тиигээд мүнгөөр болон алтаар шэмэглэдэг. Ганхахагүйн тула тэрэниие хадааһа, алхаар бүхэлдэг.

⁵ Тэдэ шүтөөнүүд огородой мануухай мэтэ, дуугаржа шадахагүй. Ябажа шадахагүй байхадань тэдэниие үргэжэ зөөдэг гээшэ. Тэдээнһээ бү айгты! Тэдэ хоро хэжэ шадахагүй, мүн тиихэдэ һайнииешье хэжэ шадахагүйл.

⁶ Эзэн, Тандал адли хэншье үгыл! Та агууехэт. Танай нэрэ агууехэ ба хүсэн түгэлдэр!

⁷ Бүхы зон Таниие, үндэһэ яһатадай Хааниие, хүндэлхэ ёһотой. Үнэхөөр энэ Танда зохистой. Үндэһэтэдэй бүхы сэсэн мэргэн зоной дунда, хаашуулайнь дунда Тантай адли хэншье үгы.

⁸ Модон шүтөөнүүд юундэ һургаха юм? Тэдэ бултадаа тэнэг, мунхаг.

⁹ Шүтөөнүүд – дэлхэйн нэгэ захаһаа, Таршиишһээ асарагдаһан, дабтаһан мүнгэн, нүгөө захаһаань, Упаазһаа асарагдаһан алтан, уран гартанай бүтээл. Тэдэнэй хубсаһан номин хүхэ болон шад улаан үнгэтэй. Шадамар бэрхэ зон тэдэниие бүтээгээ.

¹⁰ Харин Та, Эзэн, ори ганса, үнэн бодото Бурхан болонот. Та – амиды Бурхан, хэтэ мүнхэдөө зонхилдог Хаан гээшэт. Танай уур сухалһаа газар дэлхэй доһолжо, үндэһэ яһатан Танай уур хилэн тэсэжэ шададаггүй.

¹¹ Таанад, улад зон, үндэһэ яһатанда иигэжэ хэлыт: «Огторгой болон газарые бүтээгээгүй бурхад үгы хэгдэжэ, хүрьһэтэ дэлхэй дээрэһээ халиха».

Эзэндэ магтаал

¹² Эзэн Өөрын хүсэ шадалаар газар дэлхэйе бүтээгээ, Өөрын мэргэн ухаагаар юртэмсые тогтоогоо, Өөрын оюун ухаагаар огторгой татаа.

¹³ Абяа гарахадань, тэнгэриин уһан хүржигэнэнэ, газар дэлхэйн адагһаа Тэрэ үүлэнүүдые хөөрүүлнэ, аадар бороогой үедэ сахилгаа түхөөнэ, агуулануудһаа һалхи эльгээнэ.

¹⁴ Улад зон булта мунхаг, ойлгосо мэдэсэгүй байна. Шүтөөн бүтээгшэ өөрынгөө нэрэ гутаана, юуб гэбэл, тэрэнэй шудхамал хүрэгүүд худал хуурмаг, амигүй онгод бшуу.

¹⁵ Тэдэ юуншье бэшэ, энеэдэ-нааданай зүйл. Эзэнэй шүүбэрилхэеэ ерэхэдэнь, үгы хэгдэхэ.

¹⁶ Яковай Бурхан тэдээндэ адли бэшэ! Тэрэ болбол Хамагые Бүтээгшэ, Израиль – Тэрэнэй Өөрын арад, мэдэлэйнь албатан. Нэрэ хүндэнь – Түмэн Сэрэгтэ Эзэн мүн.

Сүлэлгэдэ ошолго ойртоо

¹⁷ Иерусалимай улад зон, таанад бүһэлэлтэдэ байнат! Өөрынгөө эд зөөри суглуулагты.

¹⁸ Эзэн иигэжэ айладхана: «Иудын улад зониие энэ орон нютагһаа гарган хаяхаб! Хэншье хоргодожо-хорожо шадахагүй, зон ехэ зобохо-тулиха».

¹⁹ Оо, ямар үбшэнтэйб! Би зобошооб. Минии шарха эдэгэшэгүй. Харин би «энэ үбшэн тэсэжэ шадахаб» гээд һанаа һэм.

²⁰ Минии майхан дээрмэдүүлэгдээ, минии ооһорнууд таһаранхай. Улад зомни намһаа ошоо, хэншье үлөөгүй. Майхангыем табиха, хүшэгэнүүдыем татаха хэншье үгы.

²¹ Манай удамаршад тэнэг, Эзэнһээ зүбшэл, заабари асуунагүй. Тиимэһээ тэдээндэ аза талаан үгы, арад зониинь тараагдан нүүлгэгдээ.

²² Шагнагты! Иимэ һураг дуулдаба! Иудын хотонуудые хооһон, сүүбэн шонын үүр болгохоёо хойто зүгэй орон нютагһаа ехэ шууяатай сэрэг гаража байна.

²³ Эзэн, би мэдэнэб: өөрынгөө хуби заяае хүн өөрөө мэдэхэ бэшэ, өөрынгөө ажабайдалые хэншье ударидан ябажа шадахагүй.

²⁴ Өөһэдынгөө улад зониие хэһээхэдээ, уур сухалгүйгөөр, үнэн зүбөөр хэһээгыт, Эзэн! Маанадые бү хюдыт!

²⁵ Танда мүргэдэггүй үндэһэ яһатан дээрэ, мүн Таниие тоодоггүй улад зон дээрэ уур хилэнгээ адхыт. Тэдэ арад зонииетнай алаа, һалгаагаа, хюдаа, орон нютагыемнай һандаргаагаа.