Экклезиаст 7 - Библи

Сэсэн мэргэн заабаринууд

¹ Үнэтэ һайн тоһонһоо һайн нэрэнь дээрэ, түрэхэ үдэрһөө үхэхэ үдэрынь дээрэ.

² Найр сэнгэлэй гэр руу ошогшоһоо гашуудалай гэр руу орогшонь дээрэ, ушарынь хадаа хүнэй үхэл иимэ гэжэ амиды байгша мэдэхэ ёһотой.

³ Энеэхэһээ уйлахань дээрэ. Шарайнь гунигтай байбашье, сэдьхэлдээ баяртай байжа болохо.

⁴ Ухаатайн зүрхэн гашуудагшын гэртэ, тэнэгэй зүрхэн сэнгэлэй гэртэ байдаг.

⁵ Тэнэгэй дуулахые шагнагшаһаа ухаатайн зэмэлхые шагнагшань дээрэ.

⁶ Тэнэгэй энеэхэнь тогоон дорохи гэшүүһэнэй нижаганаһантай адли тоолхогүй. Энэ дэмы хүлгөөн.

⁷ Хүниие хашахадаа, мэргэд ухаагаа алдадаг, абалга эдилгэ сэдьхэл гутаадаг.

⁸ Эсэс хэзээшье эхинһээ шухала, тэсэбэритэйнь бардамһаа дээрэ.

⁹ Уурлахые урдаа бү таби, уур сухал тэнэгэй сээжэдэ.

¹⁰ «Яагаад урдын үдэрнүүд мүнөөнэйхиһээ юугээрээ дээрэ юм бэ» гэжэ бү хэлэ. Иигэжэ асуухань сэсэн ухаанһаа бэшэ.

¹¹ Мэргэн ухаан угай зөөриһөө өөрэгүй баялиг, амиды ябагшада илангаяа аша туһатай.

¹² Тэрэ мүнгэн шэнгил хамгаалалта болохо аргатай, харин мэдэлгын булюу юумэниинь гээ һаа, мэргэн ухаан эзэмшэгшэдээ ами наһа түхөөдэг.

¹³ Бурханай ажалые харагты: Тэрэнэй һарюу болгоһониие хэн сэхэлжэ шадахаб?

¹⁴ Ажана тэгшэ үдэртэ аза жаргалаар ханадаг бай, урагшагүй үдэртэ сэдьхэн бодомжоло: али бүхые Бурхан бии болгодог һэн тула Тэрэнэй хэрэг хүн буруушааха бэшэ.

¹⁵ Би удхагүй амидаралайнгаа үдэрнүүдтэ элдэб юумэ харааб: үнэн хүнэй үнэн шударга соогоо үхэжэ байхада, муу хүн муу соогоо удаан наһа наһалжа байдаг.

¹⁶ Үлүү үнэн шударга бү боло, хэтэрмэ мэргэн ухаантай бү бай, өөрыгөө һүнөөхэгүйн тулада.

¹⁷ Нүгэл бү үйлэдэ, галзуу тэнэг бү боло, сагһаа урид үхэхэ ёһотой юм гүш?

¹⁸ Нэгэ хуули сахяад, нүгөөдыень орхингүй байхада һайн гэбэшье, Бурханһаа түбэгшөөдэг хүн хоёр хэтэрүүһээ зайлаха.

¹⁹ Ухаатай мэргэн хотын арбан толгойлогшонорһоо хүсэтэй байдаг.

²⁰ Үнэниие гансал үйлэдөөд, юрэ нүгэл хэдэггүй хүн гэжэ дэлхэй дээрэ үгы.

²¹ Яряанай бүхы үгэ бэедээ дүтэ бү аба, богоолойнгоо шамайе хараажа байхыень шагнажа болохош.

²² Тэрээндэ адли олон удаа өөрөөшье бусадые хараажа байһанаа һанаха ёһотойш.

²³ Эдэ бүгэдые мэргэн ухаагаар шалгаад, «Би ухаатай болооб» гэжэ өөртөө хэлээшье һаам, мэргэн ухаан намһаа ямар холоб даа.

²⁴ Үнгэрһэн юумэн аласай холодо, гүн ехэ гүн соо байна, хэн тэрээниие нээжэ шадахаб?

²⁵ Би мэргэн ухааниие шэнжэлэн таниха, нүгэлтэ зоной тэнэглэл галзуугай ушарые олохо гэжэ сэдьхэлээ зорюулбаб.

²⁶ Үхэлһөө үлүү гашуун зүйл эхэнэр гэжэ олобоб: эмэ хүнэй зүрхэн занга, гарынь гэнжэ, Бурханда хэрэгтэй амитан тэрээнһээ зайлаха, харин нүгэлтэн тэрээндэ баригдаха.

^27-28 Гүн ухаата багша хэлэбэ: – Харагты, харюу тайлбари олохо гэжэ би энээниие суглуулааб. Харюу бэдэрһэн зандааб. Олоһон юумэн гэхэдэ, мянгаад зоной дунда нэгэ һайн эрэгтэйе олооб, нэгэшье эмэгтэйе олоогүйб.

²⁹ Минии оложо мэдэһэн зүйл хадаа Бурхан хүниие үнэн шударгыгаар бүтээгээ, теэд тэдэнь муу тээшэ олон зам нээгээ.