Экклезиаст 9 - Библи

Хүн бүхэндэ нэгэл хуби заяан – үхэл

¹ Энэ бүхэниие би сэдьхэл зүрхэндөө абажа шэнжэлээб. Бурханай гарта – үнэн шударга зон ба ухаантан мэргэд, тэдэнэй ажал хэрэгүүд. Урдаа байһан энэрэл хайра үзэн ядалга хоёрые илгажа хүн шадахагүй.

² Энэнь бултанда адли байдаг. Һайн ба муу хүндэ, арюун сэбэртэ ба бузарта, тахил үргэдэг ба тахил үргэдэггүйдэ нэгэл хуби заяан байха; буян үйлэдэгшэдэ ба хилэнсэтэдэ, тангариглагшада ба тангаригһаа зайлагшада өөрэгүй адли.

³ Нарата түбиин бүхы амитанда нэгэ хуби байхань муу гээшэл даа. Хүнэй зосоохи хоро шарада, галзуу тэнэгтэ баригданхай байгаад, эсэстэнь үхэгшэдтэй ниилэдэг.

⁴ Амиды зоной дунда һуухань хэзээшье аятай, хэндэшье найдал үгэдэг, үхэһэн арсаланһаа амиды нохойдо хэзээшье дээрэ.

⁵ Амиды байгшад үхэхэеэ мэдэдэг, харин үхэһэн зон тэрээниие мэдэхэгүй. Аша харюу гэжэ тэдээндэ байхагүй, юундэб гэхэдэ, дурасхаалынь мартагданхай.

⁶ Тэдэнэй хайра дуран, хоромсол, атаа жүтөөн ошон ошоо, нарата дэлхэйдэ болодог үйлэдэ тэдэ ямаршье хабаагүй болоо.

⁷ Зай иигээд яба, үйлэ хэрэгүүдыш Бурханай һайшаажа байгаа хадань, эдеэ талхаяа дорюун зоогло, сэдьхэл сэнгэлэн үзэмэй дараһан архияа уу.

⁸ Саг үргэлжэ сайбар сагаан хубсаһа үмдөөрэй, толгойдоо тоһо элбэгээр түрхи.

⁹ Бурханай шамда үгэһэн хүлгөөтэ бүхы үдэрнүүдтэ дурлаһан эхэнэртэйгээ жарган һуугты. Энэ хадаа нарата дэлхэйдэ шамда үгтэһэн шагнал болоно.

¹⁰ Гарайнгаа хэжэ шадаха юумэ шадал соогоо хэгты. Ушарынь гэхэдэ, үхэлэй орондо ошоходош, тэндэ ажал үйлэ, бодол сэдьхэлгэ, мэдэсэ, мэргэн ухаан гэжэ байхагүй.

¹¹ Нарата дэлхэйдэ хараһан зүйл соо хурданиинь урилдаанда шалгардаг бэшэ, эрэлхэгтэ илалта ерэдэггүй, мэргэн сэсэндэ олоһон хилээмэниинь хүртэхэгүй, ухаатайда зөөри баялиг байхагүй, уран дүйтэйдэ шадабари үгтэдэггүй, бүхы хүнүүд эрэ бэрхэдээ бэшэ, аза талаангайл тудахада юумэн хуу ушарха сагтаа болодог.

¹² Шубуунай урьхада, загаһанай губшуурта ороһонтой адли гэнтэ муу саг бууха, муу юумэнэй болохые хүн огто мэдэхэгүй байна.

¹³ Нарата дэлхэйдэ нэгэ ухаатай зүйл харааб, тэрэ хадаа шухала гэжэ һанагдаа.

¹⁴ Үсөөн зонтой багахан хотодо хүсэ ехэтэй хаан добтолон хүреэлөөд, ехэ хашалта хэбэ.

¹⁵ Тэрэ хотодо нэгэ хүн олдожо, сэсэн бодолоор хотые абарба, гэбэшье үгытэй һэн хойнонь хэншье хожомынь тэрэниие дурдадаггүй.

¹⁶ Мэргэн ухаан хүсэ шадалһаа үлүү гэгдээшье һаа, үгытэй хүнэй ухаан тоолгохогүй, үгэ хүүрынь анхарал татадаггүй гэжэ харабаб.

¹⁷ Тэнэгүүдэй дунда удамаршын хашхарагшаһаа сэсэн хүнэй аалихан хэлэһэн үгэ үлүү шагнагдаха.

¹⁸ Сэсэн ухаан тулалдаанай зэбсэгһээ хүсэтэй, гэбэшье нэгэ нүгэлтэ хэды шэнээн һайниие һүйдхэхэб даа.